ନୂଆଦିଲ୍ଲୀ ୦୯/୧୦: ଚଳିତ ବର୍ଷ ଫିଜିକ୍ସ ବା ପଦାର୍ଥ ବିଜ୍ଞାନରେ ନୋବେଲ ପୁରସ୍କାର ପାଇଛନ୍ତି ପ୍ରଫେସର ଜେଫ୍ରି ହିଣ୍ଟନ୍ ଓ ପ୍ରଫେସର ଜନ୍ ହପ୍ଫିଲ୍ଡ । ମେସିନ୍ ଲର୍ନିଂ କ୍ଷେତ୍ରରେ ନୂଆ ମାର୍ଗ ଖୋଲିବା ପାଇଁ ହିଣ୍ଟନ୍ଙ୍କୁ ଏଆଇ (ଆର୍ଟିଫିସିଆଲ ଇଣ୍ଟେଲିଜେନ୍ସ)ର ଗଡ୍ଫାଦର କୁହାଯାଏ । ତେବେ ନୋବେଲ ପୁରସ୍କାର ଗ୍ରହଣ କରିବା ପରେ ସେ ଏଆଇର ବଡ଼ ବିପଦ ବିଷୟରେ ଚେତାବନୀ ଦେଇଛନ୍ତି । ପୁରସ୍କାର ଘୋଷଣା ପରେ କନ୍ଫରେନ୍ସ କଲ୍ ଜରିଆରେ ହିଣ୍ଟନ୍ ଏଆଇ ଟେକ୍ନୋଲୋଜିର ଦ୍ରୁତ ବିକାଶ ଉପରେ ଗମ୍ଭୀର ଚିନ୍ତା ବ୍ୟକ୍ତ କରିଥିଲେ ।
ସେ ଚେତାବନୀ ଦେଇ କହିଥିଲେ ‘ଏଆଇର କୁପରିଣାମ ବିଷୟରେ ଆମକୁ ଚିନ୍ତା କରିବା ଆବଶ୍ୟକ । ଏଆଇ ବିକାଶ ସହ ଜଡ଼ିତ ସମ୍ଭାବ୍ୟ ବିପଦ ଉପରେ ଆଲୋକପାତ ଲାଗି ସେ ଗୁରୁତ୍ୱାରୋପ କରିଥିଲେ । ଅନ୍ୟତମ ନୋବେଲ ବିଜେତା ଜନ୍ ହପ୍ଫିଲ୍ଡ କହିଛନ୍ତି, ଏଆଇ ସିଷ୍ଟମ୍ର ଶକ୍ତି ଅସାଧାରଣ ହାରରେ ବୃଦ୍ଧିପାଉଛି । ହିଣ୍ଟନ୍ କହିଛନ୍ତି, ଔଦ୍ୟୋଗିକ ବିପ୍ଳବ ଭଳି ଏଆଇର ବ୍ୟାପକ ପ୍ରଭାବ ପଡ଼ିବ । ଶାରୀରିକ ସାମର୍ଥ୍ୟ ବୃଦ୍ଧି ବଦଳରେ ଏହା ଲୋକଙ୍କ ବୌଦ୍ଧିକ ସାମର୍ଥ୍ୟ ବଢ଼ାଇବ । ଯାହା ଆମଠୁ ଅଧିକ ବୁଦ୍ଧିମାନ, ସେଭଳି ବସ୍ତୁ ବିଷୟରେ ଆମର କୌଣସି ଅନୁଭବ ନାହିଁ । ଏହା ଆମକୁ ଉତ୍ତମ ସ୍ୱାସ୍ଥ୍ୟସେବା ଦେଇପାରେ ଏବଂ ଅଧିକ ଦକ୍ଷ କରିପାରେ । ଉତ୍ପାଦକତାରେ ଏହା ବ୍ୟାପକ ଉନ୍ନତି କରିପାରେ । କିନ୍ତୁ ଆମକୁ ଏହାର କୁପରିଣାମ ବିଷୟରେ ଚିନ୍ତା କରିବା ଆବଶ୍ୟକ, ଖାସ୍କରି ନିୟନ୍ତ୍ରଣ ବାହାରକୁ ଯାଉଥିବା ବସ୍ତୁଗୁଡ଼ିକର ବିପଦ ପ୍ରତି ।
ବୈଷୟିକ ପ୍ରଗତିର ଦୋହରା ପ୍ରକୃତି ଉପରେ ହିଣ୍ଟନ୍ ଆଲୋକପାତ କରିଛନ୍ତି । ସ୍ୱାସ୍ଥ୍ୟସେବା, ବୈଜ୍ଞାନିକ ଅନୁସନ୍ଧାନ ଏବଂ ଜଳବାୟୁ ପରିବର୍ତ୍ତନ ହ୍ରାସ ଭଳି ବିଭିନ୍ନ କ୍ଷେତ୍ରରେ ଏଆଇର ବ୍ୟାପକ ଲାଭକୁ ସ୍ୱୀକାର କରିବା ସହିତ ଏହାର ଅପବ୍ୟବହାର ଓ ଅପ୍ରତ୍ୟାଶିତ ପରିଣାମକୁ ନେଇ ସଚେତନ ରହିବା ଉପରେ ମଧ୍ୟ ସେ ଗୁରୁତ୍ୱ ଦେଇଛନ୍ତି । ସମାଜର ବିଭିନ୍ନ କ୍ଷେତ୍ରରେ ଏଆଇ ଟେକ୍ନୋଲୋଜି ବ୍ୟାପକ ରୂପେ ପ୍ରବେଶ କରୁଥିବା ଏକ ଜଟିଳ ସମୟରେ ନୋବେଲ ବିଜେତା ହିଣ୍ଟନ୍ଙ୍କ ଏହି ଚେତାବନୀ ବିଶ୍ୱବାସୀଙ୍କୁ ଚିନ୍ତାରେ ପକାଇଛି । ଏଆଇ କ୍ଷେତ୍ରରେ ନୈତିକତା ବିଚାର ଓ ଦାୟିତ୍ୱପୂର୍ଣ୍ଣ ବିଚାର ଉପରେ ସେ ଗୁରୁତ୍ୱ ଦେଇଛନ୍ତି । ଏ ଦିଗରେ ସୁରକ୍ଷା ଲାଗି ସେ ବୈଜ୍ଞାନିକ, ନୀତିନିର୍ମାତା ଓ ଉଦ୍ୟୋଗୀମାନଙ୍କର ମିଳିତ ସହଯୋଗ ଲୋଡ଼ିଛନ୍ତି । ଏଆଇକୁ ନେଇ ହିଣ୍ଟନ୍ଙ୍କ ଚିନ୍ତା ଏବେ ଉନ୍ନତ ଏଆଇ ସିଷ୍ଟମ୍ର କାର୍ଯ୍ୟକାରିତାକୁ ନେଇ ବୈଜ୍ଞାନିକ ସମୁଦାୟ ସମେତ ଅନ୍ୟ ସମୁଦାୟରେ ବିତର୍କର ବିଷୟ ହୋଇଛି ।
