ଭୁବନେଶ୍ୱର,୦୩/୦୪: ୨୦୨୪ ମାର୍ଚ୍ଚ ୩୧ ସୁଦ୍ଧା ଓଡ଼ିଶା ଉପରେ ମୋଟ ୧,୨୨,୮୩୭ କୋଟିର ଋଣ ରହିଛି । ଏହା ରାଜ୍ୟର ମୋଟ ଘରୋଇ ଉତ୍ପାଦ (ଜିଏସ୍ଡିପି)ର ୧୪.୩୯% । ତେବେ ଗତ ୫ ବର୍ଷରେ ଜିଏସ୍ଡିପି ହିସାବକୁ ନେଲେ ବକେୟା ଋଣ ବୋଝ ୧୩.୩୯% ରୁ ୨୩.୪୬% ମଧ୍ୟରେ ରହିଛି, ଯାହା ରିଜର୍ଭ ବ୍ୟାଙ୍କର ବିତ୍ତୀୟ ଉତ୍ତରଦାୟିତ୍ୱ ଏବଂ ବଜେଟ ପରିଚାଳନା (ଏଫ୍ଆର୍ବିଏମ୍) ଆଇନରେ ଧାର୍ଯ୍ୟ କରାଯାଇଥିବା ୨୫% ଧାର୍ଯ୍ୟ ଲକ୍ଷ୍ୟଠାରୁ କମ୍ । ଏହାକୁ ଦେଖିଲେ ରାଜ୍ୟ ଋଣ ପରିଚାଳନାରେ ପାରଦର୍ଶିତା ଦେଖାଇଛି । ୨୦୨୩-୨୪ ଆର୍ôଥକ ବର୍ଷ ପାଇଁ ଭାରତର ମହାଲେଖା ନିୟନ୍ତ୍ରକ ଏବଂ ମହାସମୀକ୍ଷକ (ସିଏଜି) ଜାରି କରିଥିବା ରିପୋର୍ଟରୁ ଏହା ଜଣାପଡିଛି ।
ରିପୋର୍ଟ ମୁତାବକ,ଆର୍ôଥକ ବର୍ଷ ୨୦୨୨-୨୩ରେ ରାଜ୍ୟର ଋଣ ୧.୦୧ ଲକ୍ଷ କୋଟି ଟଙ୍କା ଥିବା ବେଳେ ୨୦୨୩- ୨୪ ଅବଧିରେ ଏହା ୨୧,୧୩୫ କୋଟି (୨୦.୭୮%) ବଢ଼ିଛି । ୨୦୧୯-୨୦ରେ ରାଜ୍ୟ ଉପରେ ୧.୨୬ ଲକ୍ଷ କୋଟିର ଋଣ ରହିଥିଲା । ଯାହା ରାଜ୍ୟ ଜିଡିପିର ୨୩.୪୬% ଥିଲା । ଏହା ୨୦୨୦-୨୧ରେ ୧.୧୮ ଲକ୍ଷ କୋଟି, ୨୦୨୧-୨୨ରେ ୧.୦୯ ଲକ୍ଷ କୋଟି ଏବଂ ୨୦୨୨-୨୩ରେ ୧.୦୧ ଲକ୍ଷ କୋଟି ଥିଲା । ଏହି ଆର୍ଥିକ ବର୍ଷଗୁଡ଼ିକରେ ଋଣ ପରିମାଣ ମୋଟ ଜିଡିପିର ଯଥାକ୍ରମେ ୨୨.୦୨%, ୧୫.୭୭% ଏବଂ ୧୩.୩୯% ଥିଲା ।
୨୦୦୪-୦୫ରେ ଓଡ଼ିଶା ରାଜସ୍ୱ ବଳକା ସ୍ଥିତି ହାସଲ କରିଥିଲା । ସେହିଦିନଠାରୁ ରାଜ୍ୟ କ୍ରମାଗତ ଭାବେ ଏହି ସ୍ଥିତି ବଜାୟ ରଖିଛି । ୨୦୨୩-୨୪ରେ ରାଜସ୍ୱ ବଳକା ପରିମାଣ ୩୦,୭୧୬ କୋଟି ଟଙ୍କା ଥିଲା । ୨୦୨୩-୨୪ରେ ରାଜ୍ୟର ବିତ୍ତୀୟ ନିୟଣ୍ଟ ୧୪,୭୪୩ କୋଟି ଟଙ୍କା ଥିଲା । ଯାହା ଜିଏସ୍ଡିପିର ୧.୭୩% ଏବଂ ରାଜ୍ୟ ଏଫ୍ଆର୍ବିଏମ୍ ଅଧିନିୟମ ଦ୍ୱାରା ଧାର୍ଯ୍ୟ ଲକ୍ଷ୍ୟ ମଧ୍ୟରେ ଥିଲା । ଏହି ଅବଧିରେ ରାଜ୍ୟର ପ୍ରାଥମିକ ନିଅଣ୍ଟ ୯୫୬୨ କୋଟି ଥିଲା ଯାହା ଜିଏସ୍ଡିପିର ୧.୧୨% । ଯାହାକି ରାଜ୍ୟ ଏଫ୍ଆର୍ବିଏମ୍ ଆକ୍ଟରେ ସ୍ଥିର ହୋଇଥିବା ଜିଏସ୍ଡିପିର ୨% ଲକ୍ଷ୍ୟକୁ ଅତିକ୍ରମ କରିଥିଲା ।
