ନୂଆଦିଲ୍ଲୀ,୧୮/୧୦: ୨୦୩୦ ସୁଦ୍ଧା ଭାରତ ହେବ ବିଶ୍ୱର ତୃତୀୟ ବୃହତ୍ ଅର୍ଥବ୍ୟବସ୍ଥା । କିନ୍ତୁ ବର୍ଦ୍ଧିତ ଜନସଂଖ୍ୟା ଅର୍ଥନୀତି ଆଗରେ ବଡ଼ ଆହ୍ୱାନ ବୋଲି ଏସ୍ ଆଣ୍ଡ୍ ପି ଗ୍ଲୋବାଲ ରେଟିଙ୍ଗ୍ସ ପକ୍ଷରୁ ଗୁରୁବାର ଜାରି ଏକ ରିପୋର୍ଟରେ ଉଲ୍ଲେଖ କରାଯାଇଛି ।
ଜନସଂଖ୍ୟା ବଢ଼ିବା ଦ୍ୱାରା ମୌଳିକ ସେବା କଭରେଜ୍ରେ ବାଧା ଉପୁଜିପାରେ । ଅର୍ଥାତ୍ ବଡ଼ ଭାଗ ଲୋକଙ୍କ ପାଖରେ ସେବା ପହଞ୍ଚାଇବା କଷ୍ଟକର ହୋଇପାରେ । ଏହାସହିତ ଉତ୍ପାଦକତା ବଢ଼ାଇବା ଲାଗି ନିବେଶ ଆବଶ୍ୟକତା ବଢ଼ିବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି ।
ରିପୋର୍ଟରେ ଉଲ୍ଲେଖ କରାଯାଇଛି ଯେ, ପରବର୍ତ୍ତୀ ଦଶନ୍ଧି ପାଇଁ ବିକାଶମୁଖୀ ଅର୍ଥନୀତିଗୁଡ଼ିକର ଉଚ୍ଚ ଅଭିଳାଷା ରହିଛି । ସମ୍ପ୍ରତି ଭାରତୀୟ ଅର୍ଥନୀତିର ଆକାର ୩.୬ ଟ୍ରିଲିୟନ ଡଲାର ହୋଇଥିବାବେଳେ ୨୦୪୭ ସୁଦ୍ଧା ଏହାକୁ ୩୦ ଟ୍ରିଲିୟନ ଡଲାରରେ ପହଞ୍ଚାଇବାକୁ ଭାରତ ଲକ୍ଷ୍ୟ ରଖିଛି । ସମ୍ପ୍ରତି ଭାରତ ବିଶ୍ୱର ପଞ୍ଚମ ବୃହତ୍ ଅର୍ଥନୀତି ରହିଛି ।
ଏସ୍ ଆଣ୍ଡ୍ ପି ଗ୍ଲୋବାଲ ପ୍ରକାଶ କରିଛି ଯେ, ଆଗାମୀ ୩ ବର୍ଷ ଧରି ଭାରତ ବିଶ୍ୱର ସବୁଠାରୁ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ମର୍ଯ୍ୟାଦା ଜାରି ରଖିବ । ୨୦୩୦ ସୁଦ୍ଧା ଏହା ହୋଇପାରେ ତୃତୀୟ ବୃହତ୍ ଅର୍ଥବ୍ୟବସ୍ଥା । ଜେପି ମୋର୍ଗାନ୍ର ଗଭର୍ଣ୍ଣମେଣ୍ଟ ଏମର୍ଜିଂ ମାର୍କେଟ ବଣ୍ଡ୍ ଇଣ୍ଡେକ୍ସରେ ସାମିଲ ହୋଇଛି ଭାରତ । ଫଳରେ ଏହା ବିପୁଳ ସଂଖ୍ୟାରେ ନିବେଶକଙ୍କୁ ଆକୃଷ୍ଟ କରିବ ବୋଲି ଏସ୍ ଆଣ୍ଡ୍ ପି ପ୍ରକାଶ କରିଛି ।
‘ଲୁକ୍ ଫର୍ୱାର୍ଡ ଏମର୍ଜିଂ ମାର୍କେଟ୍ସ:ଅ ଡିସିସିଭ୍ ଡିକେଡ୍’ ନାମକ ରିପୋର୍ଟରେ ଏସ୍ ଆଣ୍ଡ୍ ପି ପ୍ରକାଶ କରିଛି ଯେ, ଆଗାମୀ ଦଶନ୍ଧିରେ ବିଶ୍ୱ ଅର୍ଥନୀତିକୁ ଆକାର ଦେବାରେ ବିକାଶମୁଖୀ ରାଷ୍ଟ୍ରଗୁଡ଼ିକ ଉଲ୍ଲେଖନୀୟ ଭୂମିକା ଗ୍ରହଣ କରିବେ । ୨୦୩୫ ପର୍ଯ୍ୟନ୍ତ ଏହି ରାଷ୍ଟ୍ରଗୁଡ଼ିକର ହାରାହାରି ଜିଡିପି ଅଭିବୃଦ୍ଧି ୪.୦୬% ରହିବ । ଯାହାକି ବିକଶିତ ରାଷ୍ଟ୍ରଙ୍କ କ୍ଷେତ୍ରରେ ୧.୫୯% ରହିପାରେ ।
୨୦୩୫ ସୁଦ୍ଧା ବିକାଶମୁଖୀ ବଜାରଗୁଡ଼ିକ ବିଶ୍ୱ ଅର୍ଥନୈତିକ ଅଭିବୃଦ୍ଧିରେ ପ୍ରାୟ ୬୫% ଯୋଗଦାନ ଦେବେ । ଏଥିରେ ବୃହତ୍ ଭାଗ ଯୋଗଦାନ ଦେବେ ଭାରତ, ଚୀନ୍, ଭିଏତ୍ନାମ ଏବଂ ଫିଲିପାଇନ୍ସ । ୨୦୩୫ ସୁଦ୍ଧା ଇଣ୍ଡୋନେସିଆ ଏବଂ ବ୍ରାଜିଲ ଯଥାକ୍ରମେ ଅଷ୍ଟମ ଏବଂ ନବମ ବୃହତ୍ ଅର୍ଥବ୍ୟବସ୍ଥା ପାଲଟିବେ ବୋଲି ଏସ୍ ଆଣ୍ଡ୍ ପି ଗ୍ଲୋବାଲ ଏହାର ରିପୋର୍ଟରେ ଉଲ୍ଲେଖ କରିଛି ।
