ଯେଉଁମାନେ ମିଠାପ୍ରେମୀ, ସେମାନଙ୍କୁ ବିଭିନ୍ନ ଖାଦ୍ୟରେ ଚିନି ବ୍ୟବହାର କରିବା ଖୁବ୍ ପସନ୍ଦ । ହେଲେ ସ୍ୱାସ୍ଥ୍ୟ ପାଇଁ ଏହା ଉପକାରୀ ନୁହେଁ । ଚିନି ଦୈନିକ ହେଉ କିମ୍ବା ଆବଶ୍ୟକତା ଠାରୁ ଅଧିକ ମାତ୍ରାରେ ସେବନ କରିବା ଦ୍ୱାରା ମୋଟାପଣ, ମଧୁମେହ, ଉଚ୍ଚ କୋଲେଷ୍ଟ୍ରୋଲ୍, ହୃଦଘାତ ଜନିତ ରୋଗ ହେବାର ସମ୍ଭାବନା ଅଧିକ ଥାଏ । ମାତ୍ର ଆପଣ ହୁଏତ ଜାଣିନଥିବେ, ପ୍ରାୟ ୧ ମାସ ପର୍ଯ୍ୟନ୍ତ ଚିନି କିମ୍ବା ଚିନିରେ ପ୍ରସ୍ତୁତ ଜିନିଷ ନଖାଇବା ଦ୍ୱାରା ଶରୀରକୁ ଏସବୁ ଲାଭ ମିଳିଥାଏ ।
ଚିନିରେ କ୍ୟାଲୋରୀ ଅଧିକ ରହିଥାଏ। ଯାହା ଶରୀରକୁ କୌଣସି ପୋଷଣ ପ୍ରଦାନ କରିନଥାଏ। ଏହା କେବଳ ଶରୀରର ଓଜନ ବୃଦ୍ଧି କରିଥାଏ । ତେଣୁ ଏକ ମାସ ପର୍ଯ୍ୟନ୍ତ ଚିନି ସେବନ ନକଲେ କ୍ୟାଲୋରୀ ହ୍ରାସ ହୋଇଥାଏ। ଓଜନ ନିୟନ୍ତ୍ରଣ ହୋଇ ରହିଥାଏ । ବିଶେଷ କରି ପେଟ ଓ ଅଣ୍ଟାରେ ଜମାଟ ବାନ୍ଧୁଥିବା ଚର୍ବି ହ୍ରାସ ହୋଇଥାଏ।
ଚିନି ସେବନ ରକ୍ତରେ ଶର୍କରାର ମାତ୍ରାକୁ ଦ୍ରୁତ ଗତିରେ ବୃଦ୍ଧି କରିଥାଏ । ଫଳରେ ଶରୀରରେ ଇନ୍ସୁଲିନ୍ ସ୍ତର ସଠିକ୍ ରହିନଥାଏ । ଚିନି ନଖାଇବା ଦ୍ୱାରା ରକ୍ତରେ ଶର୍କରାର ମାତ୍ରା ସଠିକ୍ ରହିଥାଏ । ମଧୁମେହ ରୋଗୀଙ୍କ ପାଇଁ ଏହା ଲାଭଦାୟକ ହୋଇଥାଏ । ଚିନିର ସେବନ ଦ୍ୱାରା ତ୍ୱଚାରେ ବ୍ରଣ, ଦାଗ ଓ ସମୟ ପୂର୍ବରୁ ମୁହଁରେ କୁଞ୍ଚନ ହୋଇଥାଏ । ତ୍ୱଚାର କୋମଳତା ଓ ଚିକ୍କଣ ଅଂଶକୁ ଏହା ନଷ୍ଟ କରିଥାଏ । ୧ ମାସ ପର୍ଯ୍ୟନ୍ତ ଚିନି ନଖାଇବା ଦ୍ୱାରା ତ୍ୱଚା ସଫା, ଚମକପ୍ରଦ ଓ ସୁସ୍ଥ ରହିଥାଏ ।
ଚିନି ଖାଇବା ଦ୍ୱାରା ତୁରନ୍ତ ଶକ୍ତି ମିଳେ ମାତ୍ର କିଛି ସମୟ ପରେ ଥକ୍କାପଣ ଲାଗେ ଏବଂ କୌଣସି କାମ କରିବାକୁ ଆଗ୍ରହ ହୋଇନଥାଏ । ଏକାଗ୍ରତା କମ୍ ହୋଇଥାଏ । ଚିନିର ଅଧିକ ସେବନ କରିବା ଦ୍ୱାରା ହରମୋନ ଅସନ୍ତୁଳନ ହୋଇଥାଏ । ଯାହା ଫଳରେ ମାନସିକ ଚିନ୍ତା ଏବଂ ଚିନ୍ତାଧାରାରେ ପରିବର୍ତ୍ତନ ହୋଇଥାଏ । ଏହାର ପରିଣାମ ସ୍ୱରୂପ ରାତିରେ ଭଲ ନିଦ ହୋଇନଥାଏ । ଅନିଦ୍ରା ସମସ୍ୟା ଲାଗି ରହିଥାଏ । ଏକ ମାସ ପର୍ଯ୍ୟନ୍ତ ଚିନି ନଖାଇଲେ ଏ ସମସ୍ତ ସମସ୍ୟାରୁ ଆପଣ ମୁକ୍ତି ପାଇପାରିବ ।