ରାଜ୍ୟର ମୋଟ ଋଣ ମଧ୍ୟରେ ୫୦,୯୮୫ କୋଟି ଟଙ୍କା (୪୧.୫୧%) ଆଭ୍ୟନ୍ତରୀଣ ସୂତ୍ରରୁ ରହିଥିବା ବେଳେ କେନ୍ଦ୍ର ସରକାରଙ୍କ ଠାରୁ ୧୧,୫୫୬ କୋଟି (୯.୪%) ଏବଂ ପବ୍ଲିକ ଆକାଉଣ୍ଟସ ଲାଏବିଲିଟି ୬୦,୨୯୬ କୋଟି (୪୯.୦୯% ) ରହିଛି । ୨୦୨୩-୨୪ର ସରକାର ନେଇଥିବା ୨୧,୧୩୭ କୋଟି ଋଣ ମଧ୍ୟରେ ଏସ୍ଆଇଡିବିଆଇ ସମୁହ ବିକାଶ ପାଣ୍ଠିରୁ ୧୦୮.୬୦ କୋଟି, ସିଏଏମ୍ପିଏରୁ ୪୧୪୫ କୋଟି, ଓଏମ୍ବିଏଡିସିରୁ ୫୪୬୦ କୋଟି ଏବଂ ନାବାର୍ଡରୁ ୪୧୦୬ କୋଟିର ଋଣ ସାମିଲ ରହିଛି ।
୨୦୨୩ ଏପ୍ରିଲ ପହିଲା ସୁଦ୍ଧା ବକେୟା ବଜାର ଋଣ ପରିମାଣ ୨୧,୦୫୮ କୋଟି ଟଙ୍କା ଥିଲା । ୨୦୨୧-୨୨ ଓ ୨୦୨୨-୨୩ ଆର୍ଥିକ ବର୍ଷରେ ରାଜ୍ୟ ସରକାର କୌଣସି ନୂତନ ବଜାର ଋଣ ନେଇନାହାନ୍ତି । ତେବେ ୨୦୨୩-୨୪ ଆର୍ଥିକ ବର୍ଷରେ ସରକାର ବଜାରରୁ ୧.୨୫ କୋଟିର ଋଣ ନେଇଛନ୍ତି । ସେହିଭଳି ସରକାର ମୋଟ ୪୬୫୮ କୋଟିର ବଜାର ଋଣ ପରିଶୋଧ କରିଛନ୍ତି । ଫଳରେ ୧୬,୪୦୧ କୋଟିର ବକେୟା ବଜାର ଋଣ ବାକି ରହିଛି ।
୨୦୧୯-୨୦ରୁ ୨୦୨୩-୨୪ ଆର୍ôଥକ ବର୍ଷ ଅବଧିରେ ସରକାରୀ ଋଣ ୫୮୯୭ କୋଟି (୮.୬୨%)ହ୍ରାସ ପାଇଥିବା ବେଳେ ଆଭ୍ୟନ୍ତରୀଣ ଋଣ ୯୬୧୦ କୋଟି (୧୫.୮୬%) କେନ୍ଦ୍ର ସରକାରଙ୍କ ଋଣ ୩୭୧୩ କୋଟି (୪୭.୩୪%) ବୃଦ୍ଧି ହୋଇଛି । ଏହି ସମୟ ମଧ୍ୟରେ ସାର୍ବଜନୀନ ଖାତା ଆର୍ଥିକ ବୋଝ ୨୬୫୦ କୋଟି (୪.୬୦%) ବୃଦ୍ଧି ହୋଇଛି । ସିଏଜି ସୁପାରିଶରେ କହିଛନ୍ତି ଯେ, ରାଜ୍ୟ ସରକାର ଅନୁଦାନ ଦ୍ୱାରା ଅନ୍ତର୍ଭୁକ୍ତ ଖର୍ଚ୍ଚର ପୁନଃ ମୂଲ୍ୟାୟନ କରିବା ଆବଶ୍ୟକ ।
ସେହିଭଳି ବଜେଟ ପ୍ରସ୍ତୁତି ଏବଂ ବ୍ୟୟ ପ୍ରଣୟନରେ ଉପଯୁକ୍ତି ସଂଶୋଧନ ପଦକ୍ଷେପ ଗ୍ରହଣ କରିବା ଉଚିତ । ରାଜ୍ୟ ଏଫ୍ଆର୍ବିଏମ୍ ନିୟମ ଅନୁସାରେ ପ୍ରାଥମିକ ନିୟଣ୍ଟ ଲକ୍ଷ୍ୟକୁ ପାଳନ କରିବା, ସୁଧ ବୋଝ ଏଡାଇବା ଲାଗି ରିଜର୍ଭ ପାଣ୍ଠି ସୁଧ ବହନକାରୀ ଉପକରଣରେ ସମ୍ପୂର୍ଣ୍ଣ ଭାବେ ବିନିଯୋଗକୁ ସୁନିଶ୍ଚିତ କରିବା ଏବଂ ଜାତୀୟ ପେନଶନ ବ୍ୟବସ୍ଥାରେ ଆବଶ୍ୟକ ଅବଦାନର ସମ୍ପୂର୍ଣ୍ଣ ଅନୁପାଳନକୁ ସୁନିଶ୍ଚିତ କରିବା ଆବଶ୍ୟକ।
