ନୂଆଦିଲ୍ଲୀ, ୧୬।୭: ରୁଷ ଉପରେ ଚାପ ପକାଇବା ପାଇଁ ଟ୍ରମ୍ପ ପ୍ରଶାସନ ରୁଷ ସାମଗ୍ରୀ ଆମଦାନୀ କରୁଥିବା ଦେଶଗୁଡ଼ିକ ଉପରେ ୧୦୦% ସେକେଣ୍ଡାରି ଟ୍ୟାକ୍ସ ଲଗାଇବାକୁ ଧମକ ଦେଇଛି । ଏହି ଟାରିଫ୍ ଭାରତ ଏବଂ ଚୀନ୍ ଅର୍ଥନୀତି ଉପରେ ଗମ୍ଭୀର ପ୍ରଭାବ ପକାଇପାରେ । ଯୁଦ୍ଧ ବନ୍ଦ କରିବାକୁ ରୁଷ ଉପରେ ଚାପ ପକାଉଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଏହି ପରିପ୍ରେକ୍ଷୀରେ, ଟ୍ରମ୍ପ ପୁଣି ଥରେ ରୁଷ ଉପରେ ଶୁଳ୍କ ଲଗାଇବାକୁ ଧମକ ଦେଇଛନ୍ତି । ସୋମବାର ନାଟୋ ସଚିବ ମାର୍କ ରୁଟ୍‌ଙ୍କ ସହ ବୈଠକ ପରେ, ଟ୍ରମ୍ପ ଏକ ନୂତନ ଯୋଜନା ଘୋଷଣା କରିଛନ୍ତି, ଯାହା କେବଳ ରୁଷ ନୁହେଁ ବରଂ ରୁଷ୍ ସହ ବ୍ୟବସାୟ କରୁଥିବା ଦେଶମାନଙ୍କୁ ବଡ଼ ଝଟକା ଲାଗିପାରେ । 

ସୋମବାର ଟ୍ରମ୍ପ ଘୋଷଣା କରିଥିଲେ ଯେ, ଯଦି ଆଗାମୀ ସପ୍ତାହରେ ଋଷ୍-ୟୁକ୍ରେନ ମଧ୍ୟରେ ଯଦି ଯୁଦ୍ଧବିରତି ନ ଲାଗେ, ତେବେ ସେ ରୁଷ୍ ସାମଗ୍ରୀ କିଣୁଥିବା ଦେଶଗୁଡ଼ିକ ଉପରେ ୧୦୦% ଦ୍ୱିତୀୟ ଶୁଳ୍କ ଲାଗୁ କରିବେ । ହ୍ୱାଇଟ୍ ହାଉସରେ ରୁଟ୍‌ଙ୍କ ଉପସ୍ଥିତିରେ ସେ କହିଥିଲେ, "ଆମେ ୧୦୦% ଶୁଳ୍କ ଲାଗୁ କରିବାକୁ ଯାଉଛୁ... ଏବେ ପ୍ରକୃତ ପରିବର୍ତ୍ତନ ଦେଖିବାର ସମୟ ଆସିଛି, ନଚେତ୍ ପରିଣାମ ଭୟଙ୍କର ହେବ ।" ନାଟୋ ସଚିବ ମାର୍କ ରୁଟ୍ ଦାବି କରିଛନ୍ତି ଯେ, ରୁଷ ଉପରେ ଆମେରିକା ଲଗାଇଥିବା ଦ୍ୱିତୀୟ ଶୁଳ୍କ ଚୀନ୍, ଭାରତ ଏବଂ ବ୍ରାଜିଲ୍ ଉପରେ ଗମ୍ଭୀର ଆର୍ଥିକ ପ୍ରଭାବ ପକାଇବ । ଯାହା ଫଳରେ ଏହି ତିନି ଦେଶ ଏକ ଶାନ୍ତି ଚୁକ୍ତି ପାଇଁ ମସ୍କୋ ଉପରେ ଚାପ ପକାଇବେ । ଯଦି ଆମେରିକା ଦ୍ୱିତୀୟ ଶୁଳ୍କ ଲାଗୁ କରେ, ତେବେ ଏହା ଭାରତ ସମେତ ଏକାଧିକ ଦେଶ ପାଇଁ ସମସ୍ୟା ସୃଷ୍ଟି କରିପାରେ ଯେଉଁମାନେ ରୁଷ ସହିତ ବାଣିଜ୍ୟ କାରବାର କରୁଛନ୍ତି ।

ସେକେଣ୍ଡାରି ଟ୍ୟାକ୍ସ ବା ଦ୍ୱିତୀୟ ଶୁଳ୍କକୁ ନେଇ କାହିଁକି ଚିନ୍ତା ?

