ବେଙ୍ଗାଲୁର,୩୦।୧୦: ବ୍ରିଟେନ୍ ରାଜା ଚାର୍ଲସ୍ ତୃତୀୟ ଓ ତାଙ୍କ ପତ୍ନୀ କ୍ବିନ୍ କେମିଲା ନିକଟରେ ବେଙ୍ଗାଲୁର ଗସ୍ତ କରିଥିଲେ। ସେମାନେ ପ୍ରାୟ ୪ ଦିନ ପର୍ଯ୍ୟନ୍ତ ଦକ୍ଷିଣ ଭାରତୀୟ ରାଜ୍ୟ କର୍ଣ୍ଣାଟକର ରାଜଧାନୀରେ ଥିଲେ। କୁହାଯାଉଛି ଯେ, ବ୍ରିଟେନ୍ର ରାଜା ଓ ରାଣୀ ବେଙ୍ଗାଲୁରର ବାହାର ଅଞ୍ଚଳରେ ଥିବା ଏକ ସୁନ୍ଦର ବାଲାନ୍ସ ରିଟ୍ରିଟ୍ , ସାବକ୍ବା ଇଣ୍ଟରନ୍ୟାସନାଲ ହୋଲିଷ୍ଟିକ୍ ହେଲଥ୍ ସେଣ୍ଟରରେ ୪ ଦିନ ବିତାଇଥିଲେ। ସେଠାକୁ ଏହା ତାଙ୍କ ବ୍ୟକ୍ତିଗତ ଗସ୍ତ ଥିଲା, ଯେଉଁଠି ସେ ଏହି ରିଟ୍ରିଟ୍ ସେଣ୍ଟରରେ ନିଜର ସ୍ବାସ୍ଥ୍ୟ ଉପଚାର କରିଥିଲେ। ଏହି ଯାତ୍ରା କିଙ୍ଗ ଚାର୍ଲସଙ୍କ ସିଂହାସନ ସମ୍ଭାଳିବା ପରେ ତାଙ୍କର ପ୍ରଥମ ଭାରତ ଯାତ୍ରା ଥିଲା।
ଇଣ୍ଡିଆନ୍ ଏକ୍ସପ୍ରେସ୍ର ରିପୋର୍ଟ ଅନୁସାରେ, କିଙ୍ଗ ଚାର୍ଲସ୍ ଓ କ୍ବିନ୍ କେମିଲା ୨୭ ଅକ୍ଟୋବରରେ ସମୋଆ ଦେଶରେ ଆୟୋଜିତ ୨୦୨୪ ରାଜ୍ୟଗୋଷ୍ଠୀ ସରକାରଙ୍କ ପ୍ରମୁଖ ବୈଠକରେ ଭାଗ ନେବା ପରେ ସିଧାସଳଖ ବେଙ୍ଗାଲୁରରେ ପହଁଞ୍ଚିଥିଲେ। ତାଙ୍କର ଏହି ଯାତ୍ରା ସମ୍ପୂର୍ଣ୍ଣ ଭାବରେ ବ୍ୟକ୍ତିଗତ ଥିଲା ଓ ଏଥିରେ ସେ କୌଣସି ସାର୍ବଜନୀକ କାର୍ଯ୍ୟକ୍ରମ କିମ୍ବା ବୈଠକରେ ଯୋଗ ଦେଇନଥିଲେ। କୁହାଯାଉଛି ଯେ, ବ୍ରିଟେନ୍ର ରାଜା ଚାର୍ଲସ କ୍ୟାନସରରେ ପୀଡିତ ଅଛନ୍ତି। ୫ ଫେବୃଆରୀ ୨୦୨୪ରେ ବର୍ମିଂହାମ୍ ପ୍ୟାଲେସ୍ ଏକ ବୟାନ ଜାରି କରି ଏହାର ସୂଚନା ଦେଇଥିଲା। କ୍ୟାନସର ଡାଇଗ୍ନୋସିସ୍ ହେବାପରେ ଚାର୍ଲସ୍ଙ୍କ ଏହା ପ୍ରଥମ ଅନ୍ତର୍ଜାତୀୟ ଯାତ୍ର।
