ଭୁବନେଶ୍ୱର,୦୯/୦୯: ରାଜଧାନୀ ଉପକଣ୍ଠ ପଥରଗାଡିଆର ଏକ ରେସ୍ତୋରାଁରେ ଦୁର୍ବୃତ୍ତମାନେ ହଙ୍ଗାମା ଖେଳାଇଛନ୍ତି । ରେସ୍ତୋରାଁରେ ଚେୟାର ନ ମିଳିବାରୁ ଗ୍ରାହକଙ୍କୁ ନିର୍ଧୁମ ପିଟିଛନ୍ତି । ସେମାନଙ୍କ କାର ଭାଙ୍ଗିଛନ୍ତି । ଆକ୍ରମଣରେ ନଚିକେତା ଦାଶ ଓ ଶାଶ୍ୱତ ମହାନ୍ତି ନାମକ ୨ ଗ୍ରାହକ ଆହତ ହୋଇଛନ୍ତି ।
ବଡ଼ କଥା ହେଉଛି, ପ୍ରାୟ ଅଧ ଘଣ୍ଟାଏ ଧରି ଦୁର୍ବୃତ୍ତମାନେ ସେଠାରେ ଆତଙ୍କ ଖେଳାଇଥିଲେ । ଅନ୍ୟ ଗ୍ରାହକମାନେ ଜରୁରୀ ସେବା ୧୧୨କୁ ଫୋନ୍ ଯୋଗେ ଜଣାଇଥିଲେ । ହେଲେ ପିସିଆର ଭ୍ୟାନ୍ ଘଟଣାସ୍ଥଳରେ ପହଞ୍ଚି ପାରିଲାନି । ଏମିତିକି ଥାନାର ସୀମା ବିବାଦ ଯୋଗୁ ଇନ୍ଫୋସିଟି ଓ ଚନ୍ଦକା ଥାନା ପୁଲିସ ପ୍ରଥମେ ଅଭିଯୋଗପତ୍ର ରଖିଲେନି । ଯାହାକି, କମିଶନରେଟ ପୁଲିସର ଛବିକୁ ପୁଣି ମଳିନ କରିଛି ।
ପଥରଗାଡିଆରୁ ଡିଏନ୍ ସ୍କୁଲକୁ ଲମ୍ବିଥିବା ଶହେ ଫୁଟିଆ ରାସ୍ତାକଡ଼ରେ ଅଛି ବେଙ୍ଗାଲୁରୁ ଏକ୍ସପ୍ରେସ୍ । ଏହି ରେସ୍ତୋରାଁରେ ସବୁବେଳେ ଗ୍ରାହକଙ୍କ ଭିଡ଼ ରହୁଛି । ବିଶେଷକରି ଯୁବପିଢ଼ିଙ୍କ ମନ ପସନ୍ଦ ରେସ୍ତୋରାଁ ଏଇଟା । ସନ୍ଧ୍ୟା ସାଢ଼େ ୬ଟା ବେଳର ଘଟଣା । ରେସ୍ତୋରାଁରେ ପ୍ରବଳ ଭିଡ଼ ଥାଏ । ନଚିକେତା ଓ ଶାଶ୍ୱତଙ୍କ ସମେତ ଏକ ଘରୋଇ ଶିକ୍ଷାନୁଷ୍ଠାନର କିଛି ଛାତ୍ରଛାତ୍ରୀ ସେଠାରେ ପହଞ୍ଚିଲେ। ରେସ୍ତୋରାଁରେ ଭିଡ଼ ଥିବାରୁ ଚେୟାର ମିଳିଲାନି । କିଛି ସମୟ ଅପେକ୍ଷା କରିବା ପରେ ୩ଟି ଚେୟାର ଫାଙ୍କା ହେଲା । ସେମାନେ ଏହାକୁ କବ୍ଜା କରିବାକୁ ଯିବା ବେଳେ ଅନ୍ୟ ଏକ ଗୋଷ୍ଠୀର ଯୁବକମାନେ ପ୍ରଥମେ ମାଡି ବସିଲେ । ଯାହାକୁ ନେଇ ଯୁକ୍ତତର୍କ ହୋଇଥିଲା । ଅପରଗୋଷ୍ଠୀର ଯୁବକମାନେ ୨ଜଣଙ୍କୁ ରେସ୍ତୋରାଁରୁ ଟାଣି ରାସ୍ତା ଉପରକୁ ନେଇଗଲେ । ସଂଘବଦ୍ଧ ଭାବେ ସେମାନଙ୍କୁ ପିଟିବାକୁ ଲାଗିଲେ । ଅନ୍ୟ ଗ୍ରାହକମାନେ ଜୀବନ ବିକଳରେ ଧାଇଁବାକୁ ଲାଗିଲେ । ନଚିକେତା ଓ ଶାଶ୍ୱତ ଅନ୍ୟ ସାଙ୍ଗଙ୍କ ସହ ସେଠାରୁ ଖସି ଯିବାକୁ ବାହାରିବା ବେଳେ ଆକ୍ରମଣକାରୀମାନେ ତାଙ୍କ କାର କାଚ ଭାଙ୍ଗି ଦେଇଥିଲେ ।
ଘରୋଇ ହସ୍ପିଟାଲରେ ଚିକିତ୍ସିତ ହୋଇ ଫେରିବା ପରେ ଉଭୟେ ପ୍ରଥମେ ଇନ୍ଫୋସିଟି ଥାନା ଯାଇଥିଲେ । ବେଙ୍ଗାଲୁରୁ ଏକ୍ସପ୍ରେସ୍ ଉକ୍ତ ଥାନ ଅଧୀନରେ ଯାଉନଥିବା ଦର୍ଶାଇ ପୁଲିସ ସେମାନଙ୍କୁ ଫେରାଇ ଦେଇଥିଲା । ପୀଡି଼ତଙ୍କୁ ଚନ୍ଦକା ଥାନାରେ ମଧ୍ୟ ସମାନ ଉତ୍ତର ମିଳିଥିଲା । ପରେ ଇନ୍ଫୋସିଟି ଥାନା ପୁଲିସ ଏତାଲା ଗ୍ରହଣ କରିଛି । ରେସ୍ତୋରାଁର ସିସି କ୍ୟାମେରା ଫୁଟେଜ୍ ଯାଞ୍ଚ କରି ତଦନ୍ତ ଚଳାଇଛି।
