ଭୁବନେଶ୍ୱର, ୦୨/ ୧୦: ଠିକ୍ ୧୯୯୯ ରାସ୍ତାରେ ୨୦୨୪ର ପାଣିପାଗ । ସେ ବର୍ଷ ଏପ୍ରିଲରେ ଭୀଷଣ ଗ୍ରୀଷ୍ମ ଲହରି ଅନୁଭୂତ ହୋଇଥିଲା । ଏ ବର୍ଷ ବି ସ୍ଥିତି ସେମିତି ଥିଲା । ଖାଲି ସେତିକି ନୁହେଁ, ୧୯୯୭ ଓ ୧୯୯୮ରେ ଶକ୍ତିଶାଳୀ ଏଲ୍-ନିନୋ ପ୍ରଭାବ ପରେ ୧୯୯୯ରେ ଆସିଥିଲା ଲା-ନିନା । ଏଥର ବି ଏଲ୍- ନିନୋ ପରେ ଲା-ନିନା ଆଗମନର ସମ୍ଭାବନା ରହିଛି । ଯଦି ଲା-ନିନା ଆସିଲା, ବଢ଼ିଯାଇପାରେ ବାତ୍ୟା ସମ୍ଭାବନା । ଭାରତୀୟ ପାଣିପାଗ ବିଭାଗ (ଆଇଏମ୍ଡି) ପକ୍ଷରୁ ଆଜି ଜାରି ହୋଇଥିବା ପୂର୍ବାନୁମାନ ଅନୁସାରେ ଅକ୍ଟୋବରରେ ଗରମ ଅଧିକ ହେବ, ବର୍ଷା ବି । ଦିନ ତାପମାତ୍ରା ରାଜ୍ୟରେ ଅଧିକ ରହିବ, ରାତିରେ ବି ସ୍ୱାଭାବିକଠାରୁ ଢେର ଅଧିକ ହେବ ଗରମ । ଅକ୍ଟୋବରରୁ ଡିସେମ୍ବର ପର୍ଯ୍ୟନ୍ତ ରାଜ୍ୟରେ ବର୍ଷା ସ୍ୱାଭାବିକଠାରୁ ଅଧିକ ରହିପାରେ ।
ଅକ୍ଟୋବରର ତାପମାତ୍ରା ଅଧିକ ରହିବା ବାତ୍ୟା ପାଇଁ ଅନୁକୂଳ ବାତାବରଣ ଆଣିପାରେ । ବିଶେଷଜ୍ଞଙ୍କ କହିବାନୁସାରେ ବାୟୁମଣ୍ଡଳରେ ଅତ୍ୟଧିକ ଗରମ ଓ ଗୁଳୁଗୁଳି ରହୁଥିବାବେଳେ ସମୁଦ୍ର ଜଳପତ୍ତନ ତାପମାତ୍ରା ଅଧିକ ରହୁଛି । ଅକ୍ଟୋବରକୁ ନେଇ ପାଣିପାଗ ବିଭାଗର ପୂର୍ବାନୁମାନ ହେଲା- ଏ ମାସରେ ବର୍ଷା ଅଧିକ ହେବ, କିନ୍ତୁ ତାପମାତ୍ରା ବି ସ୍ୱାଭାବିକଠାରୁ ଅଧିକ ରହିବ । ଏସବୁ ଦିଗକୁ ଗମ୍ଭୀରତା ସହ ବିଶ୍ଳେଷଣ କରୁଛନ୍ତି ପାଣିପାଗ ବୈଜ୍ଞାନିକ । ମନରେ ଆଶଙ୍କା ଉଙ୍କି ମାରୁଛି- ୧୯୯୯ ଭଳି କିଛି ହେବ କି? ଅକ୍ଟୋବର କିମ୍ବା ନଭେମ୍ବର ମାଡ଼ ହେବ କି ବାତ୍ୟା? ସ୍ପଷ୍ଟ ଭାବେ ଏବେଠାରୁଆକଳନ କରିବା ସମ୍ଭବପର ନୁହେଁ । କିନ୍ତୁ, ପାଣିପାଗର ପାରିପାଶ୍ୱିର୍କ ସ୍ଥିତି ଯାହା ରହିଛି, ତାହା ବାତ୍ୟା ସୃଷ୍ଟି ହେବା ପାଇଁ ଅନୁକୂଳ ବାତାବରଣ । ଅକ୍ଟୋବର ଆସିଲା । ବାତ୍ୟା ଆସିବ କି? ପ୍ରତିବର୍ଷ ଅକ୍ଟୋବର ଆସିଲେ ଓଡ଼ିଶା ଭଳି ପ୍ରାକୃତିକ ବିପର୍ଯ୍ୟୟ ରାଜ୍ୟକୁ ଏହି ଭୟ ଘାରିଥାଏ । ବିଶେଷଜ୍ଞଙ୍କ କହିବାନୁସାରେ ଏ ବର୍ଷ ବାତ୍ୟା ହେବ କି ନାହିଁ, ତାହା ଏବେଠାରୁ କହି ହେବନି । ମାତ୍ର ୧୯୯୯ ଭଳି ସ୍ଥିତି ଏ ବର୍ଷ ଅନୁଭୂତ ହେଉଛି । ୧୯୯୯ରେ ଏପ୍ରିଲରେ ରେକର୍ଡ ଭାଙ୍ଗିଲା ଭଳି