ନୂଆଦିଲ୍ଲୀ,୧୨/୧୨: ନଭେମ୍ବରରେ ଭାରତର ଖୁଚୁରା ମୁଦ୍ରାସ୍ଫୀତି ହାର ୫.୪୮ ପ୍ରତିଶତକୁ ଖସି ଆସିଛି, ଯାହାକି ଅକ୍ଟୋବରରେ ୬ ପ୍ରତିଶତ ଉପରେ ପହଞ୍ଚି ଯାଇଥିଲା। ଏହି ହ୍ରାସ ସହିତ ବଜାରରେ ତାଜା ପନିପରିବାର ମୂଲ୍ୟ ସ୍ବାଭାବିକ ହେବା ଦେଖିବାକୁ ମିଳିଛି। ଅକ୍ଟୋବର ତୁଳନାରେ ପନିପରିବା ମୂଲ୍ୟରେ ବର୍ଷର ଅଭିବୃଦ୍ଧି ହାର ୪୨.୧୮ ପ୍ରତିଶତରୁ ୨୯.୩୩ ପ୍ରତିଶତକୁ ଖସି ଆସିଛି, ଯେଉଁ କାରଣରୁ ଖୁଚୁରା ମୁଦ୍ରାସ୍ଫୀତି ହ୍ରାସ ପାଇଛି ବୋଲି ଅର୍ଥନୀତି ବିଶେଷଜ୍ଞମାନେ ମତ ରଖିଛନ୍ତି।
କ'ଣ କହୁଛି ରିପୋର୍ଟ?
ଖାଦ୍ୟ ମୁଦ୍ରାସ୍ଫୀତି, ଉପଭୋକ୍ତା ମୂଲ୍ୟ ସୂଚକାଙ୍କ (ସିପିଆଇ) ର ପ୍ରାୟ ଅଧା ଅଂଶ ଅଟେ, ଯାହାକି ନଭେମ୍ବରରେ ୯.୦୪ ପ୍ରତିଶତରେ ପହଞ୍ଚିଥିଲା, ଯାହାକି ପୂର୍ବ ମାସଗୁଡ଼ିକ ତୁଳନାରେ ୧୦.୮୭ ପ୍ରତିଶତ କମ୍ ଅଟେ। ତେବେ ଗ୍ରାମାଞ୍ଚଳ ଏବଂ ସହରାଞ୍ଚଳରେ ବିଭିନ୍ନ ପ୍ରଭାବ ଦେଖିବାକୁ ମିଳିଥିଲା। ଗ୍ରାମୀଣ ମୁଦ୍ରାସ୍ଫୀତି ଅକ୍ଟୋବରରେ ୬.୬୮ ପ୍ରତିଶତରୁ ୯.୧୦ ପ୍ରତିଶତକୁ ବୃଦ୍ଧି ପାଇଥିବାବେଳେ ସହରୀ ମୁଦ୍ରାସ୍ଫୀତି ୫.୬୨ ପ୍ରତିଶତରୁ ୮.୭୪ ପ୍ରତିଶତକୁ ବୃଦ୍ଧି ପାଇଛି। ଶସ୍ୟ ଏବଂ ଡାଲିର ମୁଦ୍ରାସ୍ଫୀତି ହାରରେ ସାମାନ୍ୟ ହ୍ରାସ ଘଟିଛି। ନଭେମ୍ବରରେ ଶସ୍ୟର ମୁଦ୍ରାସ୍ଫୀତି ହାର ୬.୮୮ ପ୍ରତିଶତ ଥିଲା, ଯାହାକି ଅକ୍ଟୋବରରେ ୬.୯୪ ପ୍ରତିଶତ ଥିଲା। ଡାଲିର ମୁଦ୍ରାସ୍ଫୀତି ହାର ୭.୪୩ ପ୍ରତିଶତରୁ ୫.୪୧ ପ୍ରତିଶତକୁ ଖସି ଆସିଛି।
ମୂଲ୍ୟରେ ସ୍ଥିରତା:
ପନିପରିବା ଏବଂ ଖାଇବା ତେଲର ମୂଲ୍ୟରେ ସ୍ଥିରତା ମୁଦ୍ରାସ୍ଫୀତି ହ୍ରାସର ମୁଖ୍ୟ କାରଣ ଥିଲା। ସେପ୍ଟେମ୍ବରରେ ଖାଇବା ତେଲ ଉପରେ ଅତିରିକ୍ତ ଆମଦାନୀ ଶୁଳ୍କର ପ୍ରଭାବ ସତ୍ତ୍ବେ ଏବେ ଏସବୁ ମୂଲ୍ୟରେ ସ୍ଥିରତାର ସଙ୍କେତ ମିଳୁଛି। ବୋଫା ସିକ୍ୟୁରିଟିଜ୍ ଅଫ୍ ଇକୋନୋମିକ୍ ରିସର୍ଚ୍ଚର ମୁଖ୍ୟ ରାହୁଲ ବାଜୋରିଆଙ୍କ ଅନୁଯାୟୀ, ପନିପରିବା ମୂଲ୍ୟ ନରମ ହେବା ସହ ଖାଇବା ତେଲ ମୂଲ୍ୟରେ ସ୍ଥିରତା ହେତୁ ଗ୍ରାହକମାନେ ଆଶ୍ବସ୍ତି ପାଇଛନ୍ତି।
ତେବେ ମୁଦ୍ରାସ୍ଫୀତିକୁ ନେଇ ଚିନ୍ତା ସମ୍ପୂର୍ଣ୍ଣ ରୂପେ ଶେଷ ହୋଇନାହିଁ। ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ୨୦୨୩-୨୪ ଆର୍ଥିକ ବର୍ଷ ପାଇଁ ମୁଦ୍ରାସ୍ଫୀତି ହାରର ଅନୁମାନ ୪.୮ ପ୍ରତିଶତ କରିଛି, ଯାହା ପୂର୍ବରୁ ୪.୫ ପ୍ରତିଶତ ଥିଲା। ଆରବିଆଇର ପୂର୍ବତନ ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି ଯେ ଚତୁର୍ଥ ତ୍ରୈମାସିକରେ ମୁଦ୍ରାସ୍ଫୀତି ଚାପ ହ୍ରାସ ପାଇବ ବୋଲି ଆଶା କରାଯାଉଛି, କିନ୍ତୁ ଆର୍ଥିକ ବର୍ଷର ତୃତୀୟ ତ୍ରୈମାସିକ ପର୍ଯ୍ୟନ୍ତ ଖାଦ୍ୟ ମୁଦ୍ରାସ୍ଫୀତି ଏକ ଉଚ୍ଚ ସ୍ତରରେ ରହିପାରେ।
