ନୂଆଦିଲ୍ଲୀ: ଇସ୍ରାଏଲ୍ ସୁରକ୍ଷା ବାହିନୀ (ଆଇଡିଏଫ୍) ଅନୁଯାୟୀ ଗାଜାର ଏକ ସୁଡଙ୍ଗରୁ ୬ ଜଣ ବନ୍ଧକଙ୍କ ମୃତଦେହ ଉଦ୍ଧାର କରାଯାଇଛି । କୁହାଯାଉଛି ଯେ ଶନିବାର ଏହି ସମସ୍ତ ମୃତଦେହ ଗୁଡିକୁ ଉଦ୍ଧାର କରାଯାଇଛି । କିନ୍ତୁ ସେମାନଙ୍କ ପରିଚୟ ସ୍ପଷ୍ଟ କରିବାକୁ କିଛି ସମୟ ଲାଗିଥିଲା । ୬ ଜଣ ପୀଡିତଙ୍କ ମୃତଦେହ ମଧ୍ୟରେ ୩ ପୁରୁଷ ଏବଂ ୩ ମହିଳାଙ୍କ ମୃତଦେହ ରହିଛି । ଆମେରିକାର ନାଗରିକ ଗୋଲ୍ଡବର୍ଗ ପୋଲିନଙ୍କ ମୃତଦେହ ମଧ୍ୟ ଏଥିରେ ଅନ୍ତର୍ଭୁକ୍ତ ରହିଛି । ଆମେରିକାର ରାଷ୍ଟ୍ରପତି ଜୋ ବାଇଡେନ ମଧ୍ୟ ଗୋଲ୍ଡବର୍ଗ-ପୋଲିନଙ୍କ ମୃତଦେହକୁ ନିଶ୍ଚିତ କରିଛନ୍ତି । ରାଷ୍ଟ୍ରପତି ଜୋ ବାଇଡେନ ବନ୍ଧକ ମାନଙ୍କ ମୃତ୍ୟୁ ପାଇଁ ହାମାସକୁ ସିଧାସଳଖ ଦାୟୀ କରିଛନ୍ତି । ବାଇଡେନ ଏକ ବିବୃତ୍ତିରେ କହିଛନ୍ତି ଯେ, "ଆଜି ସକାଳେ, ରାଫା ସହର ତଳେ ଥିବା ଏକ ସୁଡଙ୍ଗରେ ଇସ୍ରାଏଲ୍ ସୈନ୍ୟବାହିନୀ ହମାସ୍ ଦ୍ବାରା ବନ୍ଧକ ହୋଇଥିବା ୬ ଜଣଙ୍କ ମୃତଦେହ ଉଦ୍ଧାର କରିଛନ୍ତି । ଆମେ ବର୍ତ୍ତମାନ ନିଶ୍ଚିତ କରିଛୁ ଯେ ବନ୍ଧକ ମଧ୍ୟରୁ ଜଣେ ଆମେରିକାର ନାଗରିକ ଥିଲେ । 

ଅକ୍ଟୋବର ୭ ରେ ହାମାସ ଆତଙ୍କବାଦୀଙ୍କ ଦ୍ବାରା ଇସ୍ରାଏଲ ଉପରେ ହୋଇଥିବା ଆକ୍ରମଣରେ ୨୩ ବର୍ଷିୟ ହର୍ଶ ଗୋଲ୍ଡବର୍ଗ-ପୋଲିନ୍ ବନ୍ଧକ ହୋଇଥିଲେ । ସମୁଦାୟ ୨୫୧ ଜଣଙ୍କୁ ହମାସ୍ ବନ୍ଧକ ରଖିଥିଲା ।

ସୂଚନାଥାଉକି,ଯେ ଇସ୍ରାଏଲ ୭ ଅକ୍ଟୋବର ୨୦୨୩ ରୁ ଗାଜା ପଟ୍ଟିରେ ହାମାସ ବିରୁଦ୍ଧରେ ଏକ ବଡ଼ ଧରଣର ଆକ୍ରମଣ ଆରମ୍ଭ କରିଛି, ଯେତେବେଳେ ହାମାସ ଦକ୍ଷିଣ ଇସ୍ରାଏଲ ଉପରେ ଆକ୍ରମଣ କରିଥିଲା ଯେଉଁଥିରେ ପ୍ରାୟ ୧୨ ଶହ ଲୋକ ପ୍ରାଣ ହରାଇଥିଲେ । ଗାଜା ସ୍ଥିତ ସ୍ୱାସ୍ଥ୍ୟ ଅଧିକାରୀ ଶନିବାର କହିଛନ୍ତି ଯେ ଇସ୍ରାଏଲ୍ ଆକ୍ରମଣରେ ମୃତ ପାଲେଷ୍ଟାