ଭୁବନେଶ୍ୱର,୦୬/୦୫: ଆଜ୍ମା ବା ଶ୍ୱାସ ରୋଗ । ଥରେ ଏହି ରୋଗ ହେଲେ ସହଜରେ ଭଲ ହୁଏନି । ତେବେ ବାୟୁ ପ୍ରଦୂଷଣ ଶ୍ୱାସ ରୋଗର ପ୍ରମୁଖ କାରଣ ବୋଲି ବିଶେଷଜ୍ଞମାନେ ମତ ରଖିଛନ୍ତି । ଭୁବନେଶ୍ୱରରେ ଗାଡିମଟରରୁ ନିର୍ଗତ ଧୂଆଁ, ଶିଳ୍ପ ପ୍ରଦୂଷଣ, ନିର୍ମାଣଧୀନ କୋଠାର ଧୂଳି ଯୋଗୁ ଦିନକୁ ଦିନ ବାୟୁ ପ୍ରଦୂଷଣ ବୃଦ୍ଧି ପାଉଥିବା ବେଳେ ଏହା ଶ୍ୱାସ ରୋଗଜନ୍ମ ଦେଉଛି । ବିଶେଷ କରି ଛୋଟ ଶିଶୁଙ୍କ ଉପରେ ଏହାର ପ୍ରଭାବ ପଡ଼ୁଛି । ପ୍ରତିଦିନ କ୍ୟାପିଟାଲ ହସ୍ପିଟାଲକୁ ୮ରୁ ଅଧିକ ଶ୍ୱାସରୋଗୀ ଆସୁଥିବା ଜଣାପଡ଼ିଛି । ଆଜ୍ମା ହେଉଛି ଏକ ଫୁସଫୁସ୍ ଜନିତ ରୋଗ । ଏହି ରୋଗ ହେଲେ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ରହେ । ବିଶେଷକରି ଶୀତଦିନେ ଏହି ରୋଗ ଅଧିକ ବ୍ୟାପେ । ତେବେ ଶ୍ୱାସରୋଗୀଙ୍କ ଉନ୍ନତ ଚିକିତ୍ସା ପାଇଁ ବେସରକାରୀ ସ୍ତରରେ ରହିଛି ବ୍ରିଥ୍ଫ୍ରି ଚେଷ୍ଟ କ୍ଲିନିକ୍ । ଯେଉଁଠି ଆଜ୍ମାରୋଗୀଙ୍କୁ ଉନ୍ନତମାନର ଚିକିତ୍ସା ମିଳୁଛି । ହେଲେ ସରକାରୀ ହସ୍ପିଟାଲରେ ଏହିସ୍ୱତନ୍ତ୍ର କ୍ଲିନିକ୍ ନାହିଁ ।
କ୍ୟାପିଟାଲ ହସ୍ପିଟାଲରେ ଶ୍ୱାସ ରୋଗୀଙ୍କ ପାଇଁ କ୍ରୋନିକ୍ ଅବ୍ଷ୍ଟ୍ରକଟିଭ୍ ପଲ୍ମୋନାରୀ ଡିଜିଜ୍ (ସିଓପିଡି) ୱାର୍ଡ ରହିଛି । ଯେଉଁଠି ବିଭିନ୍ନ ପ୍ରକାରର ଛାତି ରୋଗ ସଂକ୍ରାନ୍ତୀୟ ରୋଗର ଚିକିତ୍ସା ହୁଏ । ହେଲେ ଶ୍ୱାସରୋଗୀମାନଙ୍କ ପାଇଁ ସ୍ୱତନ୍ତ୍ର ୟୁନିଟ୍ ପାଇଁ ଦାବି ହେଉଛି । ପ୍ରକାଶ ଥାଉକି,ଲଙ୍ଗସ୍ ଇଣ୍ଡିଆ ରିପୋର୍ଟ ଅନୁସାରେ, ବିଶ୍ୱରେ ପ୍ରତିବର୍ଷ ୪.୬୧ ଲକ୍ଷ ଲୋକ ଆସ୍ଥମାରେ ପ୍ରାଣ ହରାଉଛନ୍ତି । ୨୦୨୨ ସୁଦ୍ଧା ଦେଶରେ ୩୪.୩ ନିୟୁତ ରୋଗୀଅଛନ୍ତି । ଓଡ଼ିଶାରେ ୩୦.୫୮ ଲକ୍ଷ ଆଜ୍ମା ରୋଗୀ ରହିଛି । ପଲ୍ମୋନୋଜିଷ୍ଟଡା. ପ୍ରଜ୍ଞାଶ୍ରୀ ପ୍ରିୟଦର୍ଶିନୀ କହିଛନ୍ତି, ଆଜ୍ମା ପ୍ରତି ପ୍ରଥମେ ସଚେତନ ଦରକାର ।ଯଦି ବାରମ୍ବାର ଛିଙ୍କ ହେବା, ନିଶ୍ୱାସ ପ୍ରଶ୍ୱାସରେ କଷ୍ଟ ହେବା ଭଳି ଲକ୍ଷଣ ଦେଖାଯାଏ ତେବେ ଡାକ୍ତରଙ୍କ ପରାମର୍ଶ ନେବା ଦରକାର । ସେହିପରି ପିଲାଙ୍କୁ ପ୍ରଦୂଷଣରୁ ଦୂରେଇ ରଖିବା, ଘରେ ପିଲାଙ୍କ ପାଖରେ ଧୂମପାନ ନ କରିବା,ଗର୍ଭାବସ୍ଥାରେ ମା ଧୂମପାନ ନ କରିବା ଆଦି ପାଳନ ଦରକାର ।
