ନୂଆଦିଲ୍ଲୀ: ଲଗାତାର ଦିଲ୍ଳୀର ସ୍କୁଲ ଏବଂ ହସ୍ପିଟାଲକୁ ବୋମା ପକାଇ ଉଡ଼ାଇ ଦେବାକୁ ଧମକ ମିଳୁଛି । ଆଜି ଆଉ ୪ ହସ୍ପିଟାଲକୁ ବୋମା ପକାଇ ଉଡ଼ାଇ ଦବୋକୁ ଇମେଲ୍ ଜରିଆରେ ଧମକ ମିଳିଥିବା ଜଣାପଡ଼ିଛି । ଦୀପ ଚାନ୍ଦ ବନ୍ଧୁ ହସ୍ପିଟାଲ, ଜିଟିବି ହସ୍ପିଟାଲ, ଦାଦା ଦେବ ହସ୍ପିଟାଲ ଏବଂ ହେଡଗେଓ୍ବାର ହସ୍ପିଟାଲକୁ ଏହି ଧମକ ମିଳିଛି । ତେବେ ଏହି ୪ ହସ୍ପିଟାଲରେ ବହୁ ଖୋଜାଖୋଜି କରାଯାଇଥିଲେ ମଧ୍ୟ ଖାଲି ହାତରେ ଫେରିଛି ଦିଲ୍ଲୀ ପୋଲିସ । ସୂଚନା ପାଇବା କ୍ଷଣି ବମ୍ ସ୍କ୍ବାଡ୍, ବମ୍ ଡିଟେକ୍ସନ ଟିମ୍, ଦମକଳ ବାହିନୀ ଏବଂ ସ୍ଥାନୀୟ ପୋଲିସ ଘଟଣାସ୍ଥଳରେ ପହଞ୍ଚିଥିଲେ । ସେପଟେ କେଉଁଠୁ ଏହି ଧମକପୂର୍ଣ୍ଣ ମେଲ୍ ଆସିଛି ସେନେଇ ପୋଲିସ ଛାନଭିନ୍ କରୁଛି ।
ମିଳିଥିବା ସୂଚନା ଅନୁସାରେ, ଆଜି ସକାଳ ୯ଟା ୪୫ରେ ପ୍ରଥମେ ଅଶୋକ ବିହାରରେ ଥିବା ଦୀପ ଚାନ୍ଦ ବନ୍ଧୁ ହସ୍ପିଟାଲକୁ ଧମକପୂର୍ଣ୍ଣ ମେଲ୍ ମିଳିଥିଲା । ଏହା ପରେ ୧୦ଟା ୫୫ରେ ଦାଦା ଦେବ ହସ୍ପିଟାଲ, ହେଡଗେଓ୍ବାର ହସ୍ପିଟାଲକୁ ୧୧.୦୧ଟା ଏବଂ ଜିଟିବି ହସ୍ପିଟାଲକୁ ୧୧ଟା ୧୨ରେ ଧମକଭରା ଇମେଲ ମିଳିବା ପରେ ହଇଚଇ ସୃଷ୍ଟି ହୋଇଥିଲା । ଏହା ପୂର୍ବରୁ ରବିବାର ଦିନ ଦିଲ୍ଲୀର ୨୦ ହସ୍ପିଟାଲ ଏବଂ ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦରକୁ ବୋମାରେ ଉଡାଇ ଦେବାକୁ ଧମକ ମିଳିଥିଲା ।
ସେହିଭଳି ମେ ୧ରେ ଦିଲ୍ଲୀ ଏନସିଆରରେ ଥିବା ୧୫୦ ବିଦ୍ୟାଳୟକୁ ମିଳିଥିଲା ଧମକପୂର୍ଣ୍ଣ ମେଲ୍ । ପରେ ଏଥିରେ ସତ୍ୟାସତ୍ୟ ନଥିବା ଜଣାପଡ଼ିଥିଲା । ରୁଷିଆ ମେଲ୍ ସେବା ଜରିଆରେ ଏହି ସବୁ ସ୍କୁଲକୁ ଧମକପୂର୍ଣ୍ଣ ମେଲ୍ ପଠାଯାଇଥିଲା । ଦିଲ୍ଲୀ ପବ୍ଲିକ୍ ସ୍କୁଲ, ମଦର ମେରି ସ୍କୁଲ୍, ଡିଏଭି ସ୍କୁଲ୍ ପ୍ରମୁଖ ସ୍କୁଲ୍ରେ ଭୟର ବାତାବରଣ ଖେଳିଯାଇଥିଲା । ସେହିଭଳି ନୋଏଡାରେ ଥିବା ଡିପିଏସ୍ ଏବଂ ଏପିଜେ ସ୍କୁଲ ମଧ୍ୟ ଧମକପୂର୍ଣ୍ଣ ମେଲ୍ ପାଇଥିଲେ ।
