ନୂଆଦିଲ୍ଲୀ,୦୭/୧୨: ଆସନ୍ତା ବର୍ଷ ଫେବ୍ର୍ରୁଆରୀ ଶେଷ ଭାଗରେ ପରବର୍ତ୍ତୀ ଟେଲିକମ୍ ସ୍ପେକ୍ଟ୍ରମ୍ ନିଲାମ ହେବ । ଅଧିକାଂଶ ବ୍ୟାଣ୍ଡ ପାଇଁ ରିଜର୍ଭ ପ୍ରାଇସ୍ ୨୦୨୨ ସହ ସମାନ ରହିବ ବୋଲି ଟେଲିକମ୍ ବିଭାଗ(ଡଟ୍) ପ୍ରକାଶ କରିଛି । ୬୦୦ ମେଗାହର୍ଜରେ ଆରମ୍ଭ ହେଉଥିବା ନିମ୍ନ ବ୍ୟାଣ୍ଡଗୁଡ଼ିକ ପାଇଁ ଟେଲିକମ୍ କମ୍ପାନିଗୁଡ଼ିକ ଆଗ୍ରହ ଦେଖାଇପାରନ୍ତି ବୋଲି ସରକାର ଅନୁମାନ କରୁଛନ୍ତି । କାରଣ ଏହି ବ୍ୟାଣ୍ଡରେ ଅଧିକାଂଶ ଲାଇସେନ୍ସର ଅବଧି ଶେଷ ହେଉଛି ।
୬୦୦ରୁ ୨୩୦୦ ମେଗାହର୍ଜର ସମସ୍ତ ନିମ୍ନ ବ୍ୟାଣ୍ଡ, ୩୩୦୦ ମେଗାହର୍ଜର ମିଡ୍ ବ୍ୟାଣ୍ଡ ଏବଂ ୨୬ ଗିଗାହର୍ଜ ଉଚ୍ଚ ବ୍ୟାଣ୍ଡ ପାଇଁ ରିଜର୍ଭ ପ୍ରାଇସ୍ ୨୦୨୨ ସହ ସମାନ ରହିବ ବୋଲି ଡଟ୍ ଅଧିକାରୀମାନେ ସୂଚନା ଦେଇଛନ୍ତି । ଏହା କରିବା ପାଇଁ ଚଳିତବର୍ଷ ପ୍ରଥମାର୍ଦ୍ଧରେ ଟେଲିକମ୍ ନିୟାମକ ଟ୍ରାଇ ପକ୍ଷରୁ ପରାମର୍ଶ ଦିଆଯାଇଥିଲା । ତେବେ ୩୭ ଗିଗାହର୍ଜ ଭଳି ନୂଆ ବ୍ୟାଣ୍ଡଗୁଡ଼ିକ ପାଇଁ ଟ୍ରାଇ ପକ୍ଷରୁ କୌଣସି ପ୍ରକାର ସୁପାରିସ ହୋଇନାହିଁ । ତେବେ ଅନୁମାନ କରାଯାଉଛି ଯେ, ଏହି ନିଲାମରୁ କେନ୍ଦ୍ର ସରକାର ଖୁବ୍ କମ୍ ରାଜସ୍ୱ ହାସଲ କରିବେ। କାରଣ ଜିଓ ଏବଂ ଏୟାର୍ଟେଲ ଭଳି ୫ଜି ଅପରେଟରମାନେ ସେମାନେ ଆବଶ୍ୟକ କରୁଥିବା ଅଧିକାଂଶ ଏୟାର୍ୱେଭ୍ ହାତେଇ ସାରିଲେଣି ।
ସୂଚନାଯୋଗ୍ୟ, ୨୦୧୦ରେ ୩ଜି ସ୍ପେକ୍ଟ୍ରମ୍ ନିଲାମରୁ ସରକାର ୫୦,୯୬୮ କୋଟିର ରାଜସ୍ୱ ହାସଲ କରିଥିଲେ । ସମାନ ବର୍ଷରେ ୪ଜି ଏୟାର୍ୱେଭ୍ ନିଲାମରୁ ୨୫,୬୯୬ କୋଟିର ରାଜସ୍ୱ ମିଳିଥିଲା । ୨୦୧୨ରେ ଏହା ୯,୬୪୨ କୋଟି ରହିଥିବାବେଳେ ୨୦୧୩ରେ ୪,୧୧୪ କୋଟି, ୨୦୧୪ରେ ୬୧,୧୬୨ କୋଟି, ୨୦୧୫ରେ ୧,୧୩,୯୩୨ କୋଟି, ୨୦୧୬ରେ ୬୫,୭୮୯ କୋଟି, ୨୦୨୧ରେ ୭୭,୮୧୫ କୋଟି ଏବଂ ୨୦୨୨ରେ ୫ଜି ସ୍ପେକ୍ଟ୍ରମ୍ ନିଲାମରୁ ୧,୨୦,୧୭୩ କୋଟି ଟଙ୍କାର ରାଜସ୍ୱ ଆସିଥିଲା ।
