ନୂଆଦିଲ୍ଲୀ,୨୪/୦୫: ଶିକ୍ଷା ମନ୍ତ୍ରଣାଳୟ ଅନ୍ତର୍ଗତ ସ୍କୁଲ ଶିକ୍ଷା ଏବଂ ସାକ୍ଷରତା ବିଭାଗ (ଡିଓଏସ୍ଇଏଲ୍) ଶିକ୍ଷାର୍ଥୀ ତଥା ଯୁବବର୍ଗଙ୍କୁ ନିଶା, ତମାଖୁ ଭଳି ହାନିକାରକ ପଦାର୍ଥ ସେବନରୁ ଦୂରେଇ ରଖିବା ଲାଗି ଜାତୀୟ ଅଭିଯାନ ଆରମ୍ଭ କରିଛି । ଏ ଦିଗରେ ପଦକ୍ଷେପ ନେଇ ସମସ୍ତ ନିୟମକୁ କଡ଼ାକଡ଼ି ଲାଗୁ କରିବାକୁ ସବୁ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦିଆଯାଇଛି । ଏ ନେଇ ଗତ ୧୫ ତାରିଖରେ ନାର୍କୋ-କୋଅର୍ଡିନେସନ ସେଣ୍ଟରର ୮ମ ଶୀର୍ଷ କମିଟି ବୈଠକ ବସିଥିଲା । ଏହା ପରେ ଡିଓଏସ୍ଇଏଲ୍ ସଚିବ ସଞ୍ଜୟ କୁମାର ଦେଶବ୍ୟାପୀ ଏହି ଅଭିଯାନ ଆରମ୍ଭ କରିବା ଲାଗି ଦିଶାନିର୍ଦ୍ଦେଶ ଜାରି କରିଥିଲେ ।
ଏହା ଅନୁସାରେ, ସ୍କୁଲ କଲେଜ ପରିସରରେ ‘ତମାଖୁ ମୁକ୍ତ ଅଞ୍ଚଳ’ ଲେଖା ପ୍ରଦର୍ଶନ କରାଯିବ । ପ୍ରବେଶ ପଥରେ ‘ତମାଖୁ ମୁକ୍ତ ଶିକ୍ଷା ଅନୁଷ୍ଠାନ’ ବୋର୍ଡ ଲାଗିବ । ପରିସରରେ ତମାଖୁ ବ୍ୟବହାର ଲାଗି କୌଣସି ମାଧ୍ୟମ ରହିବନି । ତମାଖୁ ସେବନ ଜନିତ ସ୍ୱାସ୍ଥ୍ୟଗତ ସମସ୍ୟା ବାବଦରେ ସଚେତନ ସାମଗ୍ରୀ ପ୍ରଦର୍ଶନ କରାଯିବ । ପ୍ରତି ୬ ମାସରେ ଅତିକମ୍ରେ ଥରେ ଏକ ତମାଖୁ ନିୟନ୍ତ୍ରଣ ଗତିବିଧି କାର୍ଯ୍ୟକ୍ରମ ଆୟୋଜନ କରାଯିବ । ତମାଖୁ ମନିଟରଙ୍କ ନାମାଙ୍କନ କରାଯିବ । ସ୍କୁଲରେ ଆଚାର ସଂହିତାରେ ତମାଖୁ ମୁକ୍ତ ନୀତି ସାମିଲ ହେବ । ଶିକ୍ଷାନୁଷ୍ଠାନର ଚାରିପଟେ ୧୦୦ ଗଜ ଦୂରତା ଭିତରେ ଥିବା ପରିସରକୁ ତମାଖୁ ମୁକ୍ତ କ୍ଷେତ୍ର ଘୋଷଣା କରାଯିବ । କୌଣସି ଦୋକାନୀ ବା ବିକ୍ରେତା ୧୦୦ ଗଜ ପରିସୀମା ଭିତରେ ଯେପରି ତମାଖୁ ଉତ୍ପାଦ ବିକ୍ରି ନ କରନ୍ତି ତାହା ସୁନିଶ୍ଚିତ କରାଯିବ । ଭାରତ ଦୁନିଆର ସବୁଠୁ ଯୁବ ଜନସଂଖ୍ୟା ବିଶିଷ୍ଟ ଦେଶ ମଧ୍ୟରେ ଅନ୍ୟତମ । ଏହାର ଅଧିକାଂଶ ନାଗରିକଙ୍କ ବୟସ ୨୯ ବର୍ଷରୁ କମ୍ । ସେମାନେ ଏକ ବିକଶିତ ଭାରତ ନିର୍ମାଣରେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇବେ । ଅଧ୍ୟୟନ ଅନୁସାରେ, ଭାରତରେ ଯୁବପିଢ଼ିଙ୍କ ମଧ୍ୟରେ ତମାଖୁ ସେବନ ମାତ୍ରା ଦ୍ରୁତଗତିରେ ବଢ଼ୁଛି । ଏଥିଯୋଗୁ ସ୍କୁଲ, କଲେଜ ପରିସରରେ ଅନ୍ୟ ନିଶା ପଦାର୍ଥ ସେବନ ପ୍ରବୃତ୍ତି ମଧ୍ୟ ବୃଦ୍ଧିପାଉଛି । ଗ୍ଲୋବାଲ ୟୁଥ୍ ଟୋବାକୋ ସର୍ଭେ, ୨୦୧୯ ଅନୁସାରେ ୧୩ରୁ ୧୫ ବର୍ଷ ବୟସର ପିଲାଙ୍କ ମଧ୍ୟରୁ ୮.୫% କୌଣସି ନା କୌଣସି ରୂପରେ ତମାଖୁ ସେବନ କରୁଥିଲେ । ଏଥିରୁ ଅଧିକ ଚିନ୍ତାଜନକ ହେଉଛି ଭାରତରେ ପ୍ରତିଦିନ ୫,୫୦୦ରୁ ଅଧିକ ପିଲା ତମାଖୁ ସେବନ ଆରମ୍ଭ କରୁଛନ୍ତି । ଏହାକୁ ରୋକିବା ଲାଗି ନିୟମ ଥିଲେ ମଧ୍ୟ ଏହାର କଡ଼ାକଡ଼ି ଅନୁପାଳନ ହେଉନାହିଁ । ତେଣୁ ଭାରତ ସରକାରଙ୍କ ପକ୍ଷରୁ ଏହି ଅଭିଯାନ ଆରମ୍ଭ କରାଯାଇଛି ।