ରୁଷର ପ୍ରମୁଖ ବାଣିଜ୍ୟିକ ଅଂଶୀଦାରମାନଙ୍କ ମଧ୍ୟରେ ଚୀନ୍, ଭାରତ, ବ୍ରାଜିଲ୍, ତୁର୍କୀ ଏବଂ ଦକ୍ଷିଣ କୋରିଆ ଅନ୍ତର୍ଭୁକ୍ତ । ଯାହାର ବାଣିଜ୍ୟିକ ବାର୍ଷିକ ଲାଭ ଶହ ଶହ ବିଲିୟନ ଡଲାର । ଏହି ଦେଶଗୁଡ଼ିକ ରୁଷର ଏନର୍ଜି, ସାର, ଧାତୁ ଏବଂ ପ୍ରତିରକ୍ଷା ଉତ୍ପାଦ ଉପରେ ନିର୍ଭରଶୀଳ । ଆମେରିକାର ଦ୍ୱିତୀୟ ପ୍ରତିବନ୍ଧକ ସେମାନଙ୍କୁ ୱାଶିଂଟନ ସହିତ ବ୍ୟବସାୟ କରିବା କିମ୍ବା ମସ୍କୋ ସହିତ ସମ୍ପର୍କ ବଜାୟ ରଖିବା ମଧ୍ୟରୁ ଗୋଟିଏ ବାଛିବାକୁ ବାଧ୍ୟ କରିବ । ଏହିପରି ପ୍ରତିବନ୍ଧକ ବିଶ୍ୱ ଯୋଗାଣ ଶୃଙ୍ଖଳାକୁ ଅସ୍ଥିର କରିପାରେ ଏବଂ BRICS ଏବଂ ଗ୍ଲୋବାଲ୍ ସାଉଥ୍ ଭଳି ଗୋଷ୍ଠୀ ମଧ୍ୟରେ ରାଜନୈତିକ ବିଭାଜନ ସୃଷ୍ଟି କରିପାରେ ।

ସେକେଣ୍ଡାରି ଟ୍ୟାକ୍ସ ବା ଦ୍ୱିତୀୟ ଶୁଳ୍କ କ'ଣ ? 

ଦ୍ୱିତୀୟ ଶୁଳ୍କ ହେଉଛି ଏକ ଦେଶ ଦ୍ୱାରା ତୃତୀୟ ପକ୍ଷ ଉପରେ ଲାଗୁ କରାଯାଇଥିବା ପ୍ରତିବନ୍ଧକ, ଯେଉଁମାନେ ପ୍ରତିବନ୍ଧିତ ଦେଶ ସହିତ ସିଧାସଳଖ ବାଣିଜ୍ୟ କିମ୍ବା ଆର୍ଥିକ କାରବାରରେ ନିୟୋଜିତ ହୁଅନ୍ତି । ଏହି ଶୁଳ୍କଗୁଡ଼ିକ ପ୍ରାଥମିକ ଶୁଳ୍କଠାରୁ ଭିନ୍ନ କାରଣ ପ୍ରାଥମିକ ଶୁଳ୍କ ସିଧାସଳଖ ଏକ ଦେଶ କିମ୍ବା ସଂସ୍ଥା ଉପରେ ଲାଗୁ ହୋଇଥାଏ, ଅନ୍ୟପଟେ ଦ୍ୱିତୀୟ ଶୁଳ୍କ ଦେଶ, କମ୍ପାନୀ କିମ୍ବା ବ୍ୟକ୍ତି ବିଶେଷଙ୍କୁ ପ୍ରଭାବିତ କରେ ଯାହାର ମଞ୍ଜୁରୀ ପ୍ରାପ୍ତ ଦେଶ ସହିତ ସମ୍ପର୍କ ଅଛି । ଇରାନ ଏବଂ ରୁଷ ସହିତ ଆର୍ଥିକ କାର୍ଯ୍ୟକଳାପରେ ଜଡ଼ିତ ଥିବା କମ୍ପାନୀଗୁଡ଼ିକ ଉପରେ ଆମେରିକା ପୂର୍ବରୁ ପ୍ରତିବନ୍ଧକ ଲଗାଇସାରିଛି । କିନ୍ତୁ, ଏବେ ଟ୍ରମ୍ପ ସିଧାସଳଖ ଏପରି ଦେଶଗୁଡ଼ିକ ଉପରେ ଶୁଳ୍କ ଲଗାଇବା ବିଷୟରେ କହିଛନ୍ତି, ଯାହା ଭାରତ-ଚୀନ୍ ପାଇଁ ଆମେରିକାକୁ ରପ୍ତାନି ବହୁତ ମହଙ୍ଗା ହୋଇଯିବ ଏବଂ ଅର୍ଥନୀତିକୁ ଝଟକା ଲାଗିପାରେ ।

