ନୂଆଦିଲ୍ଲୀ,୧୯/୦୩: ମହାକାଶରୁ ୯ ମାସ ପରେ ପୃଥିବୀକୁ ଫେରିଛନ୍ତି ସୁନୀତା ୱିଲିୟମ୍ସ । ଫ୍ଲୋରିଡା ତଟରେ କ୍ରୁ-୯ ମିଶନର ଡ୍ରାଗନ ମହାକାଶଯାନର ସଫଳ ଅବତରଣ ପରେ ସୁରକ୍ଷିତ ଫେରିଛନ୍ତି ସୁନୀତା ୱିଲିୟମ୍ସ ଓ ତାଙ୍କ ଟିମ୍ । ଆଇସିସିରୁ ୧୭ ଘଣ୍ଟା ଯାତ୍ରା ପରେ ଘରକୁ ଫେରିଛନ୍ତି ସୁନୀତା । ଭାରତୀୟ ସମୟ ମଙ୍ଗଳବାର ଭୋର ୩ଟା ୨୭ ମିନିଟରେ ଫ୍ଲୋରିଡା ସମୁଦ୍ର ତଟରେ ଅବତରଣ କରିଥିଲେ ସୁନୀତା ଓ ବୁଚ୍ ୱିଲମୋର । ଜାଣିଛନ୍ତି କି ସୁନୀତାଙ୍କ ଫେରିବା ବେଳେ ବିପଦ ଉପୁଜିଥିଲା । ଏମିକି ଏକ ସମୟ ଆସିଥିଲା ନାସା ବୈଜ୍ଞାନିକ ଚିନ୍ତାରେ ପଡି ଯାଇଥିଲେ ।
କଳ୍ପନା ଚାୱାଲାଙ୍କ ସମୟରେ ଯାହା ହୋଇଥିଲା ସେମିତି କିଛି ସ୍ଥିତି ସୃଷ୍ଟି ହୋଇଥିଲା । ୭ ମିନିଟ୍ ଯାଏ ମହାକାଶଯାନ ଡ୍ରାଗନ୍ କ୍ୟାପସୁଲ ସହ କୌଣସି ସମ୍ପର୍କ ହୋଇପାରି ନଥିଲା । କମ୍ୟୁନିକେସନ ବ୍ଲାକଆଉଟ ହୋଇଥିଲା । ହେଲେ ଅନ୍ତରୀକ୍ଷ ଯୁଦ୍ଧରେ ଜିିତି ସୁରକ୍ଷିତ ଫେରିଛନ୍ତି ସାହସୀ ସୁନୀତା । ଆଷ୍ଟ୍ରୋନଟଙ୍କୁ ନେଇ ଆସୁଥିବା ଏୟାରକ୍ରାଫ୍ଟ ଯେମିତି ବାୟୁମଣ୍ଡଳରେ ପ୍ରବେଶ କରିଥିଲା ତାପମାତ୍ରା ୧୬୦୦ଡିଗ୍ରୀ ସେଲସିୟସରୁ ଅଧିକ ଥିଲା । ସେହି ସମୟ ଥିଲା ଯେବେ ୭ ମିନିଟ୍ କମ୍ୟୁନିକେସନ ବ୍ଲାକଆଉଟ ହୋଇଥିଲା । ଅନ୍ତରୀକ୍ଷ ଏଜେନ୍ସିଂଙ୍କର ସ୍ପେସକ୍ରାଫ୍ଟ ସହ କନେକ୍ଟ ହୋଇପାରିନଥିଲା । ୭ମିନିଟ୍ ପରେ ଅର୍ଥାତ୍ ୩ଟା ୨୦ମିନିଟରେ ଯୋଗାଯୋଗ ହୋଇଥିଲା ।
କାହିଁକି ମହତ୍ତ୍ବପୂର୍ଣ୍ଣ ହୋଇଥାଏ ବ୍ଲାକଆଉଟ ସମୟ ? ବ୍ଲାକଆଉଟ ସମୟରେ ଯଦି ତାପମାତ୍ରା ବହୁତ ଅଧିକ ହୁଏ ତେବେ ସ୍ପେସକ୍ରାଫ୍ଟ କ୍ରାଶ୍ ହେବାର ସମ୍ଭାବନା ବଢିଯାଏ । ଏମିତି ପୂର୍ବରୁ ହୋଇ ସାରିଛି । ୨୦୦୩ ଫେବୃଆରୀ ୧ରେ ସ୍ପେସକ୍ରାଫ୍ଟ କଲୋମ୍ବିଆ ଏହି କାରଣରୁ ଦୁର୍ଘଟଣାର ଶିକାର ହୋଇଥିଲା । ଯେଉଁଥିରେ ଭାରତୀୟ ବଂଶୋଦ୍ଭବ କଳ୍ପନା ଚାୱାଲାଙ୍କର ମୃତ୍ୟୁ ହୋଇଥିଲା ।
ଅଧିକ ପଢନ୍ତୁ...ଖୁବଶୀଘ୍ର ଭାରତ ଆସିବେ ସୁନୀତା ୱିଲିୟମ୍ସ,ସୂଚନା ଦେଲେ ସମ୍ପର୍କୀୟ ଭଉଣୀ
କମ୍ୟୁନିକେସନ ବ୍ଲାକଆଉଟ୍ କଣ ? ମହାକାଶରୁ ଯେବେ ସ୍ପେସକ୍ରାଫ୍ଟ ପୃଥିବୀର ବାୟୁମଣ୍ଡଳରେ ପ୍ରବେଶ କରିଥାଏ । ତାର ସ୍ପିଡ୍ ଘଣ୍ଟାପ୍ରତି ପାଖାପାଖି ୨୮ ହଜାର କିମି ଥାଏ । ଏହି ସ୍ପିଡରେ ଯେବେ କ୍ୟାପସୁଲ ଖସେ ତେବେ ବାୟୁମଣ୍ଡଳ ସହ ଘର୍ଷଣ ହୋଇଥାଏ । ଏହି ସମୟରେ ତାପମାତ୍ରା ବଢିଯାଏ । ସ୍ପେସକ୍ରାଫ୍ଟର ମିଶନ କଣ୍ଟ୍ରୋଲ ସହ ସମ୍ପର୍କ ତୁଟି ଯାଏ । ଏହାକୁ କମ୍ୟୁନିକେସନ ବ୍ଲାକଆଉଟ୍ କୁହାଯାଏ । ଏହି ଚ୍ୟାଲେଞ୍ଜକୁ ପାର କରି ସୁନୀତାଙ୍କ ସମେତ ୪ ମହାକାଶଚାରୀ ସୁରକ୍ଷିତ ପୃଥିବୀରେ ପହଞ୍ଚିଛନ୍ତି ।
