ଭୁବନେଶ୍ୱର,୧୩/୦୫: ଗତ ଦଶନ୍ଧିରେ ଅର୍ଥନୈତିକ ଅଭିବୃଦ୍ଧିରେ ଦେଶର ବିଭିନ୍ନ ରାଜ୍ୟ ଗୁଡ଼ିକ ମଧ୍ୟରେ ବଡ଼ ପାର୍ଥକ୍ୟ ରହିଛି । ଏଭଳି ସ୍ଥିତିରେ ଅର୍ଥନୀତିର ବିଭିନ୍ନ ମାନକକୁ ଦେଖିଲେ କର୍ଣ୍ଣାଟକ, ଓଡ଼ିଶା ଏବଂ ତେଲଙ୍ଗାନା ଭଳି ରାଜ୍ୟ ଗୁଡ଼ିକ ଟପ୍ ପରଫର୍ମର ଭାବେ ଉଭା ହୋଇଛନ୍ତି । ଗୁଜରାଟ ଏବଂ ଓଡ଼ିଶା ଶିଳ୍ପ ଭିତ୍ତିକ ଅଭିବୃଦ୍ଧି ଉପରେ ଏବେ ଫୋକସ କରିଛନ୍ତି । ଦଶନ୍ଧି ଧରି ଓଡ଼ିଶାର ଶିଳ୍ପ କ୍ଷେତ୍ର ବାର୍ଷିକ ୧୦% ହାରରେ ବଢ଼ିଛି । ଏ କ୍ଷେତ୍ରରେ ସବୁ ରାଜ୍ୟକୁ ପଛରେ ପକାଇ ଦେଇଥିବା ଇକ୍ରା ରିପୋର୍ଟରେ ପ୍ରକାଶ ପାଇଛି ।
ଆର୍ଥିକ ବର୍ଷ ୨୦୨୩-୨୪ରେ ରାଜ୍ୟ ଜିଡିପିରେ ଶିଳ୍ପର ଯୋଗଦାନ ୫୧% ଛୁଇଁଛି । ଏହା ମଧ୍ୟ ସାରା ଦେଶରେ ସର୍ବାଧିକ । ବିନିର୍ମାଣ କ୍ଷେତ୍ରରେ ଉଲ୍ଲେଖନୀୟ ଅଭିବୃଦ୍ଧି ଯୋଗୁ ଏହା ହୋଇପାରିଛି । ସ୍ଥାୟୀ ମୂଲ୍ୟକୁ ଦେଖିଲେ ମୋଟ ରାଜ୍ୟ ମୂଲ୍ୟ ସଂଯୋଗ (ଜିଏସ୍ଭିଏ) ଅଭିବୃଦ୍ଧି ୭% । ଏ କ୍ଷେତ୍ରରେ ଓଡ଼ିଶା ଦ୍ୱିତୀୟ ସ୍ଥାନରେ ରହିଛି । ଏହି ସମୟରେ ଜାତୀୟ ଅର୍ଥନୀତି ୫.୮% ହାରରେ ବଢ଼ିଛି । ଅର୍ଥାତ ଓଡ଼ିଶାର ପ୍ରଦର୍ଶନ ଜାତୀୟ ସ୍ତର ଠାରୁ ଉନ୍ନତ । ରାଜ୍ୟ ସରକାର ଓଡ଼ିଶାକୁ ନିବେଶର ଏକ ପ୍ରମୁଖ ସ୍ଥଳ ଭାବେ ଗଢ଼ି ତୋଳିବାକୁ ନିରନ୍ତର ଉଦ୍ୟମ କରୁଛନ୍ତି । ମେକ୍ ଇନ୍ ଓଡିଶା ଭଳି ନିବେଶକ ସମ୍ମିଳନୀ ଏବଂ ଶିଳ୍ପ ବାତାବରଣକୁ ଉନ୍ନତ କରିବା ଦିଗରେ ବ୍ୟାପକ କାର୍ଯ୍ୟକ୍ରମ ଗ୍ରହଣ କରାଯାଉଛି । ନିରନ୍ତର ଶିଳ୍ପ ଅଭିବୃଦ୍ଧି କେବଳ ରାଜ୍ୟର ରୁପାନ୍ତରଣରେ ସହାୟକ ହେଉନି । ଏହା ରାଜ୍ୟବାସୀଙ୍କ ଲାଗି ସମୃଦ୍ଧି ଏବଂ ନୂଆ ସମ୍ଭାବନା ଆଣିବାରେ ସହାୟକ ହେଉଛି ।
୨୦୧୪-୧୫ରୁ ୨୦୨୪-୨୫ ଡାଟାକୁ ଦେଖିଲେ କର୍ଣ୍ଣାଟକର ମୋଟ ରାଜ୍ୟ ମୂଲ୍ୟ ସଂଯୋଗ (ଜିଏସ୍ଭିଏ) ବାର୍ଷିକ ସର୍ବାଧିକ ୭.୫% ହାରରେ ବଢ଼ିଛି । ୧୯ ରାଜ୍ୟ ମଧ୍ୟରେ ଏହା ଦ୍ରୁତ ଅଭିବୃଦ୍ଧିଶୀଳ ରାଜ୍ୟ ଭାବେ ଉଭା ହୋଇଛି । ସେବା କ୍ଷେତ୍ରର ଆଖିଦୃଶିଆ ଅଭିବୃଦ୍ଧି ଯୋଗୁ କର୍ଣ୍ଣାଟକ ଏହି ସଫଳତା ପାଇଛି । ଏହି ଅବଧିରେ କର୍ଣ୍ଣାଟକର ସେବା କ୍ଷେତ୍ର ୮.୩% ବଢ଼ିଛି । ରିୟଲ ଇଷ୍ଟେଟ, ବ୍ୟକ୍ତିଗତ ସେବା ଭଳି କ୍ଷେତ୍ରର ଅଭିବୃଦ୍ଧି ଯୋଗୁ ରାଜ୍ୟ ଏଭଳି ସଫଳତା ପାଇଛି ।
ଆର୍ଥିକ ବର୍ଷ ୨୦୨୩-୨୩ରେ ଦେଶର ଅର୍ଥନୀତିରେ ସେବା କ୍ଷେତ୍ରରେ ଅଂଶ ୫୫% ଥିବା ବେଳେ ଶିଳ୍ପ ୩୧% ଏବଂ କୃଷିର ଅଂଶ ୧୫% ରହିଥିଲା । ରାଜ୍ୟ ଗୁଡ଼ିକୁ ଦେଖିଲେ ବିଭିନ୍ନ କ୍ଷେତ୍ରରେ ଏହି ତାରତମ୍ୟ ଭିନ୍ନ ରହିଛି । ମଧ୍ୟପ୍ରଦେଶର ରାଜ୍ୟ ଅର୍ଥନୀତିକୁ କୃଷି କ୍ଷେତ୍ରର ଅଂଶ ୩୩% ରହିଛି । ଯାହା ରାଜ୍ୟ ଗୁଡ଼ିକ ମଧ୍ୟ ସର୍ବାଧିକ ।
ସେହିଭଳି କର୍ଣ୍ଣାଟକର ରାଜ୍ୟ ଜିଡିପିରେ ସେବା କ୍ଷେତ୍ରର ଅଂଶ ୬୬% । ଏହା ଅନ୍ୟ କୌଣସି ରାଜ୍ୟ ତୁଳନାରେ ସର୍ବାଧିକ । ଆନ୍ଧ୍ରପ୍ରଦେଶର କୃଷି ଉତ୍ପାଦନ ସର୍ବାଧିକ ୭.୨% ରହିଛି । ମାଛ ଏବଂ ଜଳ ସମ୍ପଦ କ୍ଷେତ୍ରରେ ଦୃଢ଼ ପରଫରମାନ୍ସ ଏହି ରାଜ୍ୟରେ ରହିଛି । ୨୦୨୩-୨୪ରେ ମୁଣ୍ଡପିଛା ଆୟ କ୍ଷେତ୍ରରେ ରାଜ୍ୟ ଗୁଡ଼ିକ ମଧ୍ୟରେ ତେଲଙ୍ଗାନା, କର୍ଣ୍ଣାଟକ ଏବଂ ତାମିଲନାଡୁ ଆଗରେ ରହିଛନ୍ତି । ପୂର୍ବରୁ ଶୀର୍ଷ ତାଲିକାରେ ଥିବା ହରିଆଣା, ଉତ୍ତରାଖଣ୍ଡ ଏବଂ କେରଳକୁ ଏମାନେ ପଛରେ ପକାଇ ଦେଇଛନ୍ତି ।
