ଭୁବନେଶ୍ୱର, ୦୧/୦୫ : ଚିଲ ଭଳି ଦେଖାଯାଉଛି । ଅବିଶ୍ରାନ୍ତ ଉଡ଼ିବାକୁ ଯେମିତି ପଣ କରିଛି। କାଣିଚାଏ ଥକୁନାହିଁ । ପୂର୍ବ ଆଫ୍ରିକୀୟ ଦେଶ ସୋମାଲିଆରୁ ଉଡ଼ାଣ ଭରିଥିଲା । ୯୩ ଘଣ୍ଟାରେ ପ୍ରାୟ ୩,୮୦୦ କିଲୋମିଟର ଉଡ଼ାଣ ପରେ ଭାରତରେ ପହଞ୍ଚିଛି। ଗୁଜରାଟ ଓ ଛତିଶଗଡ଼ ଦେଇ ଶେଷରେ ଓଡ଼ିଶା ଆସିଛି । ଏହି ଚଢ଼େଇ ହେଉଛି ଅମୁର୍ ଫାଲ୍କନ୍ ଚିଉଲୁଆନ-୨ । ଘଣ୍ଟା ପିଛା ପ୍ରାୟ ୫୫ କିଲୋମିଟର ବେଗରେ ଏହା ଉଡ଼ୁଛି । ଏହି ଖବର ପକ୍ଷୀପ୍ରେମୀଙ୍କ ମଧ୍ୟରେ ଉତ୍ସାହ ଭରିଛି ।
ଚଢ଼େଇଟିର ଗତି ଓ ଅବସ୍ଥିତି ଜାଣିବା ଲାଗି ତା’ ଦେହରେ ସାଟେଲାଇଟ୍ ଟ୍ରାନ୍ସମିଟର ଖଞ୍ଜାଯାଇଥିଲା। ମଙ୍ଗଳବାର ରାତି ପ୍ରାୟ ୨ଟାରେ ପ୍ରଥମେ ଗୁଜରାଟର ଭରୁଚରେ ପ୍ରବେଶ କରିଥିଲା । ଏହାପରେ ଛତିଶଗଡ଼ରେ ପହଞ୍ଚିଥିଲା । ଏବେ ପଶ୍ଚିମ ଓଡ଼ିଶାରେ ରହିଥିବା ସୂଚନା ମିଳିଛି । ୱାଇଲ୍ଡଲାଇଫ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆର ବରିଷ୍ଠ ବୈଜ୍ଞାନିକ ଡ. ସୁରେଶ କୁମାରଙ୍କ କହିବା ମୁତାବକ, ବୁଧବାର ଅପରାହ୍ନରେ ଆମେ ଚିଉଲୁଆନ୍ର ସଦ୍ୟ ଅବସ୍ଥିତି ବାବଦରେ ଜାଣିବାକୁ ପାଇଛୁ । ସନ୍ଧ୍ୟା ୫ଟା ସୁଦ୍ଧା ଏହା ପଶ୍ଚିମ ଓଡ଼ିଶାରେ ଥିଲା ।
ସେ କହିଛନ୍ତି, ସୋମାଲିଆରୁ ଭାରତ ଆସି ଏହା ଉତ୍ତର-ପୂର୍ବ ମୁହାଁ ହୋଇଛି । ପକ୍ଷୀଟି କିଭଳି ଓ କେତେ ସମୟ ବିଶ୍ରାମ ନେଉଛି, ତାହା ନେଇ ଚକିତ କଲା ଭଳି ସୂଚନା ମିଳିଛି । ମଣିପୁର ଜଙ୍ଗଲ ବିଭାଗର ଡିଏଫ୍ଓ ହିଟଲର ସିଂହଙ୍କ ଅନୁସାରେ, ଚିଉଲୁଆନ୍-୨ ଉଡ଼ିବା ବେଳେ ହିଁ ବିଶ୍ରାମ ନେଉଥିବା ଆମେ ଅନୁମାନ କରୁଛୁ । ଏହି ସମୟରେ ଉଡ଼ାଣରେ ଏହା ଅଧିକ ବଳ ପ୍ରୟୋଗ କରି ନ ଥାଏ ଏବଂ ପବନର ସହାୟତା ନେଇଥାଏ । କିନ୍ତୁ ଏ ନେଇ ଆମେ ନିଶ୍ଚିତ ନୁହଁ । ୨୦୨୪ ନଭେମ୍ବରରେ ଦୁଇଟି ଅମୁର୍ ଫାଲ୍କନ୍ ଚିଉଲୁଆନ୍ ୨ ଏବଂ ଏକ ମାଈ ଗ୍ୱାଙ୍ଗରାମ୍ ଚଢ଼େଇ ଦେହରେ ସାଟେଲାଇଟ ଟ୍ରାନ୍ସମିଟର ଲଗାଯାଇ ମଣିପୁରର ତାମେଙ୍ଗଲୋଙ୍ଗ ଜିଲ୍ଲା ଅନ୍ତର୍ଗତ ଚିଉଲୁଆନ୍ ଗ୍ରାମରେ ଛଡ଼ାଯାଇଥିଲା । ଏହି ସମୟରେ ଡିଏଫ୍ଓ ହିଟଲର ସିଂହ ଏବଂ ଡ. ସୁରେଶ କୁମାରଙ୍କ ଉପସ୍ଥିତିରେ ଆଉ କେତେକ ଅମୁର ଫାଲ୍କନ୍ ମଧ୍ୟ ଛଡ଼ାଯାଇଥିଲା । ଚଢ଼େଇଗୁଡ଼ିକ କେଉଁ ରୁଟ୍ରେ ଓ କିଭଳି ଉଡ଼ାଣ କରୁଛନ୍ତି, ତାହା ଜାଣିବା ଏହି ପ୍ରକଳ୍ପ ପଛରେ ଉଦ୍ଦେଶ୍ୟ ରହିଛି ।
