ନୂଆଦିଲ୍ଲୀ୧୨।୫: କାନାଡାରେ ଖଲିସ୍ତାନୀ ଆତଙ୍କବାଦୀ ହରଦୀପ ସିଂ ନିଜ୍ଜାର ହତ୍ୟା ମାମଲା । ଏଥିରେ ଚତୁର୍ଥ ଅଭିଯୁକ୍ତକୁ ଗିରଫ କଲା କାନାଡା ପୋଲିସ । ତେବେ ପୂର୍ବରୁ ଏହି ମାମଲାରେ ୩ ଭାରତୀୟଙ୍କୁ ଗିରଫ କରାଯାଇଥିବା ବେଳେ ଗତକାଲି ଚତୁର୍ଥ ଅଭିଯୁକ୍ତଙ୍କୁ ଗିରଫ କରାଯାଇଛି। ସେ ଜଣେ ଭାରତୀୟ ହୋଇଥିବା ବେଳେ ତା’ର ନାମ ଅମନଦ୍ବୀପ ସିଂ ବୋଲି ଜଣାପଡିଛି। 

ତେବେ ଏହି ପ୍ରସଙ୍ଗରେ ଭାରତ-କାନାଡା ମଧ୍ୟରେ ଦ୍ବିପାକ୍ଷିକ ସମ୍ପର୍କ ଅତି ତିକ୍ତତାପୂର୍ଣ୍ଣ ସ୍ଥିତିକୁ ଯାଇଥିଲା । ଏହି ହତ୍ୟାକାଣ୍ଡରେ ଭାରତୀୟ ଏଜେନ୍ସିର ସମ୍ପୃକ୍ତି ଅଭିଯୋଗ ନିଜେ କାନାଡା ପ୍ରଧାନମନ୍ତ୍ରୀ  ଉଠାଇବା ପରେ ଏହାକୁ ନୂଆଦିଲ୍ଲୀ ଖଣ୍ଡନ କରିବା ସହ ତୀବ୍ର ନିନ୍ଦା କରିଥିଲା । ତେବେ ଏହି ମାମଲାର ତଦନ୍ତ ଓ କାର୍ଯ୍ୟାନୁଷ୍ଠାନ କାନାଡାର ଆଭ୍ୟନ୍ତରୀଣ ବ୍ୟାପାର ବୋଲି ଭାରତୀୟ ବିଦେଶ ମନ୍ତ୍ରଣାଳୟ କହିସାରିଛି ।

କାନାଡାର ସ୍ଥାନୀୟ ଗଣମାଧ୍ୟମରେ ପ୍ରସାରିତ ସୂଚନା ଅନୁସାରେ, ମାମଲାର ତଦନ୍ତ କରୁଥିବା ରୟାଲ କାନାଡା ମାଉଣ୍ଟେଡ ପୋଲିସ ଦ୍ବାରା ଗିରଫ ୪ର୍ଥ ଅଭିଯୁକ୍ତ ମଧ୍ୟ ଜଣେ ଭାରତୀୟ । ପୂର୍ବରୁ ୩ ଭାରତୀୟ କରନ ବରାର, କମଲପ୍ରୀତ ସିଂ ଓ କରଣପ୍ରୀତ ସିଂଙ୍କୁ ପୋଲିସ ଗିରଫ କରିଥିଲା । ସମସ୍ତ ୪ ଗିରଫ ଅଭିଯୁକ୍ତଙ୍କୁ ଏବେ ଜେରା ଜାରି ରହିଛି । ଖଲିସ୍ତାନୀ ଆନ୍ଦୋଳନର ନେତୃତ୍ବ ନେଇ ଏକାଧିକ ହିଂସା ଓ ଅପରାଧିକ କାଣ୍ଡରେ ସାମିଲ ଥିବା ହରଦ୍ବୀପ ସିଂ ନିଜ୍ଜାରକୁ ୨୦୨୦ରେ ଭାରତ ସରକାର ଦ୍ବାରା ଆତଙ୍କବାଦୀ ଘୋଷିତ ହୋଇଥିଲା । କାର୍ଯ୍ୟାନୁଷ୍ଠାନ ପୂର୍ବରୁ ସେ ଦେଶ ଛାଡି ପଳାୟନ କରିଥିଲା । ପରବର୍ତ୍ତୀ ସମୟରେ ସେ କାନାଡାରେ ଥିବା ଜଣାପଡିଥିଲା । ଗତବର୍ଷ ଜୁନରେ କାନାଡାର ବ୍ରିଟିଶ କଲମ୍ବିଆ ଏରିଆରେ ତାକୁ ଅଜଣା ଦୁର୍ବୃତ୍ତ ଗୁଳି କରି ହତ୍ୟା କରିଥିଲେ । ଏହାପରେ କାନାଡା ଭାରତ ମଧ୍ୟରେ କୂଟନୈତିକ ତିତକ୍ତା ଆରମ୍ଭ ହୋଇଥିଲା ।