ନୂଆଦିଲ୍ଲୀ, ୧୯/୦୫ : ଦେଶରେ ଲୋକସଭା ନିର୍ବାଚନ ଚାଲିଛି। ସମସ୍ତ ପ୍ରାର୍ଥୀ ନିଜ ନିଜ କ୍ଷେତ୍ରରେ ଜନତାଙ୍କୁ ଭୋଟ୍ ଲାଗି ଆକୃଷ୍ଟ କରିବାରେ ଲାଗିପଡ଼ିଛନ୍ତି । ପ୍ରଚାର ଅଭିଯାନ ଜୋରସୋର ଚଲାଇଛନ୍ତି। ଲୋକଙ୍କୁ ଭୋଟ୍ ଦେବାକୁ ଅପିଲ କରୁଛନ୍ତି । ଲୋକଙ୍କୁ ନିଜର ଦଳ-ବଳ ଦେଖାଇବା ଲାଗି ଭଳିକି ଭଳି ଗାଡ଼ିରେ ନିର୍ବାଚନ ପ୍ରଚାର କରୁଛନ୍ତି । କିଛି ପ୍ରାର୍ଥୀ ପ୍ରଚାର ଲାଗି ହେଲିକପ୍ଟରରେ ପହଞ୍ଚୁଛନ୍ତି । ଇତିମଧ୍ୟରେ ବିହାରର ଗୋପାଲଗଞ୍ଜରୁ ଏକ ନିଆରା ଘଟଣା ସାମ୍ନାକୁ ଆସିଛି। ଏଠାରେ ଜଣେ ନେତା ଗାଡ଼ି ନୁହେଁ, ବରଂ ଗଧ ପିଠିରେ ବସି ପ୍ରଚାର କରୁଛନ୍ତି ।
ଆସନ୍ତା ୨୫ ତାରିଖରେ ବିହାରର ଗୋପାଲଗଞ୍ଜ ଲୋକସଭା ଆସନ ପାଇଁ ମତଦାନ ହେବ। ଏଠାରେ ନାମାଙ୍କନ ପ୍ରକ୍ରିୟା ଚାଲିଥିଲା। ପ୍ରତ୍ୟେକ ନେତା ନିଜ ଦଳ ବଳ ଓ ବଡ଼ ବଡ଼ ଗାଡ଼ିରେ ନାମାଙ୍କନ ଦାଖଲ ଲାଗି ପହଞ୍ଚୁଥିଲେ। କିନ୍ତୁ ଜଣେ ପ୍ରାର୍ଥୀଙ୍କ ନାମାଙ୍କନର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । କାରଣ ସେ କୌଣସି ଗାଡ଼ି ବଦଳରେ ଗଧ ପିଠିରେ ନାମାଙ୍କନ କରିବାକୁ ପହଞ୍ଚିଥିଲେ । ତାଙ୍କ ନାଁ ସତ୍ୟେନ୍ଦ୍ର ବୈଠା । ସେ ଜଣେ ସ୍ୱାଧୀନ ପ୍ରାର୍ଥୀ । ଗୋପାଲଗଞ୍ଜ ଲୋକସଭା କ୍ଷେତ୍ରରୁ ମୋଟ୍ ୧୧ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି । ସ୍ୱାଧୀନ ପ୍ରାର୍ଥୀ ସତ୍ୟେନ୍ଦ୍ର ବୈଠା ଗଳାରେ ନିର୍ବାଚନ ଚିହ୍ନ ଟେମ୍ପୋର ମାଳା ସହିତ ଗଧ ଉପରେ ବସି ସମର୍ଥକଙ୍କ ସହ ଭୋଟ୍ ମାଗୁଥିବା ନଜର ଆସିଛନ୍ତି । ଏ ବିଷୟରେ ପଚାରିବାରୁ ସେ କହିଛନ୍ତି, ଦରଦାମ ବୃଦ୍ଧି ଚରମରେ ପହଞ୍ଚିଛି । ତେଣୁ ଆମେ ଗାଡ଼ିରେ ତେଲ ପକାଇ ପାରିବୁ ନାହିଁ । ସେଥିପାଇଁ ଗଧ ପିଠିରେ ବସି ଜନତାଙ୍କ ପାଖରେ ପହଞ୍ଚୁଛୁ । ନିଜକୁ ଓ ତାଙ୍କ ଗଧକୁ ସେ ଷ୍ଟାର୍ ପ୍ରଚାରକ ବୋଲି ସେ କହିଛନ୍ତି । ଉଭୟଙ୍କ ଆଗରେ ବଡ଼ ବଡ଼ ଷ୍ଟାର୍ ପ୍ରଚାରକ ଫେଲ୍ ବୋଲି ସେ ଦୃଢ଼ୋକ୍ତି ବାଢ଼ିଛନ୍ତି । ଆହୁରି କହିଛନ୍ତି, ଆମର ପ୍ରମୁଖ ସମସ୍ୟା ହେଉଛି ମୂଲ୍ୟବୃଦ୍ଧି, ବେକାରୀ ଶିକ୍ଷା ଓ ସ୍ୱାସ୍ଥ୍ୟ । ଏହି ତମାମ ବିଷୟକୁ ନେଇ ସେ ଜନତାଙ୍କ ପାଖକୁ ଯାଉଛନ୍ତି । ଯଦି ଗୋପାଲଗଞ୍ଜ ଜନତା ତାଙ୍କୁ ସୁଯୋଗ ଦିଅନ୍ତି, ତେବେ ଏ ସମସ୍ତ ମୁଦ୍ଦା ଉପରେ କାମ କରିବେ ବୋଲି ସତ୍ୟେନ୍ଦ୍ର କହିଛନ୍ତି ।