ନୂଆଦିଲ୍ଲୀ ୦୨/୦୬: ବିଶ୍ୱ ଆର୍ଥିକ ମଞ୍ଚ (ୱର୍ଲଡ୍ ଇକୋନୋମିକ୍ ଫୋରମ୍) ଟ୍ରାଭେଲ ଆଣ୍ଡ ଟୁରିଜମ୍ ଡେଭଲପ୍ମେଣ୍ଟ୍ ଇଣ୍ଡେକ୍ସ (ଟିଟିଡିଆଇ) ଜାରି କରିଛି । ଯାତ୍ରା ଓ ପର୍ଯ୍ୟଟନ ଦୃଷ୍ଟିରୁ ସବୁଠୁ ଲୋକପ୍ରିୟ ୧୧୯ ଦେଶର ତାଲିକା ଏହା ଜାରି କରିଛି । ଏଥିରେ ଭାରତ ୩୯ତମ ସ୍ଥାନରେ ରହିଛି । ପଡ଼ୋଶୀ ଦେଶ ପାକିସ୍ତାନ ଅତ୍ୟନ୍ତ ଖରାପ ସ୍ଥିତି ଅର୍ଥାତ୍, ୧୦୧ତମ ସ୍ଥାନରେ ଅଛି । ଅନ୍ୟ ପଡ଼ୋଶୀ ଦେଶ ନେପାଳ ଓ ବାଂଲାଦେଶ ଯଥାକ୍ରମେ ୧୦୫ ଓ ୧୦୯ତମ ସ୍ଥାନ ହାସଲ କରିଛନ୍ତି । ଶ୍ରୀଲଙ୍କା ୭୬ତମ ସ୍ଥାନରେ ରହିଛି । ଆଫ୍ରିକୀୟ ଦେଶ ତାଲିକାର ସବୁଠୁ ତଳେ ରହିଛି ।
ଟିଟିଡିଆଇ ଇଣ୍ଡେକ୍ସରେ ପାକିସ୍ତାନକୁ ଏସିଆ-ପ୍ରଶାନ୍ତ କ୍ଷେତ୍ରୀୟ ସମୂହରେ ନିମ୍ନ-ମଧ୍ୟବିତ୍ତ ଆୟଯୁକ୍ତ ଅର୍ଥବ୍ୟବସ୍ଥା ରୂପେ ବର୍ଗୀକୃତ କରାଯାଇଛି । ଚଳିତ ବର୍ଷ ପାକିସ୍ତାନର ସ୍ଥାନ ବିଶ୍ୱକୁ ଚକିତ କରିଛି, କାରଣ ପୂର୍ବ ବର୍ଷମାନଙ୍କରେ ଏହାର ପ୍ରଦର୍ଶନ ଭଲ ଥିଲା । ୨୦୨୨ ମସିହାରେ ଏହା ୮୩ତମ ସ୍ଥାନ ହାସଲ କରିଥିଲା । ମଧ୍ୟ-ପୂର୍ବରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ୧୮ତମ ସ୍ଥାନ ହାସଲ କରିଛି । ଏହା ପରେ ସାଉଦି ଆରବ ୪୧, କତର ୫୩ ଓ ବାହାରିନ ୧୮ତମ ସ୍ଥାନରେ ଅଛି । ଟିଟିଡିଆଇ ଇଣ୍ଡେକ୍ସରେ ପର୍ଯ୍ୟଟନ ଦୃଷ୍ଟିରୁ ଶୀର୍ଷରେ ଅଛି ଆମେରିକା । ଏହା ପରେ ଶୀର୍ଷ-୧୦ରେ ଅଛି ସ୍ପେନ୍, ଜାପାନ, ଫ୍ରାନ୍ସ, ଅଷ୍ଟ୍ରେଲିଆ, ଜର୍ମାନୀ, ବ୍ରିଟେନ, ଚୀନ୍, ଇଟାଲି ଓ ସ୍ୱିଜରଲ୍ୟାଣ୍ଡ । ରିପୋର୍ଟ ଅନୁସାରେ, ଟିଟିଡିଆଇ ଇଣ୍ଡେକ୍ସରେ ଶୀର୍ଷ ୩୦ ଦେଶ ମିଳିତ ଭାେ ୨୦୨୨ ମସିହାରେ ବିଶ୍ୱର ଯାତ୍ରା ଓ ପର୍ଯ୍ୟଟନ ଅର୍ଥବ୍ୟବସ୍ଥାରେ ୭୫ ପ୍ରତିଶତ ଯୋଗଦାନ ଦେଇଛନ୍ତି ।ଯାତ୍ରା ଓ ପର୍ଯ୍ୟଟନ ଅର୍ଥବ୍ୟବସ୍ଥାରେ ୨୦୨୦ରୁ ୨୦୨୨ ମଧ୍ୟରେ ଯେତେ ବୃଦ୍ଧି ହୋଇଛି, ସେଥିରେ ଶୀର୍ଷ ୩୦ ଦେଶର ଯୋଗଦାନ ୭୦ ପ୍ରତିଶତ ।
ବ୍ରିଟେନର ୟୁନିଭର୍ସିଟି ଅଫ୍ ସର୍ରେର ସହଯୋଗରେ ପର୍ଯ୍ୟଟନ ଇଣ୍ଡେକ୍ସ ପ୍ରସ୍ତୁତ କରାଯାଇଛି, ଯେଉଁଥିରେ ଯାତ୍ରା ଓ ପର୍ଯ୍ୟଟନ ହିତଧାରକ ସଂଗଠନ ଓ ତଥ୍ୟ ଭାଗୀଦାରମାନେ ମଧ୍ୟ ସାହାଯ୍ୟ କରିଛନ୍ତି । ତେବେ ବିଶ୍ୱ ଆର୍ଥିକ ମଞ୍ଚ ବୈଶ୍ୱିକ ଯାତ୍ରା ଓ ପର୍ଯ୍ୟଟନରେ ବୃଦ୍ଧି ସତ୍ତେ୍ୱ ବିଭିନ୍ନ ସ୍ଥାନରେ ଆସନ୍ନ ଆହ୍ୱାନ ଉପରେ ଗୁରୁତ୍ୱାରୋପ କରିଛି । ଏହା ଭବିଷ୍ୟବାଣୀ କରିଛି, ଆଗାମି ଦିନମାନଙ୍କରେ ଯାତ୍ରା, ପର୍ଯ୍ୟଟନ ଉଦ୍ୟୋଗକୁ ଭୂରାଜନୈତିକ ଚିନ୍ତା, ଆର୍ଥିକ ଅନିଶ୍ଚିତତା ଓ ଏଆଇ ଭଳି ଆହ୍ୱାନର ସମ୍ମୁଖୀନ ହେବାକୁ ପଡ଼ିବ ।
