କୋଲକାତା,୦୨/୦୬: ଦୀଘାରେ ଜଗନ୍ନାଥ ମନ୍ଦିର ନିର୍ମାଣ କାର୍ଯ୍ୟ ଜୋରସୋରରେ ଚାଲିଛି । ମନ୍ଦିର ପରିସରରେ ଏକ ନୂତନ ରଥ ନିର୍ମାଣ କରାଯାଉଛି । ରଥଯାତ୍ରା ପୂର୍ବରୁ ଦୀଘାରେ ‘ଜଗନ୍ନାଥ ଧାମ ଏବଂ ସଂସ୍କୃତି ସେବା କେନ୍ଦ୍ରର’ ଉଦ୍ଘାଟନ ହେବାକୁ ନେଇ ସବୁଆଡେ ଚର୍ଚ୍ଚା ଚାଲିଛି । ହେଲେ ଏହାକୁ ସ୍ପଷ୍ଟ କରିନି ପ୍ରଶାସନ । ଜଗନ୍ନାଥ ଧାମ ପରିସରରେ ଲୁହାରେ ଏହି ରଥ ନିର୍ମାଣ କରାଯାଉଛି । ଆସନ୍ତା ଜୁଲାଇ ୭ରେ ରଥଯାତ୍ରା । ଦୀଘାର ଜଗନ୍ନାଥ ଧାମ ରଥଯାତ୍ରା ପୂର୍ବରୁ ଉଦ୍ଘାଟନ ହେବା ନେଇ ଏବେଠାରୁ କଳ୍ପନାଜଳ୍ପନା ଆରମ୍ଭ ହୋଇଛି ।
ଦ୍ୱିତୀୟ ଥର ମୁଖ୍ୟମନ୍ତ୍ରୀ ଭାବରେ ନିର୍ବାଚିତ ହେବା ପରେ ମମତା ବାନାର୍ଜୀ ଦୀଘାରେ ଜଗନ୍ନାଥ ମନ୍ଦିର ନିର୍ମାଣ ପାଇଁ ଘୋଷଣା କରିଥିଲେ। ୨୦୧୮ ମସିହାରେ, ଜଗନ୍ନାଥ ଧାମ ଏବଂ ସଂସ୍କୃତି କେନ୍ଦ୍ରର ନିର୍ମାଣ ୨୫ ଏକର ଜମିରେ ନ୍ୟୁ ଦୀଘା ରେଳ ଷ୍ଟେସନ ନିକଟ ଭାଗିବହମପୁର ମଉଜାଠାରେ ଆରମ୍ଭ ହୋଇଥିଲା । ଏହି ନିର୍ମାଣର ଦାୟିତ୍ୱ ହିଡକାକୁ ରାଜ୍ୟ ସରକାର ପ୍ରଦାନ କରିଥିଲେ । ଏଥିପାଇଁ ୧୮୦ କୋଟି ଟଙ୍କା ଖର୍ଚ୍ଚ ହେଉଛି । ପୁରୀର ଜଗନ୍ନାଥ ମନ୍ଦିର ସହିତ ସମାନ ଉଚ୍ଚତା ଥିବା ଦୀଘାରେ ଜଗନ୍ନାଥ ମନ୍ଦିର ନିର୍ମାଣ ଭଲ ଭାବରେ ଉନ୍ନତ ହୋଇଛି । ଅନ୍ୟ ରାଜ୍ୟରୁ ପଥର ଅଣାଯାଇଛି ଏବଂ ପର୍ଯ୍ୟାୟ କ୍ରମେ ସ୍ଥାପିତ ହୋଇଛି । ମୁଖ୍ୟ ମନ୍ଦିର ସମେତ ନାଟ ମନ୍ଦିର ରଙ୍ଗର ପ୍ରଲେପ ପଡିଛି । ଜଗନ୍ନାଥ, ବଳରାମ ଏବଂ ସୁଭଦ୍ରାଙ୍କ ମୂର୍ତ୍ତି ମଧ୍ୟ ପହଞ୍ଚିଛି ବୋଲି ମୁଖ୍ୟମନ୍ତ୍ରୀ ଦାବି କରିଛନ୍ତି ।
