ଦାରିଙ୍ଗବାଡ଼ି, ୨୭/୪: ଚଳିତ ବର୍ଷ ବ୍ରାହ୍ମଣୀଗାଁ ବନାଞ୍ଚଳରେ ଜଙ୍ଗଲରେ ନିଆଁକୁ ଆୟତ୍ତ କରିବାକୁ ବିଭିନ୍ନ ଉଦ୍ୟମ କରାଯାଉଛି । ୧୦୭ଟି ଗାଁ ମହିଳା, ସ୍ଵୟଂ ସହାୟକ ଗୋଷ୍ଠୀ, ବନ ସଂରକ୍ଷଣ ସମିତି, ଶିକ୍ଷାନୁଷ୍ଠାନ ସମେତ ବିଭିନ୍ନ ଅନୁଷ୍ଠାନରେ ୧୦୩ ଗୋଟି ବୈଠକ ଆୟୋଜନ କରାଯାଇଛି । ବୈଠକରେ ଲୋକମାନଙ୍କୁ ନିଆଁ ନଲଗାଇବା ପାଇଁ କୁହାଯାଇଥିବା ବେଳେ ଲାଗିଥିବା ନିଆଁକୁ ଲିଭାଇବା ପାଇଁ ସଚେତନ କରାଯାଇଥିଲା । ନିଆଁକୁ ରୋକିବାକୁ ବନାଞ୍ଚଳ କାର୍ଯ୍ୟାଳୟରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ନମ୍ବରକୁ ସାର୍ବଜନୀନ କରାଯାଇଛି ।
ନିଆଁକୁ ଆୟତ୍ତ କରିବା ପାଇଁ ୧୦ ଟି ଫାୟାର ସ୍କ୍ୱାର୍ଡ, ୧୫ ଗୋଟି ପ୍ରୋଟେକ୍ସନ ସ୍କ୍ୱାର୍ଡ, ୧୫ ଜଣ ୱାଚର ରହିଥିବା ବେଳେ ୮ ଜଣ ବିଭାଗୀୟ ଅଧିକାରୀଙ୍କୁ ନେଇ ୮ ଗୋଟି ଟିମ୍ କରାଯାଇ ୩ ଟି ଅସ୍ଥାୟୀ ଫାୟାର କ୍ୟାମ୍ପଙ୍କୁ ନିୟୋଜିତ କରାଯାଇଛି । ଜଙ୍ଗଲ ନିଆଁ ଉପରେ ୨୪ ଘଣ୍ଟିଆ ନଜର ରଖାଯାଇଥିବା ବନାଞ୍ଚଳ ଅଧିକାରୀ ହରିହର ବେହେରା ସୂଚନା ଦେଇଛନ୍ତି । ବନ ବିଭାଗର ସଚେତନ ଓ ପୂର୍ବ ପ୍ରସ୍ତୁତି ଫଳରେ ବିଗତ ବର୍ଷ ଏପ୍ରିଲ ଶେଷ ସୁଦ୍ଧା ୨୬୭ ଗୋଟି ଫାୟାର ପଏଣ୍ଟ ରହିଥିବା ବେଳେ ଚଳିତ ବର୍ଷ ଏପ୍ରିଲ ଶେଷ ସୁଦ୍ଧା ୯୭ ଗୋଟି ଫାୟାର ପଏଣ୍ଟ ରହିଛି । ଗତ ବର୍ଷ ତୁଳନାରେ ଚଳିତ ବର୍ଷ ୧୭୦ ଟି ଫାୟାର ପଏଣ୍ଟ ହ୍ରାସ ପାଇଛି । ବନ ବିଭାଗର ଅକ୍ଲାନ୍ତ ପରିଶ୍ରମ ଓ ସ୍ଥାନୀୟ ଲୋକଙ୍କ ସଚେତନ ଓ ନିଆଁ ଲିଭାରେ ସହଯୋଗ ଯୋଗୁଁ ଚଳିତ ବର୍ଷ ସଫଳତାର ସହ ନିଆଁକୁ ଆୟତ୍ତ କରାଯାଇପାରୁଛି ବୋଲି ଅଧିକାରୀ ମତପ୍ରକାଶ କରିଛନ୍ତି ।