କଟକ,୧୦/୧୨: କଟକ ସହରରେ ଦୀର୍ଘ ଦିନ ହେବ ଚାଲୁଥିବା ଏକ ବେନାମୀ ତଥା ବେଆଇନ୍ ଗୁଟ୍ଖା କାରଖାନାକୁ ପୁଲିସ ଠାବ କରିଛି । କେଶରପୁର ଅଞ୍ଚଳରେ ଥିବା ଏହି କାରଖାନାରେ ଦରଘାବଜାର ଥାନା ପୁଲିସ ଚଢଉ କରି ଦୁଇ ଜଣଙ୍କୁ ଗିରଫ କରିଛି । ଅଭିଯୁକ୍ତ ଦ୍ୱୟ ହେଲେ କାରଖାନା ମାଲିକ ଘନଶ୍ୟାମ ପଟେଲ (୫୮) ଓ କର୍ମଚାରୀ କେ. ରାଜେଶ (୩୯) । ସେଠାରୁ ବିପୁଳ ପରିମାଣର ଗୁଟ୍ଖା ପ୍ରସ୍ତୁତିରେ ବ୍ୟବହୃତ କଞ୍ଚାମାଲ ଜବତ ହୋଇଛି ।
ଦରଘାବଜାର ଥାନା ପୁଲିସକୁ ଶନିବାର ଦିନ ସୂଚନା ମିଳିଥିଲାଯେ, କେଶରପୁର ସ୍ଥିତ ଏକ ନାମୀ ଫର୍ଣ୍ଣିଚର ଦୋକାନ ନିକଟରେ ବେଆଇନ ଭାବେ ଗୁଟ୍ଖା ପ୍ରସ୍ତୁତ ହେଉଛି । ତୁରନ୍ତ ଏକ ପୁଲିସ ଟିମ୍ ସେଠାରେ ଚଢଉ କରିଥିଲା । ଏହି ସମୟରେ ପୁଲିସକୁ ଦେଖି ଅଭିଯୁକ୍ତ ଘନଶ୍ୟାମ ଓ ରାଜେଶ ଖସି ପଳାଇବାକୁ ଉଦ୍ୟମ କରୁଥିଲେ । ମାତ୍ର ତାଙ୍କୁ ପୁଲିସ ଧରିନେଇଥିଲା । ସେଠାରେ ଥିବା ୩ଟି କୋଠରୀ ମଧ୍ୟରୁ ଗୋଟିଏ ରୁମ୍ରେ ବିପୁଳ ପରିମାଣର ଗୁଟ୍ଖା ପ୍ରସ୍ତୁତିରେ ବ୍ୟବହୃତ ବିଭିନ୍ନ ପ୍ରକାର ରସାୟନିକ ପଦାର୍ଥ ଗଦା ହୋଇଥିଲା
ସେହିପରି ଅନ୍ୟ ଦୁଇ ରୁମରୁ ଗୁଟ୍ଖା ପ୍ରସ୍ତୁତି ଓ ପ୍ୟାକେଜିଂ ପାଇଁ ଆବଶ୍ୟକୀୟ ଉପକରଣ ଏବଂ ପ୍ରସ୍ତୁତ ଗୁଟ୍ଖା ପ୍ୟାକେଜିଂ ପାଇଁ ଜମା ହୋଇଥିଲା । ଉକ୍ତ ଗୁଟ୍ଖା ପ୍ୟାକେଟ ଗୁଡିକୁ ଯାଞ୍ଚ୍ କରିବାରୁ ସେଥିରେ ଏକ୍ସପାରୀ ବା ବୈଧ ତାରିଖ ଲେଖା ନଥିଲା । ଏପରିକି କାରଖାନା ଚଳାଇବା ପାଇଁ ଆବଶ୍ୟକ ଲାଇସେନ୍ସ ବି ଘନଶ୍ୟାମ ପାଖରେ ନଥିଲା । ଫଳରେ ପୁଲିସ ଉକ୍ତ ଘରେ ଗଦା ହୋଇଥିବା ଗୁଟଖା ସହ ପ୍ରସ୍ତୁତି ପାଇଁ ରହିଥିବା ୧୮୦ ଗ୍ରାମର ସିଲଭର ପର୍ଲ୍ସ, ୨୫ ଲିଟର କିମାମ, ୫ଟି କମ୍ପାଉଣ୍ଡ, ୨୦ ଲିଟର ସୁଗନ୍ଧ କେମିକାଲ, ୧୮ ଲିଟର ଗ୍ଲିସେରିନ, ୫ ଲିଟର ପରଫ୍ୟୁମ୍, ୪ କିଲୋ ପିପରମେଣ୍ଟ୍ ଜବତ କରିଛି । ପରେ ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
