ଜଗତସିଂହପୁର,୨୬/୦୭(ସିଦ୍ଧାର୍ଥ ଦାସ): ପୁଲିସର ଶୃଙ୍ଖଳିତ ଶାସନ ବ୍ୟବସ୍ଥା ଭିତରେ ଅବ୍ୟବସ୍ଥା ଧଶେଇ ପଶିଛି । ତୃତୀୟ ପକ୍ଷର ହୁକୁମ ଜାରିକୁ ନେଇ କୌତୂହଳ ପ୍ରକାଶ ପାଇଛି । ଏଭଳି ଅଘୋଷିତ ଫତୁଆ ଭବିଷ୍ୟତରେ ଥାନାଗୁଡ଼ିକରେ ଅଚଳାବସ୍ଥାକୁ ଟାଣି ଆଣିବାର ଯଥେଷ୍ଟ ସମ୍ଭାବନା ମଧ୍ୟ । ଥାନାଧିକାରୀମାନେ ମଧ୍ୟ ସାଧାରଣ ଜନତାଙ୍କ ପ୍ରଶ୍ନର ଉତ୍ତର ରଖିବାକୁ ଯାଇ ଶୂନ୍ୟକୁ ହାତ ଟେକି ଦେବାକୁ ଚିନ୍ତା କରିବେ । ଯାହାକି ଏବେ ଭାଇରାଲ୍ ହୋଇଥିବା ଏକ ଅଡିଓ ବାରି ହୋଇଯାଇଛି ।
ଖାସ୍ କରି ବର୍ତ୍ତମାନ ରାଜ୍ୟର ଅନେକ ଥାନାରେ ଚାରିଚକିଆ ଗାଡ଼ି ସଙ୍କଟ ଦେଖାଦେଇଛି । ନୂଆ ସ୍କର୍ପିଓ ପ୍ରଦାନ ପରେ ଗୋଟିଏ କରି ପୁରୁଣା ଚଳନକ୍ଷମ ଗାଡ଼ିକୁ ଅଧିକାଂଶ ଥାନାରୁ ହଟାଇ ନିଆଯାଇଛି । ଏଣେ ଯୋଗାଣ ହୋଇଥିବା ନୂତନ ସ୍କର୍ପିଓ ରାସ୍ତାରେ ଗଡ଼ିବା ନେଇ ଯେଉଁ ନୀତି ନିୟମ ରଖାଯାଇଛି ତାହାହିଁ ଥାନାଧିକାରୀଙ୍କ ମୁଣ୍ଡରେ ଚଡ଼କ ପକାଇଛି । ଆଉ ଭାଇରାଲ୍ ଅଡିଓ ଅଧିକାଂଶ ପୁଲିସ ବାବୁଙ୍କ ମୁଣ୍ଡ ବିନ୍ଧାକୁ ବଢାଇ ଦେଇଛି । ଉକ୍ତ ଅଡିଓର ପ୍ରାରମ୍ଭରୁ କେହି ଜଣେ ଜୟ ଜଗନ୍ନାଥ ଉଚ୍ଚାରଣ ସହ କଟକ-ଭୁବନେଶ୍ୱର ପୁଲିସ କମିଶନରେଟ୍ର ଗାଡ଼ି ଚାଳକଙ୍କୁ ଅଭିନନ୍ଦନ ଜଣାଇଛନ୍ତି । ତତ୍ସହିତ ଚାଳକଙ୍କ ପାଖରେ ଅତିଶୀଘ୍ର ବେତନ ପହଞ୍ଚିବ ବୋଲି ଜଣାଇଛନ୍ତି । ଏତଦ୍ଭିନ୍ନ ୨୦୦୦ କିମି ପରେ ଆଉ ଗାଡ଼ି ଗଡ଼ିବନି ବୋଲି ନିର୍ଦ୍ଦେଶ ଦିଆଯାଉଛି । ଯଦି କୌଣସି ଚାଳକ ଏହାକୁ ଉଲ୍ଲଂଘନ କରନ୍ତି ତା’ହେଲେ ସେମାନଙ୍କ ଦରମାରୁ ଏହାକୁ ଭରଣା କରାଯିବ । ଅର୍ଥାତ ଥାନାଧିକାରୀଙ୍କ କଥାରେ ଯଦି କୌଣସି ଚାଳକ ୨୦୦୦(ମାସକୁ ୨୦୦ ଲିଟର ତେଲ) କିମିକୁ ଅତିକ୍ରମ କରି ଗାଡ଼ି ଚଳାଇବେ ତା’ହେଲେ ପ୍ରତି କିମି ପିଛା ୧୫ ଟଙ୍କା ସେମାନଙ୍କ ଦରମାରୁ କଟାଯିବ । ଯଦି କୌଣସି ଥାନାଧିକାରୀ ଏକ୍ଷେତ୍ରରେ ଚାପ ପକାଉଛନ୍ତି ତା’ହେଲେ ସେମାନଙ୍କୁ ପ୍ରଥମେ ବୁଝାନ୍ତୁ ଏବଂ ଅଧିକ କିମି ଗାଡ଼ି ଯଦି ଗଡ଼ିବ ସେ ସଂକ୍ରାନ୍ତରେ ଡିସିପି, କମିଶନର, ରାଜ୍ୟ ପୁଲିସ ମହାନିର୍ଦ୍ଦେଶକ କିମ୍ବା ଗୃହ ବିଭାଗକୁ ଜଣାନ୍ତୁ ବୋଲି ପରାମର୍ଶ ଦିଆଯାଇଛି । ଏବିଷୟରେ ଜଣାଇବାରେ କିଛି ଅସୁବିଧା ନାହିଁ । ତା’ଛଡ଼ା ୨୦୦୦ କିମି ଗଡ଼ିବା ପରେ ଗାଡ଼ିକୁ ରଖିଦେବେ । ଡ୍ୟୁଟି କିନ୍ତୁ ପ୍ରତିଦିନ ହେବ । ଚାଳକମାନେ ଥାନାକୁ ଯାଇ ଗାଡ଼ିକୁ ଧୋଇବେ, ପୋଛିବେ, ଝାଡ଼ିବେ । କାର୍ଯ୍ୟରେ ଖିଲାଫ ହେବ ନାହିଁ । ଘରକୁ ମଧ୍ୟ ମନଇଚ୍ଛା ଯାଇପାରିବେ ନାହିଁ ବୋଲି ଚାଳକଙ୍କ ଉଦ୍ଦେଶ୍ୟରେ ଉକ୍ତ ଅଡିଓ ବାର୍ତ୍ତା ଜରିଆରେ ସ୍ପଷ୍ଟ କରାଯାଇଛି ।
ସିଧାସଳଖ କହିବାକୁ ଗଲେ ଉକ୍ତ ଗାଡ଼ିଟି ୨୦୦୦ କିମି ପର୍ଯ୍ୟନ୍ତ ଥାନାଧିକାରୀଙ୍କ ନିୟନ୍ତ୍ରଣରେ ରହିବ । ତା’ପରେ ଚାଳକ ମାନେ ବସିକି ପୋଷା ହେବେ । ଏଣେ ଭଡ଼ାସୂତ୍ରରେ ଥିବା ଉକ୍ତ ଗାଡ଼ି ଏବଂ ବାହାର ଚାଳକଙ୍କୁ ବିଶ୍ୱାସକୁ ନେଇ ଥାନାଧିକାରୀ କିମ୍ବା ଥାନାର ଅନ୍ୟ ଅଫିସରମାନେ ଗୁପ୍ତ ଚଢ଼ଉ କରିବା ନେଇ ପ୍ରଶ୍ନ ଉଠିବା ମଧ୍ୟ ଆରମ୍ଭ ହୋଇଛି । ଅପରପକ୍ଷେ ଦେଖିଲେ ସରକାରଙ୍କ ଗୃହ ବିଭାଗ ପକ୍ଷରୁ ୨୦୨୪ ମସିହା ଡିସେମ୍ବର ୨୧ ତାରିଖ ଚିଠି ସଂଖ୍ୟା ୪୮୧୫୦ରେ ପ୍ରତି ଥାନାକୁ ଅତିରିକ୍ତ ଚାରି ଚକିଆ ଗାଡ଼ି ଭାବେ ସ୍କର୍ପିଓ ଯୋଗାଣ ହେବ ବୋଲି ସ୍ପଷ୍ଟ କରାଯାଇଥିଲା । ମୋଟ ଉପରେ ୬୪୯ ସ୍କର୍ପିଓ ଭଡ଼ା ସୂତ୍ରରେ ଥାନାମାନଙ୍କୁ ପଠାଯିବାର ବ୍ୟବସ୍ଥା ହୋଇଥିବା ଉକ୍ତ ଚିଠିରେ ଉଲ୍ଲେଖ ରହିଛି । ବର୍ତ୍ତମାନ ସମୟରେ ରାଜ୍ୟର ପ୍ରାୟ ସମସ୍ତ ଥାନାରେ ସ୍କର୍ପିଓ ପହଞ୍ଚିଯାଇଛି । ଆଶ୍ଚର୍ଯ୍ୟ, ଅତିରିକ୍ତ ଭାବେ ସ୍କର୍ପିଓ ଯୋଗାଣ ପରେ ଅନେକ ଥାନାରେ ଚାଲୁଥିବା ଗୋଟିଏ କରି ପୁରୁଣା ଚାରି ଚକିଆ ଯାନକୁ ପୁଲିସ ପ୍ରଶାସନ ପକ୍ଷରୁ ଅପସାରିତ କରି ନିଆଯାଇଛି ।
