ଲଣ୍ଡନ,୧୬/୦୭: ଆସନ୍ତା ୨୩ ତାରିଖରୁ ଆରମ୍ଭ ହେବ ଚଳିତ ଆଣ୍ଡରସନ- ତେନ୍ଦୁଲକର ଟ୍ରଫି ଟେଷ୍ଟ ସିରିଜର ଚତୁର୍ଥ ମୁକାବିଲା । ମାଞ୍ଚେଷ୍ଟର ସ୍ଥିତ ଓଲ୍ଡ ଟ୍ରାଫୋର୍ଡ ଗ୍ରାଉଣ୍ଡ୍ରେ ଏହି ମ୍ୟାଚ୍ ଖେଳାଯିବ । ତୃତୀୟ ଟେଷ୍ଟର ପରାଜୟକୁ ଭୁଲିବା ସହଜ ନଥିଲେ ହେଁ ଆଗକୁ ଆଉ ୨ଟି ମ୍ୟାଚ୍ ରହିଥିବାରୁ ଏବେ ବି ସିରିଜ ଜିତିବାର ସଯୋଗ ରହିଛି । ତେଣୁ ପରାଜୟ ଦୁଃଖ ଭୁଲି ପରବର୍ତ୍ତୀ ମ୍ୟାଚ୍ ପାଇଁ ଏବେଠୁ ପ୍ରସ୍ତୁତ ହେବାକୁ ପଡ଼ିବ । ଦଳ ପାଇଁ ଏବେ ବିଜୟ ଜରୁରି ହୋଇ ପଡ଼ିଛି । ଇଂଲଣ୍ଡ ୨-୧ରେ ସିରିଜ ଆଗୁଆ ରହିଛି । ତେଣୁ ଭାରତକୁ ଏହି ସିରିଜ ଜିତିବାକୁ ହେଲେ ଶେଷ ୨ଟି ଯାକ ଟେଷ୍ଟରେ ବିଜୟ ହାସଲ କରିବାକୁ ପଡ଼ିବ । ଇଂଲଣ୍ଡ ଦଳକୁ ସେମାନଙ୍କ ଘରୋଇ ଗ୍ରାଉଣ୍ଡ୍ରେ ହରାଇବା ସହଜ ନୁହେଁ ବୋଲି ମଧ୍ୟ ଭାରତୀୟ ଦଳ ଉପଲବ୍ଧି କରିସାରିଛି । ତେଣୁ ଚତୁର୍ଥ ଟେଷ୍ଟରେ ଉପଯୁକ୍ତ ରଣନୀତି ଓ ଶ୍ରେଷ୍ଠ ଏକାଦଶ ସହ ଭାରତ ଗ୍ରାଉଣ୍ଡକୁ ଓହ୍ଲାଇବା ଜରୁରି ।
ବିଜୟ ମନ୍ତ୍ର ପଢ଼ାଇବେ ଗୁରୁ ଗମ୍ଭୀର: ଲିଡ୍ସ ପରେ ଲର୍ଡ୍ସ ପରାଜୟ ପରେ ଗୌତମ ଗମ୍ଭୀରଙ୍କ ଦକ୍ଷତାକୁ ନେଇ ପ୍ରଶ୍ନ ଉଠିବାର ଆବଶ୍ୟକତା ରହିଛି । ଗତ ବର୍ଡର-ଗାଭାସ୍କର ଟ୍ରଫିରେ ଭାରତର ପରାଜୟକୁ ନେଇ କେବଳ ରୋହିତ ଶର୍ମାଙ୍କୁ ଦାୟୀ କରାଯାଇଥିଲା । ଏପରିକି ଅଧିନାୟକ ଥାଇ ମଧ୍ୟ ସେ ସିଡନୀ ଟେଷ୍ଟରେ ଏକାଦଶରୁ ଓହରିବାକୁ ବାଧ୍ୟ ହୋଇଥିଲେ । ସେତେବେଳେ କେହି ଗମ୍ଭୀରଙ୍କ ଉପରେ ନଜର ଦେଇ ନଥିଲେ । ଡ୍ରେସିଂ ରୁମ୍ ଆଲୋଚନାକୁ ବାହାରେ ପ୍ରକାଶ କରିବା ନେଇ ଏକ ବିବାଦ ଉଠିଥିଲା । ଏଥିରେ ଗମ୍ଭୀର ହିରୋ ଓ ଅଭିଷେକ ନାୟାର (ସହକାରୀ କୋଚ) ଖଳନାୟକ ସାବ୍ୟସ୍ତ ହୋଇଥିଲେ । ପରେ ନାୟାରଙ୍କୁ ବାଦ ଦିଆଯାଇଥିଲା । ଏବେ ରୋହିତଙ୍କ ସମେତ ବିରାଟ କୋହଲି ମଧ୍ୟ ଟେଷ୍ଟରୁ ଅବସର ନେଇ ସାରିଛନ୍ତି । ରବି ଅଶ୍ୱିନଙ୍କୁ ପୂର୍ବରୁ ବିଦାୟ ରାସ୍ତା ଦେଖା ସରିଛି ।
ଇଂଲଣ୍ଡରେ ପ୍ରଥମ ୩ଟିରୁ ୨ଟି ମ୍ୟାଚ ହାରିବା ପରେ ଗମ୍ଭୀରଙ୍କ ରଣ କୌଶଳକୁ ନେଇ ପ୍ରଶ୍ନ ଉଠିବାର ସମୟ ଆସିଛି । ଯୁବ ଦଳକୁ ବିଜୟ ମନ୍ତ୍ର ଶିଖାଇବାରେ ଗମ୍ଭୀର ବିଫଳ ହୋଇଥିବା ସ୍ପଷ୍ଟ ଜଣା ପଡ଼ୁଛି । ପରବର୍ତ୍ତୀ ୨ଟି ଟେଷ୍ଟର ଫଳାଫଳ ଗମ୍ଭୀରଙ୍କ ଦକ୍ଷତାର ପର୍ଦ୍ଦାଫାଶ କରିବ ।
ନାଏର ବନାମ ସୁଦର୍ଶନ: ତୃତୀୟ ଟେଷ୍ଟରେ ପରାଜୟ ପରେ ପୁଣି ଥରେ କରୁଣ ନାଏରଙ୍କ ପ୍ରଦର୍ଶନକୁ ନେଇ ପ୍ରଶ୍ନ ଉଠିଛି । ଘରୋଇ କ୍ରିକେଟ୍ରେ ଅପର୍ଯ୍ୟାପ୍ତ ରନ କରି ନାଏର ଟେଷ୍ଟ ଦଳକୁ ଧଶେଇ ପଶିଥିଲେ । ହେଲେ ରଣଜୀ ଟ୍ରଫି ପ୍ରଦର୍ଶନକୁ ସେ ଏପର୍ଯ୍ୟନ୍ତ ଦୋହରାଇ ପାରି ନାହାନ୍ତି । ୬ଟି ଇନିଂସରେ ସେ ଗୋଟିଏ ହେଲେ ଅର୍ଦ୍ଧଶତକ ଅର୍ଜନ କରିପାରି ନାହାନ୍ତି । ତେଣୁ ଭାରତ ଏବେ ପୁଣି ଥରେ ବ୍ୟାଟିଂ କ୍ରମର ୩ନଂ ସ୍ଥାନକୁ ନେଇ ସମୀକ୍ଷା କରିବାର ସମୟ ଆସିଛି । ବିଫଳ ନାଏରଙ୍କ ସ୍ଥାନରେ ୨୧ବର୍ଷିୟ ସାଇ ସୁଦର୍ଶନଙ୍କୁ ଆଉ ଥରେ ସୁଯୋଗ ଦେବାରେ କିଛି ଅସୁବିଧା ନାହିଁ । ବାକି ଦଳକୁ ଅପରିବର୍ତ୍ତିତ ରଖିବା ଜରୁରି ।
ନିମ୍ନ ବ୍ୟାଟିଂ କ୍ରମର ଯୋଗଦାନ: ଲର୍ଡ୍ସ ଟେଷ୍ଟରେ ଭାରତୀୟ ଦଳର ତାରକା ବ୍ୟାଟର ଫେଲ ମାରିଥିଲେ । ମାତ୍ର ନିମ୍ନ ଭାଗରେ ଯଶପ୍ରୀତ ବୁମରା ଓ ମହମ୍ମଦ ସିରାଜ ଲଢୁଆ ବ୍ୟାଟିଂ କରିଥିଲେ । ରବିନ୍ଦ୍ର ଜାଡେଜା କ୍ରିଜରେ ଅପରାଜିତ ଥିବାରୁ ବୁମରା ଓ ସିରାଜଙ୍କ ବ୍ୟାଟ୍ରୁ ଦଳ ରନ ଆବଶ୍ୟକ କରୁନଥିଲା । କେବଳ ଜାଡେଜାଙ୍କୁ ସାଥ୍ ଦେବାର ଆବଶ୍ୟକତା ଥିଲା । ଜାଡେଜାଙ୍କ ସହ ବୁମରା ୨୨ ଓଭର ବ୍ୟାଟିଂ କରିଥିଲେ ଓ ମ୍ୟାଚ୍କୁ ଶେଷ ଅଧିବେଶନକୁ ଟାଣି ନେଇଥିଲେ । ପରେ ସିରାଜ ମଧ୍ୟ ଦାୟିତ୍ୱପୂର୍ଣ୍ଣ ବ୍ୟାଟିଂ କରିଥିଲେ । ଶେଷରେ ଭାଗ୍ୟ ସାଥ୍ ନଦେବାରୁ ସେ ଆଉଟ୍ ହୋଇଥିଲେ ।
ଭାରତ ୮ଜଣ ବ୍ୟାଟର ଓ ବ୍ୟାଟିଂ ଅଲ୍ରାଉଣ୍ଡର ନେଇ ଖେଳୁଛି । ତଥାପି ନିମ୍ନ ଭାଗ ରନ ସଂଗ୍ରହ କରିପାରୁ ନାହିଁ । ଜାଡେଜାଙ୍କ ପରେ ବ୍ୟାଟିଂ ବିଭାଗ ଶୂନ୍ୟ ମନେ ହେଉଛି । ଅପରପକ୍ଷରେ ଦେଖିବାକୁ ଗଲେ ୯ନଂ ସ୍ଥାନରେ ଇଂଲଣ୍ଡର ବ୍ରାଇଡନ କାର୍ସ ବ୍ୟାଟିଂ କରିବାକୁ ଆସି (ଲର୍ଡ୍ସ) ୫୬ ରନ୍ର ଇନିଂସ ଖେଳିଥିଲେ । ବାକି ମ୍ୟାଚ୍ ଜିତିବାକୁ ହେଲେ ନିମ୍ନ ଭାଗ ବ୍ୟାଟରଙ୍କୁ କିଛି ରନ ସଂଗ୍ରହ କରିବାକୁ ହେବ । ବିଶେଷ କରି ୱାସିଂଟନ ସୁନ୍ଦର ଓ ନୀତିଶ କୁମାର ରେଡ୍ଡୀଙ୍କ ବ୍ୟାଟରୁ ଉପଯୋଗୀ ଇନିଂସ କିମ୍ବା ଦାୟିତ୍ୱପୂର୍ଣ୍ଣ ଭାଗିଦାରୀ ଆବଶ୍ୟକ ।
ଅପରିବର୍ତ୍ତିତ ମନୋଭାବ: ଲର୍ଡ୍ସରେ ଦଳ ଶେଷ ପର୍ଯ୍ୟନ୍ତ ଲଢ଼େଇ କରିଥିଲା । ତଥାପି ବିଜୟଠୁ ୨୨ ରନ ପଛରେ ରହିଯାଇଥିଲା । ଏହି ମ୍ୟାଚରେ ଭାରତୀୟ ଦଳ ଆକ୍ରମଣାତ୍ମକ ମନୋଭାବ ସହ ଖେଳିଥିଲା । ଗ୍ରାଉଣ୍ଡ୍ରେ ପ୍ରଦର୍ଶନ ବ୍ୟତୀତ ସ୍ଲେଜିଂରେ ମଧ୍ୟ ଭାରତୀୟ ଦଳ ପଛଘୁଞ୍ଚା ଦେଇ ନଥିଲା । ଫଳରେ ଅନ୍ତିମ ଦିବସ ବେଳକୁ ଲଢ଼େଇ ଜୋରଦାର ହୋଇଥିଲା । ଏହି ମନୋଭାବକୁ ମାଞ୍ଚେଷ୍ଟରରେ ମଧ୍ୟ କାଏମ ରଖିବା ଜରୁରି । ଏଥିପାଇଁ ଅଧିନାୟକ ଶୁଭମନ ଗିଲ୍ ନିଜ ଦଳକୁ ପ୍ରସ୍ତୁତ ରଖିବେ । ଇଂଲଣ୍ଡ ଉପରେ ମାନସିକ ଚାପ ପକାଇବାରେ ଏହି ମନୋଭାବ ସହାୟକ ହେବ ।
