ନୂଆଦିଲ୍ଲୀ ୧୧/୦୫: ପୃଥିବୀଆଡ଼କୁ ଏକ ଭୟଙ୍କର ସୌରଝଡ଼ ମାଡ଼ିଆସୁଛି । ଏହାଯୋଗୁ ସାରା ବିଶ୍ୱରେ ପାୱାର ଗ୍ରୀଡ୍, ଯୋଗାଯୋଗ ବ୍ୟବସ୍ଥା ଗୁରୁତର ଭାବେ ପ୍ରଭାବିତ ହୋଇପାରେ । ଆମେରିକାର ଦ ନ୍ୟାସନାଲ ଓସେନିକ୍ ଆଣ୍ଡ ଆଟ୍ମୋସ୍ପିୟରିକ୍ ଆଡମିନିଷ୍ଟ୍ରେସନ୍ (ଏନ୍ଓଓଏ)ଏ ସଂପର୍କରେ ଜି-୪ ଜିଓମାଗ୍ନେଟିକ୍ ଷ୍ଟର୍ମ ୱାଚ୍ ଜାରି କରିଛି । ଶୁକ୍ରବାରଠାରୁ ଆରମ୍ଭ କରି ଚଳିତ ସପ୍ତାହ ଶେଷ ଯାଏ ଏହାର ପ୍ରଭାବ ରହିବ ବୋଲି ଚେତାବନୀ ଦିଆଯାଇଛି ।
ସେଥିରେ କୁହାଯାଇଛି ଯେ, ୨୦୦୫ ପରେ ଏହା ସବୁଠୁ ଭୟଙ୍କର ସୌରଝଡ଼ ହେବ ଯାହାଦ୍ୱାରା ଭାରୀ କ୍ଷୟକ୍ଷତି ହେବାର ଆଶଙ୍କା ରହିଛି । ଏନ୍ଓଓଏର ଅନ୍ତରୀକ୍ଷ ପାଣିପାଗ ପୂର୍ବାନୁମାନ କେନ୍ଦ୍ର ଅନୁସାରେ, ବୁଧବାରଠାରୁ ସୂର୍ଯ୍ୟ ଅପେକ୍ଷାକୃତ ତୀବ୍ର ସୋଲାର ଫ୍ଲେୟାର(ସୌର ଜ୍ୱାଳା) ବିକିରଣ କରୁଛି । ସୋଲାର ଫ୍ଲେୟାର ଆମର ସୌରମଣ୍ଡଳର ସବୁଠୁ ବଡ଼ ବିସ୍ଫୋରକ ଘଟଣା । ଏହାକୁ କରୋନାଲ୍ ମାସ୍ ଇଜେକସନ୍ (ସିଏମ୍ଇ)ବୋଲି ମଧ୍ୟ କୁହାଯାଇଥାଏ । ଏହାଦ୍ୱାରା କୋଟି କୋଟି ହାଇଡ୍ରୋଜେନ୍ ବୋମା ଭଳି ଶକ୍ତି ନିର୍ଗତ ହୋଇଥାଏ । ସୋଲାର ଫ୍ଲେୟାର ଦ୍ୱାରା ପୃଥିବୀ ଚାରିପଟେ ବୁଲୁଥିବା ଉପଗ୍ରହର କାର୍ଯ୍ୟ ବାଧାପ୍ରାପ୍ତ ହୋଇପାରେ । ଫଳରେ ବିଦ୍ୟୁତ୍ ଯୋଗାଯୋଗ ବ୍ୟବସ୍ଥା ପ୍ରଭାବିତ ହୋଇପାରେ ।
ସୂଚନାଥାଉକି, ୨୦୦୩ରେ ଏକ ଅତି ଭୟଙ୍କର ଜିଓମାଗ୍ନେଟିକ୍ ଷ୍ଟର୍ମ ଯୋଗୁ ସ୍ୱିଡେନ୍ରେ ବିଦ୍ୟୁତ୍ ଯୋଗାଣ ବ୍ୟବସ୍ଥା ଗୁରୁତର ଭାବେ ବାଧାପ୍ରାପ୍ତ ହୋଇଥିଲା ।