ନୂଆଦିଲ୍ଲୀ : ଗୁରୁବାର ରାଜ୍ୟସଭାରେ ଶୀତକାଳୀନ ସଂସଦ ଅଧିବେଶନ ଚାଲିଥିବା ସମୟରେ ରଣବୀର କପୁରଙ୍କ ଟପ୍‌ ସ୍କୋରରର ଫିଲ୍ମ ଆନିମଲ ଉପରେ ଚର୍ଚ୍ଚା ହୋଇଛି। ଛତିଶଗଡ଼ର କଂଗ୍ରେସ ସାଂସଦ ରଞ୍ଜିତ୍‌ ରଞ୍ଜନ ଫିଲ୍ମ ଆନିମଲ୍‌ରେ ହିଂସା ଉଦ୍ରେକ ମାମଲା କଥା ଉଠାଇଛନ୍ତି । କବୀର ସିଂହ ଓ ଆନିମଲ ଫିଲ୍ମର ଉଦାହରଣ ଦେଇ ସାଂସଦ ଅଭିଯୋଗ କରିଛନ୍ତି କି, ଫିଲ୍ମରେ ଦେଖାଯାଉ ଥିବା ହିଂସା କାରଣରୁ ଦେଶର ଯୁବପିଢିଙ୍କ ଉପରେ ଏହାର ନକରାତ୍ମକ ପ୍ରଭାବ ପଡ଼ୁଛ । ଜାଣିଶୁଣି ଫିଲ୍ମକୁ ଖୁବ୍‌ ଉତ୍ତେଜିତପୂର୍ଣ୍ଣ କରାଯାଉଛି। ସେ କହିଛନ୍ତି କି, ଆନିମଲ ଫିଲ୍ମରେ ମହିଳାଙ୍କୁ ଅପମାନ ଓ ଏତେ ହିଂସା ପ୍ରବଣ ଭରି ରହିଛି ଯେ , ମୋ ଝିଅ ଓ ତାର ସାଙ୍ଗ କାନ୍ଦି କାନ୍ଦୀ ଫିଲ୍ମ ଅଧାରୁ ସିନେମା ହଲ୍‌ରୁ ବାହାରି ଆସିଥିଲେ। 

କଂଗ୍ରେସ ସାଂସଦ ରଞ୍ଜିତ୍‌ ରଞ୍ଜନ ସଂସଦରେ ଅଣବିଧାୟୀ ମାମଲା ଉପରେ ଚର୍ଚ୍ଚା ବେଳେ କହିଥିଲେ , ସିନେମା ଆମ ସମାଜର ପ୍ରତିବିମ୍ୱ.... ଆମେ ଫିଲ୍ମ ଦେଖି ବଡ଼ ହୋଇଛୁ ଏବଂ ଏହାର ଆମ ସମସ୍ତଙ୍କ ଉପରେ ବିଶେଷକରି ଯୁବକ ଯୁବତୀଙ୍କ ଉପରେ ବହୁତ ବଡ଼ ପ୍ରଭାବ ପଡ଼ୁଛି। କିନ୍ତୁ କବୀର ସିଂହ, ପୁଷ୍ପା ଓ ଏବେ ଆନିମଲ ଭଳି ଫିଲ୍ମ ନିକଟରେ ଆସିଛି , ଯେଉଁଥିରେ ଖୁବ୍‌ ହିଂସା ଉଦ୍ରେକକାରୀ ଚିତ୍ର ରହିଛି। 

ସାଂସଦ ରଞ୍ଜିତ୍‌ ରଞ୍ଜନ କହିଛନ୍ତି ,ଦେଶରେ ଅନେକ ଯୁବକଯୁବତୀ ଏଭଳି ପୁରୁଷଙ୍କୁ ହିରୋ ଓ ରୋଲ୍‌ ମଡେଲ ମାନୁଛନ୍ତି , ଯେଉଁଥି ପାଇଁ ଆମ ସମାଜରେ ମହିଳାଙ୍କ ବିରୋଧରେ ହିଂସକ ଘଟଣା ସବୁ ବୃଦ୍ଧି ଘଟୁଛି। 

ଉଲ୍ଲେଖନୀୟ ଯେ, ନିକଟରେ ରାଷ୍ଟ୍ରୀୟ ଅପରାଧ ରେକର୍ଡ ବ୍ୟୁରୋ (ଏନସିଆରବି)ର ବାର୍ଷିକ ରିପୋର୍ଟରେ ଭାରତରେ ମହିଳାଙ୍କ ବିରୋଧରେ ଅପରାଧ ବୃଦ୍ଧିର ଖୁଲାସା ହୋଇଛି । ୨୦୨୨ରେ ୪,୪୫,୨୫୬ ଟି ମାମଲା ରୁଜୁ କରାଯାଇଛି । ତଥ୍ୟରୁ ଜଣାପଡ଼ୁଛି କି ଦେଶରେ ପ୍ରତି ଘଣ୍ଟାରେ ୫୧ଟି ଏଫଆଇଆର ରୁଜୁ କରାଯାଇଛି।