ନୂଆଦିଲ୍ଲୀ: ୧୯୯୩ ମୁମ୍ବାଇ ବୋମା ବିସ୍ଫୋରଣରେ ଦୋଷୀ ମହମ୍ମଦ ଅଲି ଖାନଙ୍କୁ କୋଲହାପୁର ଜେଲରେ ଅତି ନିର୍ମମ ଭାବେ ହତ୍ୟା କରାଯାଇଛି । ପୋଲିସର ସୂଚନାନୁସାରେ, ଜେଲରେ ନ୍ୟାୟିକ ହେପାଜତରେ ଆସିଥିବା ପାଞ୍ଚଜଣ ଅଭିଯୁକ୍ତ ରବିବାର ଏହି ହତ୍ୟାକାଣ୍ଡ ଘଟାଇଛନ୍ତି । ଏହି ଅଭିଯୁକ୍ତ ମାନେ ମହମ୍ମଦ ଅଲି ଖାନଙ୍କ ମୁଣ୍ଡ କାଟିଥିଲେ, ଏହା ପରେ ତାଙ୍କର ମୃତ୍ୟୁ ହୋଇଛି ।

କୋଲହାପୁର ଜେଲରେ ୧୯୯୩ ମୁମ୍ବାଇ ବିସ୍ଫୋରଣର ଚାରିଜଣ ଦୋଷୀଙ୍କୁ ରଖାଯାଇଛି, ଯେଉଁଥିରୁ ଜଣେ ଦୋଷୀଙ୍କର ନାମ ମହମ୍ମଦ ଅଲି ଖାନ । ଅନ୍ୟ ଏକ ମାମଲାରେ ନ୍ୟାୟିକ ହେପାଜତରେ ଥିବା ୫ ଜଣ ଅଭିଯୁକ୍ତଙ୍କୁ ମହମ୍ମଦ ଅଲି ଖାନଙ୍କ ବ୍ୟାରେକରେ ରଖାଯାଇଥିଲା।

ପୋଲିସର ସୂଚନାନୁସାରେ ଏହି ହତ୍ୟାକାଣ୍ଡ ଘଟାଇଥିବା ଅଭିଯୁକ୍ତଙ୍କ ନାମ ହେଉଛି ପ୍ରତାପ ପାଟିଲ, ଦୀପକ ଖୋଟ, ସନ୍ଦୀପ ଚହ୍ବାନ, ରିତୁରାଜ ଇନାମଦାର ଏବଂ ସୌରଭ ସିଦ୍ଧ । ଜେଲ ବିଭାଗର ଡେପୁଟି ଇନ୍ସପେକ୍ଟର ସ୍ବାତୀ ସାଠେଙ୍କ ଅନୁଯାୟୀ ମୃତ ମହମ୍ମଦ ଅଲି ଖାନଙ୍କ ସମେତ ଏହି ସମସ୍ତ ଅଭିଯୁକ୍ତ ସମାନ ବ୍ୟାରେଜରେ ରହୁଥିଲେ । ସେ କହିଛନ୍ତି ଯେ ଏହି କାରଣରୁ ସେମାନଙ୍କ ମଧ୍ୟରେ କୌଣସି ବିବାଦ ଅଛି କି ନାହିଁ ପୋଲିସ ତଦନ୍ତ କରୁଛି।

ବର୍ତ୍ତମାନ ଜେଲ ଭିତରେ ଏହି ହତ୍ୟା ପରେ ଜେଲ ବିଭାଗ କୋଲହାପୁର ଜେଲରେ ମୁମ୍ବାଇ ବିସ୍ଫୋରଣର ଅନ୍ୟ ଅଭିଯୁକ୍ତଙ୍କ ସୁରକ୍ଷା ବୃଦ୍ଧି କରିଛି । ଜେଲ ଭିତରେ ଏହି ହତ୍ୟା ଘଟଣାର ମୁଖ୍ୟ କାରଣ କ’ଣ ତାହା ଉପରେ ତଦନ୍ତ ଆରମ୍ଭ ହୋଇଛି ।କୋଲହାପୁର ଜେଲରେ ମୁମ୍ବାଇ ବୋମା ବିସ୍ଫୋରଣ ମାମଲାରେ ମହମ୍ମଦ ଅଲି ଖାନ ଆଜୀବନ କାରାଦଣ୍ଡ ଭୋଗୁଥିଲେ। ଏହି ପାଞ୍ଚ ଅଭିଯୁକ୍ତଙ୍କ ବିରୋଧରେ ପୋଲିସ ହତ୍ୟା ମାମଲା ରୁଜୁ କରିଛି।

ସୂଚନାଥାଉକି, ମାର୍ଚ୍ଚ ୧୨, ୧୯୯୩ରେ ବମ୍ବେ ଷ୍ଟକ୍ ଏକ୍ସଚେଞ୍ଜର ୨୮ମହଲା କୋଠାର ତଳ ମହଲାରେ ଏକ ବଡ଼ ବିସ୍ଫୋରଣରେ ୫୦ ଜଣଙ୍କର ମୃତ୍ୟୁ ଘଟିଥିଲା । ଅଧ ଘଣ୍ଟା ପରେ ଦ୍ୱିତୀୟ ବିସ୍ଫୋରଣ ଏକ କାରରେ ଘଟିଥିଲା ଏବଂ ପରେ ଗୋଟିଏ ପରେ ଗୋଟିଏ ବିସ୍ଫୋରଣ ଆରମ୍ଭ ହୋଇଥିଲା । ଦୁଇ ଘଣ୍ଟା ମଧ୍ୟରେ ମୁମ୍ବାଇର ୧୨ ଟି ସ୍ଥାନରେ ୧୩ ଟି ବିସ୍ଫୋରଣ ହୋଇଥିଲା । ଏହି କ୍ରମିକ ବିସ୍ଫୋରଣରେ ୨୫୭ ଜଣଙ୍କର ମୃତ୍ୟୁ ଘଟିଥିବା ବେଳେ ୭୧୩ ଜଣ ଆହତ ହୋଇଥିଲେ।