ଭୁବନେଶ୍ୱର, ୦୯/୦୮: ଆଜାଦୀ କା ଅମୃତ ମହୋତ୍ସବ ଅବସରରେ  "ହର ଘର ତ୍ରିରଙ୍ଗା' ଅଭିଯାନ ରାଜ୍ୟବ୍ୟାପୀ ଅନୁଷ୍ଠିତ ହେବ । ଆସନ୍ତା ୧୫ ତାରିଖରେ ଦେଶ ସ୍ୱାଧୀନତାର ୭୭ ବର୍ଷ ପାଳନ ଅବସରରେ ଏହି ଅଭିଯାନ  ୧୩ରୁ ୧୫ ତାରିଖ ପର୍ଯ୍ୟନ୍ତ ଅନୁଷ୍ଠିତ  ହେବ। ପ୍ରତି ଘରେ ଜାତୀୟ ପତାକା  ଉଡ଼ାଇ ସ୍ୱାଧୀନତା ଉତ୍ସବ ପାଳିବାକୁ  ଉତ୍ସାହିତ କରିବା ଏହି ଅଭିଯାନର  ମୁଖ୍ୟ ଉଦ୍ଦେଶ୍ୟ । ଏ ସଂପର୍କରେ ଭାରତ ସରକାରଙ୍କ ସଂସ୍କୃତି ଓ ପର୍ଯ୍ୟଟନ  ବିଭାଗ ତରଫରୁ ଓଡ଼ିଶାର ମୁଖ୍ୟମନ୍ତ୍ରୀଙ୍କ  ନିକଟକୁ ପ୍ରେରିତ ପତ୍ର ଆଧାରରେ ଆମ  ରାଜ୍ୟରେ "ହର ଘର ତ୍ରିରଙ୍ଗା' ଅଭିଯାନ  ଅନୁଷ୍ଠିତ ହେବ ।  ଏହି ପରିପ୍ରେକ୍ଷୀରେ ଗୁରୁବାର ସନ୍ଧ୍ୟାରେ ଲୋକସେବା ଭବନରେ  ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ  ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ  ହୋଇଥିଲା । 

ବୈଠକର ଆଲୋଚନା  ଅନୁସାରେ "ହର ଘର ତିରଙ୍ଗା'  କାର୍ଯ୍ୟକ୍ରମ ପ୍ରତି ଜିଲ୍ଲା, ବ୍ଲକ ଓ ପଞ୍ଚାୟତ  ସ୍ତରରେ ମଧ୍ୟ ପାଳିତ ହେବ । ପଞ୍ଚାୟତ ସ୍ତର କାର୍ଯ୍ୟକ୍ରମରେ ପଞ୍ଚାୟତିରାଜ  ପ୍ରତିନିଧି, ସ୍ୱୟଂସହାୟକ ଗୋଷ୍ଠୀ, ଜିଲ୍ଲା ଜଳ ଓ ପରିମଳ କମିଟିଙ୍କ ସହ ବିଶିଷ୍ଟ  ବ୍ୟକ୍ତିମାନେ ଯୋଗଦେବେ । ଏହି  କାର୍ଯ୍ୟକ୍ରମରେ ବିଗତ ବର୍ଷ ଭଳି ଚଳିତ  ବର୍ଷ ମଧ୍ୟ ଜାତୀୟ ପତାକା ସହ ସେଲ୍‌ଫି  ଅନ୍‌ଲାଇନରେ ଅପଲୋଡ୍‌ କରିବାକୁ ଅନୁରୋଧ କରାଯାଇଛି  ।  

ଚଳିତ ବର୍ଷ "ହର ଘର ତ୍ରିରଙ୍ଗା'  ବ୍ୟାନରରେ ତ୍ରିରଙ୍ଗା ଶପଥ ଓଡ଼ିଆ ଭାଷାରେ ନିଆଯିବ । ସ୍ଥାନୀୟ ନେତୃବୃନ୍ଦ,  ବିଦ୍ୟାଳୟ, ମହାବିଦ୍ୟାଳୟ, ବିଭିନ୍ନ  ଅନୁଷ୍ଠାନ ଓ ଜନସାଧାରଣ ଜାତୀୟ ପତାକା  ସହ ତ୍ରିରଙ୍ଗା ଯାତ୍ରାରେ ସାମିଲ ହେବାକୁ  କୁହାଯାଇଛି । ସ୍ୱାଧୀନତା ସଂଗ୍ରାମୀଙ୍କୁ  ମଧ୍ୟ ସମ୍ବର୍ଦ୍ଧିତ କରାଯିବ । ରାଜ୍ୟସ୍ତରରେ ଏବଂ ଜିଲ୍ଲାସ୍ତରୀୟ ଉତ୍ସବ ଆୟୋଜନ  ସ୍ଥଳରେ ତ୍ରିରଙ୍ଗା କାନଭାସ ରଖାଯିବ,  ଯେଉଁଥିରେ ଜନସାଧାରଣ "ହର ଘର  ତ୍ରିରଙ୍ଗା' ଏବଂ "ଜୟ ହିନ୍ଦ୍‌' ଲେଖି  ଅଭିଯାନରେ ସାମିଲ ହେବେ । ମିଶନ  ଶକ୍ତି ବିଭାଗ ତରଫରୁ ସ୍ୱୟଂ ସହାୟକ  ଗୋଷ୍ଠୀ ସହଯୋଗରେ ଜାତୀୟ ପତାକା ପ୍ରସ୍ତୁତି ପାଇଁ ନିର୍ଦ୍ଦେଶ ଦିଆଯାଇଛି ।