ରାଜଗଢ, ୦୩/୦୬ : ମଧ୍ୟପ୍ରଦେଶର ରାଜଗଢ ଜିଲ୍ଲା ପିପଲଦି ଛକରେ ରବିବାର ବିଳମ୍ବିତ ରାତିରେ ମର୍ମନ୍ତୁଦ ଦୁର୍ଘଟଣା। ଭାରସାମ୍ୟ ହରାଇ ଓଲଟିଲା ବରଯାତ୍ରୀ ଟ୍ରାକ୍ଟର। ଗାଡି ତଳେ ଚାପି ହୋଇ ୩ ଶିଶୁ, ୩ ମହିଲାଙ୍କ ସମେତ ୧୩ ଜଣଙ୍କର ମୃତ୍ୟୁ ଘଟିଛି। ସେହିପରି ଏକାଧିକ ଆହତ ହୋଇଛନ୍ତି। ସମସ୍ତ ଅହତଙ୍କୁ ଉଦ୍ଧାର କରି ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣାସ୍ଥଳରେ ଜିଲ୍ଲାପାଳ ଏବଂ ଏସ୍ପି ପହଞ୍ଚି ତଦନ୍ତ ଆରମ୍ଭ କରିଛନ୍ତି।
ସୂଚନାନୁଯାୟୀ, ରାଜସ୍ଥାନର ମୋତିପୁରା ଗ୍ରାମରୁ ଏକ ଟ୍ରାକ୍ଟର ଯୋଗେ କିଛି ବରଯାତ୍ରୀ ରାଜଗଢ ଜିଲ୍ଲା କୁଲାମପୁରା ଗ୍ରାମକୁ ଆସୁଥିଲେ। ରବିବାର ରାତି ପ୍ରାୟ ୮ରୁ ୯ଟା ବେଳେ ଟ୍ରାକ୍ଟରଟି ରାଜଗଢ ଜିଲ୍ଲା ପିପଲଦି ଛକରେ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଗାଡି ତଳେ ଚାପି ହୋଇ ୧୩ ଜଣଙ୍କର ମୃତ୍ୟୁ ଘଟିଛି। ଏକାଧିକ ଆହତ ହୋଇଛନ୍ତି। ସ୍ଥାନୀୟ ଲୋକଙ୍କ ସହାୟତାରେ ପୋଲିସ ସମସ୍ତଙ୍କୁ ଉଦ୍ଧାର କରିଛି। ତେବେ ମୃତକଙ୍କ ସଂଖ୍ୟା ବୃଦ୍ଧି ହୋଇପାରେ।