ଉଲ୍ଲେଖ୍ୟ ଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଳିତ ବର୍ଷ ଜାନୁଆରୀରେ ଅଯୋଧ୍ୟାରେ ରାମ ମନ୍ଦିରର ଉଦ୍ଘାଟନ କରିଥିଲେ । ସେତେବେଳେ ମମତା ଘୋଷଣା କରିଥିଲେ ଯେ, ‘ଦୀଘାର ଜଗନ୍ନାଥ ମନ୍ଦିର ଉଦ୍ଘାଟିତ ହେବ ।’ ଏହାପୂର୍ବରୁ ଜାତୀୟ ନିର୍ବାଚନ କମିଶନ ଲୋକସଭା ନିର୍ବାଚନ ପାଇଁ ବିଜ୍ଞପ୍ତି ଜାରି କରିଥିଲେ । ନିର୍ବାଚନ ପ୍ରଚାର ପାଇଁ ପୂର୍ବ ମେଦିନୀପୁର ଯିବା ପରେ ମମତାଙ୍କ ଭାଷଣରେ ଜଗନ୍ନାଥ ମନ୍ଦିରର ପ୍ରସଙ୍ଗ ଉଠିଥିଲା । ତାଙ୍କ ନାମ ନ ରଖି ସେ ପ୍ରଧାନମନ୍ତ୍ରୀଙ୍କୁ ଅପମାନିତ କରି କହିଥିଲେ, ‘ମୁଁ କୌଣସି ଅସମ୍ପୂର୍ଣ୍ଣ ମନ୍ଦିରର ଉଦ୍ଘାଟନ କରୁନାହିଁ । ନିର୍ମାଣ କାର୍ଯ୍ୟ ସରିବା ପରେ ମୁଁ ଦୀଘାରେ ଜଗନ୍ନାଥ ମନ୍ଦିର ଉଦ୍ଘାଟନ କରିବି ।’ ଉଦ୍ଘାଟନୀ ଦିବସରେ ସେ ସାଧାରଣ ଜନତାଙ୍କୁ ଆଗୁଆ ନିମନ୍ତ୍ରଣ କରିଥିଲେ । ସେବେଠାରୁ ଜଗନ୍ନାଥ ମନ୍ଦିର ଓ ରଥ ନିର୍ମାଣ କାର୍ଯ୍ୟ ଜୋରସୋରରେ ଚାଲିଛି । ଏ ବିଷୟରେ ତୃଣମୂଳ ଦ୍ୱାରା ପରିଚାଳିତ ରାମନଗର- ପଞ୍ଚାୟତ ସମିତିର ସଭାପତି ନିତାଇ ସର କହିଛନ୍ତି, ଏହି ବର୍ଷ ଏକ ନୂଆ ରଥ ତିଆରି କରିବାର କାର୍ଯ୍ୟ ଚାଲିଛି ଯାହାଦ୍ୱାରା ମହାପ୍ରଭୁ ରଥ ଯାତ୍ରାରେ ତାଙ୍କ ମାଉସୀ ଘରକୁ ଯାଇପାରିବେ ।
ତେବେ ଦୀଘା-ଶଙ୍କରପୁର ବିକାଶ ପରିଷଦ ସୂତ୍ରରୁ ପ୍ରକାଶ ଯେ ରଥଯାତ୍ରା ପୂର୍ବରୁ ଜଗନ୍ନାଥ ଧାମ ଉଦ୍ଘାଟନ ନେଇ ରାଜ୍ୟ ସରକାର କୌଣସି ସ୍ପଷ୍ଟ ବାର୍ତ୍ତା ରଖିନାହାନ୍ତି । କାଥିଁର ସବ-ଡିଭିଜନାଲ ମାଜିଷ୍ଟ୍ରେଟ ତଥା ଦୀଘା-ଶଙ୍କରପୁର ବିକାଶ ବୋର୍ଡର କାର୍ଯ୍ୟନିର୍ବାହୀ ଅଧିକାରୀ ସୌଭିକ ଭଟ୍ଟାଚାର୍ଯ୍ୟ କହିଛନ୍ତି, ‘ମୁଁ ନିର୍ବାଚନ କାର୍ଯ୍ୟରେ ବ୍ୟସ୍ତ ଥିବାରୁ ମୁଁ ଏପର୍ଯ୍ୟନ୍ତ କିଛି ଜାଣିପାରି ନାହିଁ । କିନ୍ତୁ ମୁଁ ଶୁଣିଛି ଯେ ମନ୍ଦିର ଓ ରଥ ନିର୍ମାଣ କାର୍ଯ୍ୟ ଦ୍ରୁତ ଗତିରେ ଚାଲିଛି । ‘ହିଡକା କିଛି କହିବାକୁ ମନା କରି ଦେଇଛନ୍ତି । କିନ୍ତୁ ସ୍ଥାନୀୟ ବିଧାୟକ ଅଖିଳ ଗିରି କହିଛନ୍ତି, ମାନ୍ୟବର ମୁଖ୍ୟମନ୍ତ୍ରୀ ମମତା ବାନାର୍ଜୀ ଯେଉଁ ଦିନ କହିବେ ସେହିଦିନ ଜଗନ୍ନାଥ ଧାମ ଉଦ୍ଘାଟନ କରିବେ