ଭୁବନେଶ୍ବର,୭।୫ : ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟ ବୈଠକ ଅନୁଷ୍ଠିତ ହୋଇଛି। ଏଥିରେ ୮ଟି ପ୍ରସ୍ତାବକୁ ଅନୁମୋଦନ ମିଳିଛି। ଏ ନେଇ ମୁଖ୍ୟ ଶାସନ ସଚିବ ମନୋଜ ଆହୁଜା ସୂଚନା ଦେଇଛନ୍ତି। କ୍ୟାବିନେଟ ବୈଠକରେ ମୁଖ୍ୟମନ୍ତ୍ରୀ ବସ ସେବାକୁ ମଞ୍ଜୁରୀ ମିଳିଛି। ଏଥିରେ ରାଜ୍ୟର ପ୍ରମୁଖ ବାଣିଜ୍ୟ କେନ୍ଦ୍ର, ଶିକ୍ଷା, ସ୍ବାସ୍ଥ୍ୟନୁଷ୍ଠାନ, ଅନ୍ୟାନ୍ୟ ଦର୍ଶନୀୟ ସ୍ଥାନକୁ ବସ ଗଡିବ। ଏଥିରେ ମହିଳା, ଛାତ୍ରଛାତ୍ରୀ ଭିନ୍ନକ୍ଷମ ଓ ତୃତୀୟ ଲିଙ୍ଗକୁ ଙ୍କୁ ୫୦ ପ୍ରତିଶତ ରିହାତି ଭଡା ମିଳିବ। ବସଗୁଡିକରେ ସିସିଟିଭି କ୍ୟାମେରା, ଲାଇଭ ଟ୍ରାକିଂ, ଯାତ୍ରୀ ସୂଚନା ବ୍ୟବସ୍ଥା ଓ ପାନିକ ବଟନ୍ ଇତ୍ୟାଦି ପରି ଆଧୁନିକ ବନ୍ଦୋବସ୍ତ ରହିଛି। ଓଏସଆରଟିସି ଅଧୀନରେ ଚଳାଚଳ କରିବ ବସ୍।
ପ୍ରାଣୀଚିକିତ୍ସା ବୈଷୟିକ ସେବା ନିଯୁକ୍ତି ଏବଂ ସର୍ଭାବଳୀ ନିୟମ- ୨୦୨୪ କୁ କ୍ୟାବିନେଟ ମଞ୍ଜୁରୀ ମିଳିଛି। ପ୍ରସ୍ତାବିତ ଓଡିଶା ପ୍ରାଣୀ ଚିକିତ୍ସା ବୈଷୟିକ ସେବା (ନିଯୁକ୍ତି ସର୍ଭାବଳୀ) ନିୟମ-୨୦୨୪ ଅନୁଯାୟୀ ପୂର୍ବରୁ ବିଦ୍ୟମାନ ଓଡିଶା ଅଣ ଗେଜେଟେଡ୍ ପ୍ରାଣୀ ଚିକିତ୍ସା ବୈଷୟିକ ସେବା (ନିଯୁକ୍ତି ସର୍ତ୍ତାବଳୀ) ନିୟମ-୧୯୮୩ ଏବଂ ପରବର୍ତ୍ତୀ ସମସ୍ତ ସଂଶୋଧନକୁ ବଦଳା ଯିବ। ଏଥି ସହିତ ପୁରୁଣା ଓ ଅନାବଶ୍ୟକ ନିୟମକୁ ପ୍ରତ୍ୟାହାର କରି ନିକଟରେ ପୁର୍ନଗଠିତ ହୋଇଥିବା ଓଡିଶା ପ୍ରାଣୀ ଚିକିତ୍ସା ବୈଷୟିକ ସେବା କ୍ୟାଡରକୁ ନିୟନ୍ତ୍ରିତ କରିବା ନିମନ୍ତେ ପ୍ରସ୍ତାବ ରଖାଯାଇଛି। ଓଡିଶା ପ୍ରାଣୀଚିକିତ୍ସା ବୈଷୟିକ ସେବା କ୍ୟାଡରରେ ୧୧୩ ନୂତନ ପଦବୀ ସୃଷ୍ଟି କରାଯାଇ ଏହାର କ୍ଷମତା ୪,୦୪୫ ରୁ ୪,୧୫୮ କୁ ବୃଦ୍ଧି କରାଯାଇଛି।
ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗର ନିର୍ମଳ ( ସାର୍ବଜନୀନ ସ୍ବାସ୍ଥ୍ୟ କେନ୍ଦ୍ରରେ ଆନୁଷଙ୍ଗିକ ସେବାକୁ ସୁଦୃଢ଼ କରିବା) ଯୋଜନାକୁ ଅନୁମୋଦନ ମିଳିଛି। ହାଉସ କିପିଙ୍ଗ, ସ୍ବଚ୍ଛତା ସେବା, ଲଣ୍ଡି ସେବା, ସୁରକ୍ଷା ସେବା ଏବଂ ଆଟେଣ୍ଡାଣ୍ଟସେବା ଇତ୍ୟାଦି ଆନୁଷଙ୍ଗିକ ସେବାଗୁଡିକର କାର୍ଯ୍ୟକାରିତାକୁ ଆହୁରି ବୃଦ୍ଧି କରାଯିବ। ପାଞ୍ଚ ବର୍ଷ ପାଇଁ ୫,୧୭୪.୭୯ କୋଟି ଟଙ୍କାର ଆନୁମାନିକ ବ୍ୟୟ ଅଟକଳକୁ ଅନୁମୋଦନ କରିଛନ୍ତି ।
ସେହିପରି ମୁଖ୍ୟମନ୍ତ୍ରୀ ସଡ଼କ ଯୋଜନା ଆରମ୍ଭ କରାଯାଇଛି। ଏହି ଯୋଜନାର ଉଦ୍ଦେଶ୍ୟ ହେଉଛି ବିପର୍ଯ୍ୟୟ ସମୟରେ ଏବଂ ପରେ ଅତ୍ୟାବଶ୍ୟକ ପରିବହନରେ ସର୍ବନିମ୍ନ ବ୍ୟାଘାତକୁ ସୁନିଶ୍ଚିତ କରିବା। ଏଥି ସ୍ଥିର ସଡକ ଭିତ୍ତିଭୂମି ନିର୍ମାଣ କରିବା ଯାହା ରାଜ୍ୟର ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ଜରୁରୀକାଳୀନ ପ୍ରମୁଖ କାର୍ଯ୍ୟକ୍ଷମ ସେବାରେ ଯେପରି ବାଧା ସୃଷ୍ଟି ନ ହେବ।
