ଭୁବନେଶ୍ୱର, ୦୮/୦୫ : ରାଜଧାନୀ ଭୁବନେଶ୍ୱରକୁ ପ୍ରଦୂଷଣ ମୁକ୍ତ କରିବାକୁ ଅଣ୍ଟା ଭିଡିଛନ୍ତି ରାଜ୍ୟ ସରକାର । ଏଥିପାଇଁ ପ୍ରମୁଖ ଛକରେ ୨୩ଟି ଇଭି ଷ୍ଟେସନ ନିର୍ମାଣ ହେବାକୁ ଯାଉଛି । ପରିବହନ ବିଭାଗ ଏବଂ ବିଏମ୍ସିର ମିଳିତ ଭାବେ ଏହି ସବୁ ଷ୍ଟେସନ ନିର୍ମାଣ କରିବେ । ରାଜ୍ୟରେ ସମୁଦାୟ ଏପରି ୧୦୦ ଇଭି ଷ୍ଟେସନ ନିର୍ମାଣ କରିବାକୁ ଯୋଜନା କରିଛି ପରିବହନ ବିଭାଗ । ଭୁବନେଶ୍ୱରରେ ଉତ୍ତର ଜୋନ୍ରେ ୯ଟି, ଦକ୍ଷିଣ-ପଶ୍ଚିମ ଜୋନ୍ର ୬ଟି ଏବଂ ଦକ୍ଷିଣ-ପୂର୍ବ ଜୋନ୍ର ୮ ଜାଗାରେ ଏହି ଇଭି ଷ୍ଟେସନ ନିର୍ମାଣ କରାଯିବ । ସେଥିମଧ୍ୟରେ କଳିଙ୍ଗ ଷ୍ଟାଡିୟମ, ରୂପାଲି, ମାଷ୍ଟରକ୍ୟାଣ୍ଟିନ ଏବଂ ଶିଶୁଭବନ ଛକରେ ପ୍ରାଥମିକ ପର୍ଯ୍ୟାୟରେ କାମ ଆରମ୍ଭ ହୋଇଛି । ଏକ ଘରୋଇ କମ୍ପାନି ଏହି ଇଭି ଷ୍ଟେସନ ନିର୍ମାଣ କରିବାକୁ ଯୋଜନା କରିଛି । ପ୍ରତି ଇଭି ଷ୍ଟେସନ ପାଇଁ ୪୦୦ ବର୍ଗ ଫୁଟ ଜାଗା ରାଜ୍ୟ ସରକାର ଯୋଗାଇ ଦେବେ ।
ଘରୋଇ କମ୍ପାନି ଷ୍ଟେସନ ନିର୍ମାଣ କରିବାକୁ ୭୦ ଲକ୍ଷ ଟଙ୍କା ଖର୍ଚ୍ଚ କରିବ । ଏଥିରେ ଷ୍ଟେସନ ସହିତ ସୋଲାର ସେଡ୍ ନିର୍ମାଣ କରାଯିବ । ଏହି ଇଭି ଷ୍ଟେସନରେ କାର ଏବଂ ବାଇକ୍ ଚାର୍ଜିଂ କରାଯିବ । ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଫାଷ୍ଟ ଚାର୍ଜକୁ ଘରୋଇ କମ୍ପାନି ୟୁନିଟ ପିଛା (ସରକାରୀ ଦର) ୫.୫୦ପଇସା ଟାଟା ପାୱାରକୁ ଦେବ । ଏହା ସହ ୪.୪୦ଟଙ୍କା ସର୍ଭିସ ଚାର୍ଜ ରଖିବ । ସେଥିରେ ଜିଏସ୍ଟି ମିଶାଇଲେ ୧୧ ଟଙ୍କା ହେବ । ବଜାରରେ ବର୍ତ୍ତମାନ ୟୁନିଟ୍ ପିଛା ୧୮ ଟଙ୍କା ଖର୍ଚ୍ଚ ହେଉଛି । ଫଳରେ ସରକାରୀ ଚାର୍ଜିଂ ଷ୍ଟେସନ ଦ୍ୱାରା ଗାଡ଼ି ଚାଳକ ଉପକୃତ ହେବେ । ପ୍ରତି ଷ୍ଟେସନରେ ୨ଟି ଚାର୍ଜିଂ ପଏଣ୍ଟ ରହିବ । ଗୋଟିଏ ଫାଷ୍ଟ ଏବଂ ଅନ୍ୟଟି ସ୍ଲୋ ଚାର୍ଜିଂ ପଏଣ୍ଟ ରଖିବାକୁ ଯୋଜନା କରାଯାଇଛି । ୨ ଘଣ୍ଟାରେ ଫାଷ୍ଟ ଚାର୍ଜିଂ ହେବ । ସ୍ଲୋ ଚାର୍ଜିଂ ପାଇଁ ୩ରୁ ୪ ଘଣ୍ଟା ଲାଗିବ ।
ଭୁବନେଶ୍ୱରରେ ଏବେ ଇଭି କାର ଚାହିଦା ବଢିଛି । ସହରରେ ଅଧିକାଂଶ ଲୋକେ ପେଟ୍ରୋଲ ଛାଡି ଇଭି କାର ମୁହାଁ । ସରକାର ପ୍ରୋତ୍ସାହନ ରାଶି ଯୋଗାଇ ଦେଉଥିବାରୁ ହେବେ ଲୋକେ ଇଭି କାର କିଣୁଛନ୍ତି । ହେଲେ ଚାର୍ଜିଂ ଷ୍ଟେସନ ନଥିବାରୁ ଅସୁବିଧା ହେଉଛି । ତେଣୁ ସହରାଞ୍ଚଳରେ ଚାର୍ଜିଂ ଷ୍ଟେସନକୁ ପ୍ରାଥମିକତା ଦିଆଯାଇଛି । ରାଜ୍ୟରେ ଏପରି ୧୦୦ ଇଭି ଷ୍ଟେସନ ନିର୍ମାଣ କରିବାକୁ ଯୋଜନା କରାଯାଇଛି । ନୂଆ କରି ନିର୍ମାଣ ହେଉଥିବା ୧୯ ଟ୍ରକ ଟର୍ମିନାଲରେ ଏହି ଚାର୍ଜିଂ ପଏଣ୍ଟ ଲାଗିବ । ସେହିପରି ରାଜ୍ୟରେ ୩୫ଟି ଆରଟିଓ ଓ ୩ଟି ସ୍ପେଶାଲ ଆରଟିଓରେ ୩୮ଟି ଇଭି ଷ୍ଟେସନ ନିର୍ମାଣ କରାଯିବ । ଭୁବଶ୍ୱେରରେ ୨୩ଟି କରିବାକୁ ଯୋଜନା ହୋଇଛି । ବାକି ସ୍ଥାନରେ ପରିବହନ ବିଭାଗ ପକ୍ଷକୁ ଜାଗା ଚିହ୍ନଟ ପରେ ଇଭି ଷ୍ଟେସନ ନିର୍ମାଣ କରାଯିବ ।
ଏହି ଖବରଟିକୁ ପଢନ୍ତୁ-ଉପଭୋକ୍ତାଙ୍କୁ ବିଦ୍ୟୁତ ବିଭାଗର ଚକମା, ଦାଉ ସାଧୁଛି ଲୋ-ଭୋଲଟେଜ୍
