ଭୁବନେଶ୍ୱର,୦୫/୦୪: ଅପରାଧ ଘଟାଇ ଯଦି କୌଣସି କିନ୍ନର ଗିରଫ ହେଉଛନ୍ତି ତା’ହେଲେ ତାଙ୍କୁ ରଖିବାକୁ ଜେଲ୍ରେ ଜାଗା ନାହିଁ । କଥାଟି ଆଶ୍ଚର୍ଯ୍ୟ ଲାଗିଲେ ବି ସତ । ରାଜ୍ୟରେ ଥିବା ୮୭ଟି ଜେଲ୍ରୁ ୮୪ଟିରେ କିନ୍ନର ରହିବାର କୌଣସି କ୍ଷମତା ନଥିବା ରିପୋର୍ଟ କହୁଛି। ସେମାନଙ୍କୁ ରଖିବାକୁ ଜେଲ୍ କର୍ତ୍ତୃପକ୍ଷ ନାକେଦମ୍ ହେଉଛନ୍ତି ।
ସରକାରୀ ତଥ୍ୟ କହୁଛି, ରାଜ୍ୟର ୯୧ଟି ଜେଲ୍ ମଧ୍ୟରୁ ଏବେ ୮୭ଟି କାର୍ଯ୍ୟକ୍ଷମ । ଏ ସବୁ ଜେଲ୍ରେ ୨୪ ହଜାର ୧୯୬ ଜଣ କଏଦୀ ରହିବାର କ୍ଷମତା ରହିଛି । ୨୨ ହଜାର ୨୨୯ ଜଣ ପୁରୁଷ, ୧୯୩୭ ମହିଳା ଓ ୩୦ ଜଣ କିନ୍ନର ଉକ୍ତ ଜେଲ୍ରେ ରହିପାରିବେ । ରାଉରକେଲା ସ୍ପେଶାଲ୍ ଜେଲ୍ରେ ୧୦ ଜଣ, ଚୌଦ୍ୱାର ମଣ୍ଡଳ ଜେଲ୍ରେ ୧୦ ଓ ବ୍ରହ୍ମପୁର ମଣ୍ଡଳ ଜେଲ୍ରେ ୧୦ ଜଣ କିନ୍ନର ରହିବାର ବ୍ୟବସ୍ଥା ରହିଛି । ସେମାନଙ୍କ ପାଇଁ ସ୍ୱତନ୍ତ୍ର ୱାର୍ଡ ଓ ପାଇଖାନାର ବ୍ୟବସ୍ଥା ହୋଇଛି ।
୩ଟି ଜେଲ୍ରେ ମାର୍ଚ୍ଚ ଶେଷ ସୁଦ୍ଧା ୨ ଜଣ କିନ୍ନର ଅଛନ୍ତି । ବାକି କୌଣସି ଜେଲ୍ରେ କିନ୍ନରଙ୍କ ପାଇଁ କୌଣସି ସ୍ୱତନ୍ତ୍ର ୱାର୍ଡ କିମ୍ବା ପାଇଖାନା ନାହିଁ । ଏବେ ବିଭିନ୍ନ ଜେଲ୍ରେ ୧୧ ଜଣ କିନ୍ନର ବନ୍ଦୀ ଅଛନ୍ତି । ଝାରପଡ଼ା ଜେଲ୍ରେ ୩ ଜଣ, ଭବାନୀପାଟଣା ଜିଲ୍ଲା ଜେଲ୍ ଓ ବଲାଙ୍ଗିର ଜେଲ୍ରେ ଜଣେ ଲେଖାଏ ବିଚାରାଧୀନ କିନ୍ନର ଅଛନ୍ତି । ସେମାନେ ପୁରୁଷଙ୍କ ପାଇଖାନା ବ୍ୟବହାର କରୁଛନ୍ତି । ବଡ଼ କଥା ହେଲା ସେମାନେ ଯେତେବେଳେ ଜେଲ୍କୁ ଯାଉଛନ୍ତି ତାଙ୍କୁ ଯାଞ୍ଚ କରିବା କାଠିକର ପାଠ ହେଉଛି ।
ଏବେ କିଛି ଜେଲ୍ରେ କ୍ଷମତା ଠାରୁ ଅଧିକ କଏଦୀ ରହୁଛନ୍ତି । ସବୁଠାରୁ ଆଗରେ ରହିଛି ଝାରପଡ଼ା ଜେଲ୍ । ଏଠାରେ ୯୯୧ ଜଣ କଏଦୀ ରହିବାର କ୍ଷମତା ରହିଛି । ୯୫୩ ଜଣ ପୁରୁଷ, ୩୮ ଜଣ ମହିଳା ରହିବାର ବ୍ୟବସ୍ଥା ଥିବାବେଳେ କିନ୍ନରଙ୍କ ପାଇଁ କୌଣସି ଜାଗା ନାହିଁ । ବର୍ତ୍ତମାନ ଏଠାରେ କ୍ଷମତା ଠାରୁ ଅଧିକ କଏଦୀ ଅଛନ୍ତି । ୯୬୯ ଜଣ ପୁରୁଷ, ୪୦ ଜଣ ମହିଳା ଓ ୩ ଜଣ କିନ୍ନରଙ୍କୁ ମିଶାଇ ମୋଟ ୧୦୧୧ ଜଣ କଏଦୀ ରହୁଛନ୍ତି । ସେହିପରି ଭଦ୍ରକ ଜେଲ୍ରେ ୨୦୩ ଜଣ କଏଦୀ ରହିବାର ବ୍ୟବସ୍ଥା ଥିଲାବେଳେ ରହୁଛନ୍ତି ୨୫୬ ଜଣ। ବଲାଙ୍ଗିର ଜିଲ୍ଳା ଜେଲ୍ରେ ୩୯୨ ଜଣ କଏଦୀ ରହିପାରିବେ । ହେଲେ ଏବେ ୪୭୭ ଜଣ ରହୁଛନ୍ତି ।
ଏ ସମ୍ପର୍କରେ ଜେଲ୍ ଡିଆଇଜି କହିଛନ୍ତି, ଯେଉଁଠାରେ ନୂଆ ଜେଲ୍ ତିଆରି ଚାଲିଛି ସେଠାରେ ମହିଳା, ପୁରୁଷଙ୍କ ସହ କିନ୍ନରମାନଙ୍କ ପାଇଁ ସ୍ୱତନ୍ତ୍ର ୱାର୍ଡ ହେଉଛି । ସେମାନଙ୍କ ପାଇଁ ଅଲଗା ପାଇଖାନା ବ୍ୟବସ୍ଥା ମଧ୍ୟ ହେଉଛି । ପ୍ରଥମ ପର୍ଯ୍ୟାୟରେ ପ୍ରମୁଖ ଜେଲ୍ରେ କିନ୍ନରମାନଙ୍କ ପାଇଁ ସବୁ ବ୍ୟବସ୍ଥା କରିବା ଲାଗି ସରକାରଙ୍କୁ ପ୍ରସ୍ତାବ ଦିଆଯାଇଛି । ଏହା ଖୁବ୍ ଶୀଘ୍ର କାର୍ଯ୍ୟକାରୀ ହେବ ।
