ନୂଆଦିଲ୍ଲୀ,୨୮।୫: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପିଏ ବିଭବ କୁମାରଙ୍କୁ ଦିଲ୍ଲୀ ପୋଲିସ  ମଙ୍ଗଳବାର ତିସ ହଜାରି କୋର୍ଟରେ ହାଜର କରିଛି। ତାଙ୍କର ନ୍ୟାୟିକ ହେପାଜତ ଆଜି ଶେଷ ହେଉଥିଲା। ମଇ ୨୪ ରେ କୋର୍ଟ ବିଭବ କୁମାରଙ୍କୁ ଚାରି ଦିନ ପାଇଁ ନ୍ୟାୟିକ ହେପାଜତକୁ ପଠାଇଥିଲେ। ଆଜି ଶୁଣାଣି ପରେ ଆଉ ୩ ଦିନ ପାଇଁ କଷ୍ଟଡି ବଢାଇ ଦିଆଯାଇଛି। ତେବେ ପୋଲିସ ୫ ଦିନର ରିମାଣ୍ଡ ମାଗିଥିଲା।

ଗତ କାଲି ତିନ ହଜାରି କୋର୍ଟ ବିଭବ କୁମାରଙ୍କ ଜାମିନ ଆବେଦନକୁ ଖାରଜ କରି ତାଙ୍କୁ ଝଟକା ଦେଇଥିଲା ଓ ଏବେ ସମସ୍ତଙ୍କ ନଜର ଏହି କଥା ଉପରେ ଅଛି ଯେ, ତାଙ୍କର ରିମାଣ୍ଡ ଆଉ କେତେ ଦିନ ବଢାଯିବ। ଉଲ୍ଳେଖନୀୟ ଯେ, ଆମ୍ ଆଦମୀ ପାର୍ଟିର ରାଜ୍ୟସଭା ସାଂସଦ ସ୍ବାତୀ ମାଲିଓ୍ବାଲଙ୍କ ଲିଖିତ ଅଭିଯୋଗ ପରେ ବିଭବ କୁମାର ୧୮ ମଇରେ ଗିରଫ ହୋଇଥିଲେ।

ଦିଲ୍ଲୀ ପୋଲିସର ଟିମ୍ ଲଗାତାର ବିଭବ କୁମାରଙ୍କ ଉପରେ ଅଭିଯୋଗ କରୁଛି ଯେ, ସେ ପଚରା ଉଚରାରେ ସହଯୋଗ କରୁନାହାନ୍ତି। ପ୍ରଶ୍ନର ଠିକ୍ ଭାବରେ ଉତ୍ତର ଦେଉ ନାହାନ୍ତି। ଏହା ମଧ୍ୟ ଅଭିଯୋଗ ରହିଛି ଯେ, ସେ ଜାଣିଶୁଣି ନିଜର ମୋବାଇଲ ଫୋନ୍‌ର ପାସଓ୍ବାର୍ଡ କହୁନାହାନ୍ତି, ଯାହାକି ସତ ଜାଣିବାକୁ ତଦନ୍ତରେ ଏକ ଗୁରୁତ୍ବପୂର୍ଣ୍ଣ ସୂଚନା। ମାଲିଓ୍ବାଲ ଅଭିଯୋଗ କରିଥିଲେ ଯେ, ୧୩ ମଇରେ କେଜ୍ରିଓ୍ବାଲଙ୍କୁ ଭେଟିବାକୁ ଗଲା ବେଳେ ବିଭବ କୁମାର ତାଙ୍କ ସହ ମାରପିଟ୍ କରିଥିଲେ।