ମେକ୍ସିକୋ ସିଟି, ୦୪/୦୬: ମେକ୍ସିକୋର ୨ଶହ ବର୍ଷ ଇତିହାସରେ ପ୍ରଥମ ଥର ପାଇଁ କୌଣସି ମହିଳା ଭାବେ କ୍ଲାଉଡିଆ ଶେନ୍ବମ୍ ଦେଶର ରାଷ୍ଟ୍ରପତି ନିର୍ବାଚିତ ହୋଇଛନ୍ତି । ଜୁନ୍ ୨ରେ ହୋଇଥିବା ନିର୍ବାଚନରେ ଶାସକ ମୋରେନା ପାର୍ଟିର ୬୧ ବର୍ଷୀୟା ଶେନ୍ବମ୍ଙ୍କୁ ସବୁଠୁ ଅଧିକ ୫୮.୩% ଭୋଟ ମିଳିଛି । ରୋଚକ କଥା ହେଉଛି ତାଙ୍କ ବିପକ୍ଷରେ ବିରୋଧୀ ଦଳର ପ୍ରାର୍ଥୀ ମଧ୍ୟ ଜଣେ ମହିଳା ଥିଲେ । ବିରୋଧୀ ପ୍ରାର୍ଥୀ ଶୋଚିଲ ଗୋଲ୍ଭେଜ୍ ରାଷ୍ଟ୍ରପତି ଆଣ୍ଡ୍ରେସ୍ ମାନୁଏଲ ଲୋପେଜ୍ ଓବ୍ରାଡରଙ୍କ ନୀତିର ଘୋର ବିରୋଧୀ । ତେବେ ଶୋଚିଲଙ୍କୁ ମାତ୍ର ୨୮% ଭୋଟ ମିଳିଛି । ଶେନ୍ବମ୍ ଆସନ୍ତା ଅକ୍ଟୋବର ୧ରେ ତାଙ୍କ ମେଣ୍ଟର୍ ଓବ୍ରାଡରଙ୍କ ସ୍ଥାନ ନେବେ । ମେକ୍ସିକୋ ସମ୍ବିଧାନ ଅନୁସାରେ ଜଣେ ରାଷ୍ଟ୍ରପତିଙ୍କ କାର୍ଯ୍ୟକାଳ ୬ ବର୍ଷ ଏବଂ ଜଣେ ବ୍ୟକ୍ତି ଦ୍ୱିତୀୟ ଥର ଲାଗି ଏହି ପଦବୀରେ ରହିପାରିବେ ନାହିଁ । ତେବେ ଏହି ବିଜୟ କେବଳ ତାଙ୍କର ନୁହେଁ ବରଂ ସବୁ ମହିଳାଙ୍କର ବୋଲି ପୂର୍ବତନ ଶକ୍ତି ବିଜ୍ଞାନୀ ଶେନ୍ବମ୍ କହିଛନ୍ତି । ସେ ପୂର୍ବରୁ ମେକ୍ସିକୋ ସିଟିର ମେୟର ରହିଥିଲେ । ୨୦୦୭ରେ ମେକ୍ସିକୋର ଇଣ୍ଟର ଗଭର୍ନମେଣ୍ଟାଲ କମିଟିକୁ ନୋବେଲ ପୁରସ୍କାର ମିଳିଥିଲା । ସେତେବେଳେ ଶେନ୍ବମ୍ ଏହି କମିଟିର ସଦସ୍ୟ ଥିଲେ ।
ମେକ୍ସିକୋ ପଡ଼ୋଶୀ ଦେଶ ଆମେରିକାଠାରୁ ପ୍ରଥମେ ଜଣେ ମହିଳାଙ୍କୁ ରାଷ୍ଟ୍ରପତି ଭାବେ ନିର୍ବାଚିତ କରି ଇତିହାସ ରଚିଛି । ଆମେରିକାରେ ୧୯୨୦ରୁ ମହିଳାଙ୍କୁ ମତଦାନ ଅଧିକାର ରହିଥିବାବେଳେ ମେକ୍ସିକୋ ମହିଳାଙ୍କୁ ଏହି ଅଧିକାର ୧୯୫୩ରେ ମିଳିଥିଲା । ଏକ ଇହୁଦୀ ପରିବାରରେ ଜନ୍ମ ଶେନ୍ବମ୍ ଫିଜିକ୍ସ ଏବଂ ଏନର୍ଜୀ ଇଞ୍ଜିନିୟରିଂ ପାଠ ପଢ଼ିବା ସହ କାଲିଫର୍ଣ୍ଣିଆ ୟୁନିଭର୍ସିଟିରୁ ଡକ୍ଟରେଟ୍ କରିଛନ୍ତି । ସେ ୨୦୧୮ରେ ମେକ୍ସିକୋର ପ୍ରଥମ ମହିଳା ମେୟର ହୋଇଥିଲେ । ଅନ୍ୟପକ୍ଷରେ ମେକ୍ସିକୋର ଚଳିତ ନିର୍ବାଚନରେ ବେଶ୍ ହିଂସାପୂର୍ଣ୍ଣ ରହିଥିଲା । ରିପୋର୍ଟ ଅନୁସାରେ, ନିର୍ବାଚନୀ ହିଂସାରେ ଦେଶରେ ୨ ଶହରୁ ଊଦ୍ଧ୍ୱର୍ ଲୋକଙ୍କ ଜୀବନ ଯାଇଛି ।
