ନୂଆଦିଲ୍ଲୀ: ବେଆଇନ ଭାବେ ଆମେରିକା ଆସିଥିବା ଜଣେ ଭାରତୀୟ ନାଗରିକଙ୍କ ମୃତ୍ୟୁ ହୋଇଛି । ସେ ଆଟଲାଣ୍ଟାରେ ମୃତ୍ୟୁ ବରଣ କରିଛନ୍ତି । ସଙ୍ଘୀୟ ଅଧିକାରୀ କହିଛନ୍ତି ଯେ, ମୃତ ବ୍ୟକ୍ତିଙ୍କୁ ଭାରତକୁ ପଠାଯିବାର ଥିଲା । ମୃତକଙ୍କ ପରିଚୟ ୫୭ ବର୍ଷିୟ ଜସପାଲ ସିଂ ବୋଲି ଜଣାପଡିଛି । ଆମେରିକାର ଇମିଗ୍ରେସନ୍ ଆଣ୍ଡ କଷ୍ଟମ୍ସ ଏନଫୋର୍ସମେଣ୍ଟ (ICE) ବିଭାଗ ଅନୁଯାୟୀ, ଜସପାଲ ସିଂଙ୍କ ମୃତ୍ୟୁ ସମ୍ପର୍କରେ ନ୍ୟୁୟର୍କରେ ଥିବା ଭାରତୀୟ ବାଣିଜ୍ୟ ଦୂତାବାସକୁ ସୂଚନା ଦିଆଯାଇଛି । ଏହା ସହିତ ମୃତକଙ୍କ ପରିବାର ସଦସ୍ୟଙ୍କୁ ମଧ୍ୟ ସୂଚନା ଦିଆଯାଇଛି ।
ଆଇସିଇ (ICE) କହିଛି ଯେ, ଏପ୍ରିଲ ୧୫ରେ ଆଟଲାଣ୍ଟା ଡାକ୍ତରଖାନାରେ ଜସପାଲ ସିଂଙ୍କର ମୃତ୍ୟୁ ଘଟିଛି । ମୃତ ଜସପାଲ ସିଂ ଅକ୍ଟୋବର ୨୫, ୧୯୯୨ ରେ ପ୍ରଥମ ଥର ପାଇଁ ଆମେରିକାରେ ଆଇନ ଅନୁଯାୟୀ ପ୍ରବେଶ କରିଥିଲେ । ଜାନୁୟାରୀ ୨୧, ୧୯୯୮ ରେ, ଜଣେ ଇମିଗ୍ରେସନ୍ ଜଜ୍ ସିଂଙ୍କୁ ଆମେରିକା ଛାଡିବାକୁ ନିର୍ଦ୍ଦେଶ ଦେଇଥିଲେ ଏବଂ ଏହା ପରେ ସେ ଭାରତ ଫେରିଥିଲେ ।
ଜସପାଲ ସିଂ ପୁଣିଥରେ ୨୯ ଜୁନ୍ ୨୦୨୩ରେ ବେଆଇନ ଭାବେ ଆମେରିକାରେ ପ୍ରବେଶ କରିବାକୁ ଚେଷ୍ଟା କରିଥିଲେ, କିନ୍ତୁ ଆମେରିକା-ମେକ୍ସିକୋ ସୀମାରେ କର୍ତ୍ତୃପକ୍ଷ ତାଙ୍କୁ ଧରିନେଇଥିଲେ । ବେଆଇନ ଭାବେ ଆମେରିକାରେ ପ୍ରବେଶ କରିଥିବାରୁ ତାଙ୍କୁ ଗିରଫ କରାଯାଇଥିଲା । ଗିରଫ ପରେ ତାଙ୍କୁ ଆଟଲାଣ୍ଟାର ଏନଫୋର୍ସମେଣ୍ଟ ଆଣ୍ଡ ରିମୁଭାଲ ଅପରେସନ୍ସ (ERO) କୁ ହସ୍ତାନ୍ତର କରାଯାଇଥିଲା । ତାଙ୍କୁ ଆଟଲାଣ୍ଟାର ଏକ ହେବାଜତ୍ କେନ୍ଦ୍ରରେ ରଖାଯାଇଥିଲା ।