ତାତି, ଅଗଷ୍ଟରେ ନିଅଣ୍ଟିଆ ବର୍ଷା ଥିବାବେଳେ ସେପ୍ଟେମ୍ବରରେ ଅଧିକ ବର୍ଷା ହୋଇଥିଲା । ଏ ବର୍ଷ ସ୍ଥିତି ପ୍ରାୟ ସେଇଆ । ୧୯୯୯ ଭଳି ଏ ବର୍ଷ ବି ଲା-ନିନା ଆସିପାରେ । ଯଦି ଏହା ଅକ୍ଟୋବରରେ ଆସିଲା, ତେବେ ବାତ୍ୟା ସମ୍ଭାବନା ଅଧିକ । କାରଣ ଲା-ନିନା ହେଲେ ଦକ୍ଷିଣ ଚୀନ ସାଗରରେ ତାପମାତ୍ରା ଅଧିକ ରହିବ । ଫଳରେ ବାତ୍ୟା ସୃଷ୍ଟି ପାଇଁ ପାଗ ଅନୁକୂଳ ହେବ । ସେଠାରେ ସୃଷ୍ଟି ହେଉଥିବା ବାତ୍ୟାର ଅବଶିଷ୍ଟାଂଶ ବଙ୍ଗୋପସାଗର ମୁହାଁ ହୋଇ ବଳ ବଢ଼ାଇ ପୁଣି ବାତ୍ୟା ରୂପ ନେବାର ସମ୍ଭାବନା ରହୁଛି ।
କୃଷି ପାଣିପାଗ ବୈଜ୍ଞାନିକ ପ୍ରଫେସର ସୁରେନ୍ଦ୍ରନାଥ ପଶୁପାଳକଙ୍କ କହିବାନୁସାରେ ବାତ୍ୟା ନେଇ ଏବେଠାରୁ କିଛି ଆକଳନ କରି ହେବନି । ମାତ୍ର ପାରିପାଶ୍ୱିର୍କ ସ୍ଥିତି ଏଭଳି ସମ୍ଭାବନା ନେଇ ସଙ୍କେତ ଦେଖାଉଛି । ଚଳିତ ବର୍ଷ ଅକ୍ଟୋବର, ନଭେମ୍ବର, ଡିସେମ୍ବର, ଜାନୁଆରୀରେ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ । ଅକ୍ଟୋବର ମାସରେ ବର୍ଷା ବି ସ୍ୱାଭାବିକଠାରୁ ଅଧିକ ରହିବ, ତାପମାତ୍ରା ବି । ବାତ୍ୟା ହେବ କି ନାହିଁ, ଏବେଠାରୁ ଆକଳନ କରି ହେବନି । ମାତ୍ର ବାତ୍ୟା ଦାନା ବାନ୍ଧିବା ପାଇଁ ଯେଉଁଭଳି ପାଣିପାଗ ଆବଶ୍ୟକ, ସେଭଳି ବାତାବରଣ ରହିଛି । ସମୁଦ୍ର ଜଳପତ୍ତନ ତାପମାତ୍ରା ୨୬.୫ ଡିଗ୍ରୀ ସେଲସିୟସ୍ ଟପିଲେ ଲଘୁଚାପ ଦାନା ବାନ୍ଧିପାରେ । ବର୍ତ୍ତମାନ ସମୁଦ୍ର ଜଳପତ୍ତନ ତାପମାତ୍ରା ୨୯/୩୦ ଡିଗ୍ରୀ ପାଖାପାଖି ରହୁଛି । ତାପମାତ୍ରା ସହ ଆର୍ଦ୍ରତା ବି ଅଧିକ ଅଛି । ଯଦି ଏ ବର୍ଷ ବାତ୍ୟା ସୃଷ୍ଟି ହୁଏ, ତା’ର ପ୍ରଭାବ ବ୍ୟାପକ ରହିବା ସହ ଏହା ଶୀଘ୍ର ଘନୀଭୂତ ହେବା ସମ୍ଭାବନା ଅଛି । ବିଶିଷ୍ଟ ପାଣିପାଗ ବୈଜ୍ଞାନିକ ଡକ୍ଟର ଶରତ ଚନ୍ଦ୍ର ସାହୁ କହିଛନ୍ତି, ଅକ୍ଟୋବରରେ ତାପମାତ୍ରା ୩୭ ଡିଗ୍ରୀ ସେଲସିୟସ୍ ଛୁଇଁଲାଣି । ଏହା ସ୍ୱାଭାବିକ ନୁହେଁ । ଅର୍ଥାତ୍ ଅସ୍ୱାଭାବିକ ଗରମ ସ୍ଥିତି ରହିଛି । ସମୁଦ୍ର ତାପମାତ୍ରା ୩୦ ଡିଗ୍ରୀ ପାଖାପାଖି ରହୁଛି । ଏଭଳି ପାଗ ବାତ୍ୟା ସୃଷ୍ଟି ପାଇଁ ଅନୁକୂଳ ହେବା ସହ ଏକ ସଙ୍କେତ ଦେଇଥାଏ । ମାତ୍ର ବାତ୍ୟା ହେବ ବୋଲି ଏବେଠାରୁ କହି ହେବନି ।
