ନୂଆଦିଲ୍ଲୀ: ଦୀର୍ଘ ଦୁଇ ବର୍ଷ ପରେ ଭାରତ ଫେରିବାକୁ ଯାଉଛି ଆମେରିକୀୟ କାର ନିର୍ମାତା ‘ଫୋର୍ଡ’ । ତାମିଲନାଡୁରେ ପୁଣି ଥରେ କାରଖାନା ଆରମ୍ଭ କରିବାକୁ ଯୋଜନା କରୁଛି କମ୍ପାନି । କମ୍ପାନି ତାମିଲନାଡୁ ପ୍ଲାଣ୍ଟରେ କାର ତିଆରି କରି ରପ୍ତାନୀ କରିବ । ଏନେଇ ଶୁକ୍ରବାର କମ୍ପାନି ରାଜ୍ୟ ସରକାରଙ୍କ ପାଖରୁ ଅନୁମତି ଲୋଡ଼ିଥିବା ଜଣାପଡ଼ିଛି । ଗତକାଲି ମୁଖ୍ୟମନ୍ତ୍ରୀ ଏମକେ ଷ୍ଟାଲିନ କହିଥିଲେ ଯେ, ରପ୍ତାନୀ ଲାଗି ଦୁଇଟି ନିର୍ମାଣ କମ୍ପାନି ଯୋଗଯୋଗ କରିଛନ୍ତି ।

 ୨୦୨୧ରେ ଘରୋଇ ବଜାରରେ ବିକ୍ରି ଲାଗି କାର ଉତ୍ପାଦନ ବନ୍ଦ କରିଥିଲା ଫୋର୍ଡ । ପରେ ୨୦୨୨ରେ କାର ବିକ୍ରିରେ ହ୍ରାସ ଘଟିବାରୁ କମ୍ପାନି ରପ୍ତାନୀ ଉପରେ ମଧ୍ୟ ରୋକ ଲଗାଇ ଦେଇଥିଲା । ଏହା ସହ ଫୋର୍ଡ ତୃତୀୟ ସବୁଠୁ ବଡ଼ କାର ନିର୍ମାତା କମ୍ପାନି ତାଲିକାରୁ ତଳକୁ ଖସିଆସିଥିଲା । ଏବେ ଏହି ତାଲିକାରେ ଏସିଆର କାର ନିର୍ମାତାଙ୍କ ଦବଦବା ରହିଛି ।  

ଏବେ ପୁଣି ଥରେ ରପ୍ତାନୀ ବୃଦ୍ଧି କରିବା  ଲାଗି ଭାରତରେ କାର ନିର୍ମାଣ ଉପରେ ଧ୍ୟାନକେନ୍ଦ୍ରୀତ କରାଯିବ ବୋଲି ଫୋର୍ଡ ପକ୍ଷରୁ କୁହାଯାଇଛି । କେଉଁ ସବୁ ମଡେଲ ଭାରତରେ ନିର୍ମାଣ ହେବ ସେନେଇ କମ୍ପାନି ପକ୍ଷରୁ ସ୍ପଷ୍ଟ କରାଯାଇନାହିଁ । ଫେରିଯିବା ପୂର୍ବରୁ ଚେନ୍ନାଇର ଏହି ପ୍ଳାଣ୍ଟରେ କମ୍ପାନି କାର ଏବଂ ଇଞ୍ଜିନ ତିଆରି କରୁଥିଲା ।