ନୂଆଦିଲ୍ଲୀ,୨୦/୦୫: କେନ୍ଦ୍ର ସରକାର ଆଣିଥିବା ୩ ନୂଆ ଅପରାଧ ଆଇନ ଉପରେ ସୋମବାର ସୁପ୍ରିମକୋର୍ଟରେ ଶୁଣାଣି ହେବ । ବିଚାରପତି ବେଲା ଏମ ତ୍ରିବେଦୀ ଓ ପଙ୍କଜ ମିଥଲଙ୍କୁ ନେଇ ଗଠିତ ଅବକାଶ ବେଞ୍ଚ ମାମଲାର ଶୁଣାଣି କରିବେ । ସରକାର ପୂର୍ବରୁ କହିସାରିଛନ୍ତି କି ଆଇପିସିରେ ସଂସ୍କାର କରାଯାଇ ଏହି ୩ ନୂଆ ଆଇନ ଅଣାଯାଇଛି । ୩ ଅପରାଧ ଆଇନ ବିରୋଧରେ ଆଡଭୋକେଟ ବିଶାଲ ତିୱାରୀ ସୁପ୍ରିମକୋର୍ଟରେ ପିଟିସନ ଦାଖଲ କରିଛନ୍ତି ।
ସେଥିରେ ସେ ଦର୍ଶାଇଛନ୍ତି ଯେ ସଂସଦରେ ବିନା ବିତର୍କରେ ଏହି ୩ ବିଲ୍କୁ ଗୃହୀତ କରାଯାଇଛି । ସେହି ସମୟରେ ଅଧିକାଂଶ ବିରୋଧୀ ଦଳର ସାଂସଦଙ୍କୁ ଗୃହରୁ ସସ୍ପେଣ୍ଡ କରାଯାଇଥିଲା । ତେଣୁ ଏହି ଆଇନ କାର୍ଯ୍ୟକାରୀ ହେବା ଉପରେ ରୋକ୍ ଲଗାଇବାକୁ ସେ ଅନୁରୋଧ କରିଛନ୍ତି । ଏଥିସହ ନୂଆ ଆଇନର ଭଲ ଓ ମନ୍ଦ ଦିଗ ଉପରେ ଅନୁଧ୍ୟାନ କରିବାକୁ ଏକ ବିଶେଷଜ୍ଞ କମିଟି ମଧ୍ୟ ଗଠନ କରିବାକୁ ନିର୍ଦ୍ଦେଶ ଦେବା ଲାଗି ସେ ଦାବି କରିଛନ୍ତି ।
ଗତବର୍ଷ ଡିସେମ୍ବର ୨୧ରେ ଭାରତୀୟ ନ୍ୟାୟ ସଂହିତା, ଭାରତୀୟ ନାଗରିକ ସୁରକ୍ଷା ସଂହିତା ଓ ଭାରତୀୟ ସାକ୍ଷ୍ୟ ବିଲ୍ ସଂସଦରେ ଗୃହୀତ ହୋଇଥିଲା । ଡିସେମ୍ବର ୨୫ରେ ରାଷ୍ଟ୍ରପତି ଏହା ଉପରେ ମୋହର ମାରିଥିଲେ । ଆସନ୍ତା ଜୁଲାଇ ୧ରୁ ଏହି ନୂଆ ଆଇନ କାର୍ଯ୍ୟକାରୀ ହେବ । ବର୍ତ୍ତମାନ ଦେଶରେ କାର୍ଯ୍ୟକାରୀ ହେଉଥିବା ଇଂରେଜ ଶାସନ ସମୟର ଆଇପିସି, ସିଆରପିସି ଏବଂ ଏଭିଡେନ୍ସ ଆକ୍ଟ ସ୍ଥାନରେ ନୂଆ ଆଇନ ଲାଗୁ ହେବ ।