ବର୍ତ୍ତମାନ ସମୟରେ ପୁଲିସ ଉପରେ କାର୍ଯ୍ୟଚାପ ଲଦି ହୋଇଯାଇଛି । ଧାରଣା, ସଭା ଆଦିରେ ମୁତୟନକୁ ଛାଡ଼ି ପୁଲିସ ଏବେ ପ୍ରାୟତଃ ଜମି ମାପଚୁପରେ ଛିଡ଼ା ହେଲେଣି । ଏଣେ କିନ୍ତୁ ନୂତନ ସ୍କର୍ପିଓ କେବଳ ୨୦୦୦ କିମି ପର୍ଯ୍ୟନ୍ତ ଦୌଡ଼ିବ । ଏମିତି ହିସାବ ରଖି ପୁଲିସ ଚାଲିପାରିବ କି? ଅନୁରୂପ ଭାବେ ରାଜ୍ୟର ଅନେକ ଥାନାରେ ବାର୍ଷିକ ପଞ୍ଜିକୃତ ମାମଲା ସଂଖ୍ୟା ହଜାରେ ଉପରକୁ ଟପି ଯାଉଛି । ଏସବୁ ଥାନା ଅଧୀନରେ ଫାଣ୍ଡି ରହୁଛି । ଏବେଯାଏ ୧୦ଟି ପଞ୍ଚାୟତ ପରିକ୍ରମା କରୁଥିବା ଫାଣ୍ଡିକୁ ମଧ୍ୟ ଚାରିଚକିଆ ଗାଡ଼ି ଉପଳବ୍ଧ କରାଯାଇ ନାହିଁ । ଆହୁରି ବିସ୍ମୟ, ଯେଉଁ ଥାନା ପରିସୀମାରେ ଦୁଇଟି କିମ୍ବା ତଦୁଦ୍ଧ୍ୱର୍ ପଞ୍ଚାୟତ ରହିଛି ସେଠି ବି ୨୦୦୦ କିମି ଧରି ସ୍କର୍ପିଓ ଧାଇଁବ ଏବଂ ଯେଉଁ ଥାନା ଇଲାକାରେ ୩୦ଟି ପଞ୍ଚାୟତ ରହୁଛି ସେଠି ବି ଏହି ନିୟମ ରଖାଯାଇଛି । ତେବେ ମୁଖ୍ୟ ଥାନା ଗୁଡ଼ିକରେ ସ୍କର୍ପିଓ ଗାଡ଼ିର ଦୌଡ଼ିବା ଉପରେ କଟକଣା ଆଗାମୀ ଦିନରେ ପୁଲିସ ଶାସନକୁ ପଙ୍ଗୁ କରିଦେବାର ସନ୍ଦେହ ।
ତେବେ କମିଶନରେଟ ପୁଲିସର ଜଣେ ବରିଷ୍ଠ ଅଧିକାରୀ କହିଛନ୍ତି, ନୂଆ ସ୍କର୍ପିଓ ସହିତ ପୂର୍ବରୁ ପୁରୁଣା ଗାଡ଼ି ମଧ୍ୟ ବ୍ୟବହାର ପାଇଁ ରଖାଯାଇଛି ।ଯଦି ଗ୍ରାମାଞ୍ଚଳ ଥାନାରୁ ପୁରୁଣା ଗାଡ଼ି କଢ଼ାଯାଇଥିବା ତେବେ ତାହା ଭୁଲ୍ ନିଷ୍ପତ୍ତି । ପୂର୍ବରୁ ଥାନା ଗାଡ଼ିକୁ ମାସିକ ୨୫୦ ଲିଟର ତେଲ ମିଳୁଥିଲା । ଆବଶ୍ୟକ ପଡ଼ିଲେ ଅଧିକ ତେଲ ମିଳୁଥିଲା । ୨୫୦ ଲିଟରରେ ପ୍ରତି ଥାନା ଗାଡ଼ି ୩୨୫୦ କି.ମି. ଦୌଡ଼ୁଥିଲା। ବର୍ତ୍ତମାନ କେସସଂଖ୍ୟା ଯେତିକି ସ୍କର୍ପିଓ ପାଇଁ ଅଧିକ ତେଲ ଆବଶ୍ୟକ ।