କୁହାଯାଉଛି ଯେ, ଏ ସମ୍ପର୍କରେ ସେ ଓ୍ବେଲନେସ୍ ରିଟ୍ରିଟ୍ ପାଇଁ ଏସ୍ଆଇଏଚଏଚସି ଗସ୍ତ କରିଥିଲେ ଓ ନିଜର ଚିକିତ୍ସା କରିଥିଲେ। ସାକ୍ବାର ଓ୍ବେବସାଇଟ୍ ଅନୁସାରେ, ଏହା ୩୦ ଏକର ଅର୍ଗାନିକ୍ ଫାର୍ମ ଅଟେ। ସାକ୍ବା ଆର୍ୟୁବେଦନ, ହୋମିଓପାଥି, ଯୋଗ ଓ ପ୍ରାକୃତିକ ଚିକିତ୍ସା ଭଳି ବିଭିନ୍ନ ପାରମ୍ପାରିକ ଓ ପ୍ରାକୃତିକ ଚିକିତ୍ସା ପ୍ରଣାଳି ଏକାଠି ଉପଲବ୍ଧ କରିଥାଏ। ଓ୍ବେଲନେସ୍ ରିଟ୍ରିଟ୍ରେ ଶାରିରିକ, ମାନସିକ ଓ ଭାବନାତ୍ମକ ସ୍ବାସ୍ଥ୍ୟ ଉପରେ ଧ୍ୟାନ ଦିଆଯାଇଥାଏ। ଓ୍ବେଲନେସ୍ ରିଟ୍ରିଟ୍ରେ ବିଶେଷ ଭାବରେ ପ୍ରାକୃତିକ ପରିବେଶରେ ଧ୍ୟାନ, ସ୍ବାସ୍ଥ୍ୟକର ଭୋଜନ ଓ ସ୍ପା ଥେରାପି ଭଳି ଗତିବିଧି ହୋଇଥାଏ। ଏହି ରିଟ୍ରିଟ୍ରେ ଆପଣ ନିଜର ବ୍ୟକ୍ତିଗତ କାରଣ ପାଇଁ ସମର୍ପିତ ହୋଇପାରନ୍ତି ଓ ବିଶେଷଜ୍ଞଙ୍କଠାରୁ ମାର୍ଗଦର୍ଶନ ନେଇପାରନ୍ତି।
ବ୍ରିଟେନର ରାଜାଙ୍କର ପ୍ରତିଦିନ ସକାଳୁ ଯୋଗରୁ ଦିନ ଆରମ୍ଭ ହୁଏ। ଏହାପରେ ଜଳଖିଆ ଓ ପୁନଃଜୀବନ ଉପଚାର ହୋଇଥାଏ। ମଧ୍ୟାହ୍ନ ଭୋଜନ ପରେ ବିଶ୍ରାମ ଓ ଉପଚାର ଆରମ୍ଭ ହୋଇଥାଏ, ଯାହାକି ଧ୍ୟାନ ସହିତ ଶେଷ ହୋଇଥାଏ। ରାତ୍ରି ଭୋଜନ କରିବା ପରେ ରାତି ୯ଟାରେ ଦିନଚର୍ଯ୍ୟା ଶେଷ ହୋଇଥାଏ। କିଙ୍ଗ ଚାର୍ଲସ୍ ପୂର୍ବରୁ ମଧ୍ୟ ସ୍ବାସ୍ଥ୍ୟ ପ୍ରତି ନିଜର ଭଲପାଇବା ଦେଖାଇ ସାରିଛନ୍ତି। ଗତ ଏକ ଦଶକରେ ଏହି କେନ୍ଦ୍ରକୁ ସେ ୯ ଥର ଗସ୍ତ କରିସାରିଛନ୍ତି।
