ନୂଆଦିଲ୍ଲୀ ୩୧/୦୫: ତମାଖୁ ସେବନ ଯୋଗୁ ହେଉଥିବା କ୍ଷତି ବିଷୟରେ ସଚେତନତା ସୃଷ୍ଟି ଲାଗି ପ୍ରତି ବର୍ଷ ମେ ୩୧ ତାରିଖରେ ପାଳିତ ହୁଏ ବିଶ୍ୱ ତମାଖୁ ନିରୋଧ ଦିବସ । ତମାଖୁ ସେବନ ଲାଗି ପ୍ରତି ବର୍ଷ ୮୦ ଲକ୍ଷରୁ ଅଧିକ ଲୋକ ପ୍ରାଣ ହରାଉଛନ୍ତି । ମାନବଜାତି ପାଇଁ ଏହା ଯେତିକି କ୍ଷତିକାରକ, ପରିବେଶ ପାଇଁ ମଧ୍ୟ ସେତିକି ବିପଦପୂର୍ଣ୍ଣ । 

୨୦୩୦ ପର୍ଯ୍ୟନ୍ତ ଜାତିସଂଘ ଆପଣେଇଥିବା ନିରନ୍ତର ବିକାଶ ଏଜେଣ୍ଡା ପ୍ରୟାସ ଉପରେ ପ୍ରଭାବ ପକାଉଥିବା କାରକ ମଧ୍ୟରେ ତମାଖୁ ସେବନ ଅନ୍ୟତମ । ୨୦୩୦ ବେଳକୁ ତମାଖୁ ସେବନ ଜନିତ ଏକ ତୃତୀୟାଂଶ ମୃତ୍ୟୁ ହ୍ରାସ କରିବା ଜାତିସଂଘର ଲକ୍ଷ୍ୟ । ୧୯୮୭ ମସିହାରେ ବିଶ୍ୱ ସ୍ୱାସ୍ଥ୍ୟ ସଂଗଠନର ସଦସ୍ୟ ରାଷ୍ଟ୍ରମାନେ ବିଶ୍ୱ ତମାଖୁ ନିରୋଧ ଦିବସ ପାଳନ ପାଇଁ ରାଜି ହୋଇଥିଲେ । ସେବେଠାରୁ ପ୍ରତି ବର୍ଷ ନୂଆ ବିଷୟ ଆଧାରରେ ଏହି ଦିବସ ପାଳିତ ହେଉଛି । ଚଳିତ ବର୍ଷ ଏହି ଦିବସର ବିଷୟ ରହିଛି ‘ତମାଖୁ ଶିଳ୍ପର ହସ୍ତକ୍ଷେପରୁ ପିଲାଙ୍କୁ ସୁରକ୍ଷା ଦେବା ।’