ମାଲକାନଗିରି,୨୫।୪ : ଗଞ୍ଜେଇ ଚୋରା ଚାଲାଣ ମାମଲାର ବିଚାର କରି ମାଲକାନଗିରି ଜିଲ୍ଲା ସ୍ୱତନ୍ତ୍ର ଜଜ୍ ବିକ୍ରମ ପଟ୍ଟନାୟକ ଅଭିଯୁକ୍ତ ଅଜୟ ରାଜାରାମଙ୍କୁ ୧୦ ବର୍ଷ କାରାଦଣ୍ଡ ସହ ୧ ଲକ୍ଷ ଜରିମାନା ଦଣ୍ଡାଦେଶ ଦେଇଛନ୍ତି। ଜରିମାନା ଅନାଦେୟ ହେଲେ ଆଉ ଛଅମାସ ଜେଲ ଦଣ୍ଡ ଭୋଗିବେ ବୋଲି ରାୟରେ ଶୁଣାଇଛନ୍ତି।
ସୁଚନା ଅନୁଯାୟୀ ୨୯.୦୪.୨୦୨୩ ମଧ୍ୟପ୍ରଦେଶ ଅହମ୍ମଦ ନଗର ଅଞ୍ଚଳର ଅଭିଯୁକ୍ତ ଅଜୟ ରାଜାରାମ ଏକ ବୋଲେରୋ ପିକଅପ୍ ଭ୍ୟାନ୍ ରେ ପ୍ରାୟ ୧ କୁଇଣ୍ଟାଲ ଗଞ୍ଜେଇ କାଲିମେଳା ବ୍ଲକ ଅନ୍ତର୍ଗତ ଗୋମ୍ପାକୋଣ୍ଡା ଠାରୁ ଚୋରା ଚାଲାଣ କରୁଥିଲେ। ଏହି ସମୟରେ ଏମ୍.ଭି. ୬୬ ନିକଟରେ ଅବକାରୀ ବିଭାଗ ଏସ୍.ଆଇ. ପ୍ରଶାନ୍ତ କୁମାର ସେଠୀ ଓ କର୍ମଚାରୀ ମାନେ ଗାଡିକୁ ଅଟକାଇ ଯାଞ୍ଚ କରିଥିଲେ। ଯାଞ୍ଚ ସମୟରେ ଉକ୍ତ ଗାଡିରେ ଦୁଇଟି ପ୍ଲାଷ୍ଟିକ ବସ୍ତାରେ ଏକ କ୍ୱିଂଟାଲ ଗଞ୍ଜେଇ ଥିବା ଦେଖିବାକୁ ପାଇଥିଲ। ଏ ନେଇ ଅବକାରୀ ବିଭାଗ ଗଂଜେଇ ସହ ଗାଡି ଜବତ କରି ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲେ । ପରେ ଜାମିନ ନାମଞ୍ଜୁର ହେବା ଫଳରେ ଅଭିଯୁକ୍ତଙ୍କୁ ହାଜତକୁ ପଠାଇଥିଲେ । ତେବେ ଆଜି ଏହି ମାମଲାର ସାକ୍ଷ୍ୟ ପ୍ରମାଣକୁ ଭିତ୍ତି କରି ବିଚାରପତି ଶ୍ରୀ ପଟ୍ଟନାୟକ ଅଭିଯୁକ୍ତଙ୍କୁ ୧୦ ବର୍ଷ କାରାଦଣ୍ଡ ଶୁଣାଇଛନ୍ତି । ଏହି ମାମଲାକୁ ସରକାରୀ ଓକିଲ ବିଜୟ କୁମାର ମହାନ୍ତି ପରିଚାଳନା କରିଥିଲେ ।