ପ୍ରତିବନ୍ଧକ ସତ୍ତ୍ୱେ ରୁଷକୁ ଦୁର୍ବଳ କରିପାରିଲାନି ଆମେରିକା 

ଆମେରିକା ରୁଷ ଉପରେ କଠୋର ପ୍ରତିବନ୍ଧକ ଲଗାଇଛି, ତଥାପି ରୁଷ ତା’ର ଅର୍ଥନୀତି ପରିଚାଳନା କରିବାରେ ଏବଂ ତା’ର ବିକାଶକୁ ବିସ୍ତାର କରିବାରେ ସଫଳ ହୋଇଛି । ରୁଷ ଚୀନ୍, ଉତ୍ତର କୋରିଆ ଏବଂ ଇରାନ ସହିତ ଏପରି ଏକ ସମ୍ପର୍କ ସୃଷ୍ଟି କରିଛି ଯେ, ସେମାନେ ଡଲାରକୁ ବାଇପାସ୍ କରି ଫେର ବଦଳ ବ୍ୟବସ୍ଥା ଅଧୀନରେ ପରସ୍ପରକୁ ସାମଗ୍ରୀ ଯୋଗାଇ ଦେଉଛନ୍ତି । ରୁଷ ଏହି ଶୃଙ୍ଖଳାରେ ସେହି ଦେଶଗୁଡ଼ିକୁ ଯୋଡ଼ିଛି ଯେଉଁମାନଙ୍କର ଆମେରିକା ସହିତ ଭଲ ସମ୍ପର୍କ ଅଛି ।

ଭାରତ, ତୁର୍କୀ, ପାକିସ୍ତାନ, ବ୍ରାଜିଲ ଭଳି ଦେଶମାନେ ୟୁକ୍ରେନ ଯୁଦ୍ଧ ପରେ ଆମେରିକା ସହିତ ଭଲ ସମ୍ପର୍କ ବଜାୟ ରଖି ରୁଷ ସହିତ ବାଣିଜ୍ୟ ବୃଦ୍ଧି କରିଛନ୍ତି । ଏହାର କାରଣ ହେଉଛି ରୁଷରୁ ଶସ୍ତା ମୂଲ୍ୟରେ ସାମଗ୍ରୀ ପାଇବା । ଏହି ଦେଶଗୁଡ଼ିକ ଯୋଗୁଁ, କଠୋର ପ୍ରତିବନ୍ଧକ ପରେ ମଧ୍ୟ ରୁଷର ଅର୍ଥନୀତି ଭଲ ସ୍ଥିତିରେ ରହିଛି । ଏବେ ଟ୍ରମ୍ପ ଏହି ଦେଶଗୁଡ଼ିକ ଉପରେ ପ୍ରତିବନ୍ଧକ ଲଗାଇବାକୁ ଧମକ ଦେଉଛନ୍ତି । ତେବେ ଏହାର ପ୍ରଭାବ କେତେ ପଡ଼ିବ ତାହା ସମୟ ହିଁ କହିବ, କିନ୍ତୁ ଏହା ସ୍ପଷ୍ଟ ଯେ ୟୁକ୍ରେନ-ରୁଷ ଯୁଦ୍ଧର ପ୍ରଭାବ ଏବେ ଅନ୍ୟ ଦେଶଗୁଡ଼ିକରେ ମଧ୍ୟ ପହଞ୍ଚିବା ଆରମ୍ଭ କରିଛି ।