ନୂଆଦିଲ୍ଲୀ: ଭାରତର ଅପରେସନ ସିନ୍ଦୂରରେ ଜୈଶ-ଏ-ମହମ୍ମଦ (JeM) ମୁଖ୍ୟ ମାସୁଦ ଆଝାରର ଭାଇ ଅବଦୁଲ ରଉଫ ଆଝାରର ମୃତ୍ୟୁ ହୋଇଛି । ୨୦୦୦ ମସିହାରେ ଜେଇଏମ୍ ପ୍ରତିଷ୍ଠା କରିଥିଲା ଅବଦୁଲ ରଉଫ ଆଝାର। ଏହି ସମୟରେ ସେ ବିଶ୍ୱସ୍ତରୀୟ ଲୋକପ୍ରିୟତା ହାସଲ କରିଥିଲା । ସେ ୨୦୦୭ ମସିହାରେ ନିଷିଦ୍ଧ ଜେଇଏମ୍ର ମୁଖ୍ୟ ହୋଇଥିଲା। ପାକିସ୍ତାନର ବାହାୱାଲପୁରରେ ଭାରତର ଆକ୍ରମଣରେ ମାସୁଦ ଆଝାରଙ୍କ ପରିବାରର ୧୦ ଜଣ ସଦସ୍ୟ ଏବଂ ଚାରି ଜଣ ସହଯୋଗୀଙ୍କ ମୃତ୍ୟୁ ହୋଇଛି । ତେବେ ମାସୁଦ ଆଝାର ଦ୍ୱାରା ଜାରି ହୋଇଥିବା ଏକ ଚିଠିରେ ଦାବି କରାଯାଇଥିଲା ଯେ, ନିହତ ହୋଇଥିବା ଲୋକଙ୍କ ମଧ୍ୟରେ ତାର ଭଉଣୀ, ତାଙ୍କ ସ୍ୱାମୀ, ଭଣଜା, ଭଣିଜି ଏବଂ ଅନ୍ୟ ମାନେ ଥିଲେ।
ଡିସେମ୍ବର ୧୯୯୯ରେ, କାଠମାଣ୍ଡୁରୁ ଦିଲ୍ଲୀ ଯାଉଥିବା ଏକ ଇଣ୍ଡିଆନ୍ ଏୟାରଲାଇନ୍ସ ବିମାନ (IC-814)କୁ ଅପହରଣ କରି ତାଲିବାନ-ନିୟନ୍ତ୍ରିତ କନ୍ଦାହାରକୁ ନିଆଯିବା ଘଟଣାରେ ଆତଙ୍କବାଦୀ ଅବଦୁଲ ରଉଫ ଆଝାର ଆତଙ୍କୀ ମାନଚିତ୍ରରେ ନିଜର ଛାପ ସୃଷ୍ଟି କରିଥିଲା। ଜମ୍ମୁର କୋଟ ବଲୱାଲ ଜେଲରୁ ତାର ଭାଇ ମାସୁଦ ଆଝାରଙ୍କୁ ମୁକ୍ତ କରିବା ପାଇଁ ଏହି ଅପହରଣ ଯୋଜନା କରାଯାଇଥିଲା। ୨୦୧୦ ମସିହାରେ ଆମେରିକା ଦ୍ୱାରା ତାକୁ 'ବିଶ୍ୱ ଆତଙ୍କବାଦୀ' ଘୋଷଣା କରାଯାଇଥିଲା।
ଏହା ପରେ, ସେ ଭାରତ ଉପରେ ଆହୁରି ଅନେକ ଆକ୍ରମଣ ସଂଗଠିତ କରିଥିଲା ସେ । ଏଥିରେ ୨୦୦୧ ମସିହାରେ ଭାରତୀୟ ସଂସଦ ଆକ୍ରମଣ, ୨୦୦୫ ମସିହାରେ ଅସ୍ଥାୟୀ ଅଯୋଧ୍ୟା ରାମ ମନ୍ଦିର ଉପରେ ଆକ୍ରମଣ, ୨୦୧୬ ମସିହାରେ ଭାରତୀୟ ବାୟୁସେନାର ପଠାନକୋଟ ଘାଟି ଉପରେ ଆକ୍ରମଣ ଏବଂ ୨୦୧୯ ମସିହାରେ ପୁଲୱାମା ଆକ୍ରମଣ ଅନ୍ତର୍ଭୁକ୍ତ । ତେବେ ପୁଲଓ୍ବାମା ଆକ୍ରମଣରେ ୪୦ ଜଣ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (CRPF) କର୍ମଚାରୀ ପ୍ରାଣ ହରାଇଥିଲେ।
ପଠାନକୋଟ ଆକ୍ରମଣ ପରେ NIA ରଉଫ୍ ବିରୁଦ୍ଧରେ ଇଣ୍ଟରପୋଲରୁ ରେଡ୍ କର୍ଣ୍ଣର ନୋଟିସ୍ ମାଗିଥିଲା। ଏହି ବୈଶ୍ବିକ ସଂସ୍ଥା ଏକ ନୋଟିସ୍ ଜାରି କରି କହିଥିଲା ଯେ, ରାଉଫ୍ ଭାରତ ସରକାରଙ୍କ ବିରୁଦ୍ଧରେ ଯୁଦ୍ଧ କରିବା, ଯୁଦ୍ଧ କରିବାକୁ ଚେଷ୍ଟା କରିବା, କିମ୍ବା ଯୁଦ୍ଧ କରିବାକୁ ପ୍ରୋତ୍ସାହନ ଦେବା, ରାଷ୍ଟ୍ରପତି, ରାଜ୍ୟପାଳ ଇତ୍ୟାଦିଙ୍କୁ ଆକ୍ରମଣ କରିବା ପାଇଁ ଚାହୁଁଥିଲା ।
