ନୂଆଦିଲ୍ଲୀ ୦୪/୦୬: ବେଙ୍ଗାଲୁରୁ ରେଭ ପାର୍ଟିରେ ନିଷିଦ୍ଧ ଡ୍ରଗ୍ସ ସେବନ କରିବା ଅଭିଯୋଗରେ କର୍ଣ୍ଣାଟକ ପୁଲିସ ତେଲୁଗୁ ଅଭିନେତ୍ରୀ ହେମାଙ୍କୁ ଗିରଫ କରିଛି । କର୍ଣ୍ଣାଟକ ସେଣ୍ଟ୍ରାଲ କ୍ରାଇମ ବ୍ରାଞ୍ଚ (ସିସିବି) ହେମାଙ୍କୁ ମେ ୨୭ ଓ ଜୁନ ୧ରେ ଦୁଇଥର ସମନ ଜାରି କରି କାର୍ଯ୍ୟାଳୟରେ ହାଜର ହେବାକୁ କହିଥିଲା । କିନ୍ତୁ ସେ ହାଜର ହୋଇ ନଥିଲେ । ଶେଷରେ ସିସିବି କୋର୍ଟରୁ ଗିରଫ ପରୱାନା ଆଣିଥିଲା । ଗତକାଲି ସେ ସିସିବି କାର୍ଯ୍ୟାଳୟକୁ ଯାଇଥିବା ବେଳେ ତାଙ୍କୁ ଗିରଫ କରାଯାଇଛି । ତେବେ ଚିହ୍ନା ପଡିବା ଭୟରେ ହେମା ମୁହଁରେ ବୁର୍ଖା ପିନ୍ଧିଥିବା ଦେଖିବାକୁ ମିଳିଥିଲା । 

ହେମାଙ୍କୁ ଗିରଫଦାରୀରୁ ରକ୍ଷା କରିବାକୁ ତେଲଙ୍ଗାନା ଓ ଆନ୍ଧ୍ରପ୍ରଦେଶର ବହୁ ପ୍ରଭାବଶାଳୀ ବ୍ୟକ୍ତି ଉଦ୍ୟମ କରିଥିଲେ । ଗତ ମେ ୧୯ ତାରିଖରେ ବେଙ୍ଗାଲୁରୁ ଇଲେକ୍ଟ୍ରୋନିକ ସିଟି ନିକଟ ଫାର୍ମ ହାଉସରେ ଜନ୍ମଦିନ ପାର୍ଟିର ଆୟୋଜନ କରାଯାଇଥିଲା । ଜନ୍ମଦିନ ପାର୍ଟି ନାମରେ ସେଠାରେ ନିଷିଦ୍ଧ ଡ୍ରଗ୍ସ ସେବନ କରାଯାଉଥିବା ଖବର ପାଇ ସିସିବିର ଆଣ୍ଟି-ନାର୍କୋଟିମ୍ସ ଟିମ୍‌ ଚଢ଼ାଉ କରି ୧୦୩ ଜଣଙ୍କୁ ଗିରଫ କରିଥିଲା । ସେମାନଙ୍କ ମଧ୍ୟରେ ୭୩ ପୁରୁଷ ଓ ୩୦ ଜଣ ମହିଳା ଥିଲେ । ହେମା ଓ ଅନ୍ୟତମ ଅଭିନେତ୍ରୀ ଆଶା ରାୟ ବି ସାମିଲ ଥିଲେ । ସେଠାରୁ ପୁଲିସ ୧.୫ କୋଟି ଟଙ୍କାର ନିଷିଦ୍ଧ ଡ୍ରଗ୍ସ ଜବତ କରିଥିଲା । ଗିରଫ ପରେ ସମସ୍ତଙ୍କର ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା । ସେଥିରୁ ହେମାଙ୍କ ସମେତ ୮୬ ଜଣ ଡ୍ରଗ୍ସ ସେବନ କରିଥିବାର ପ୍ରମାଣ ମିଳିଥିଲା ।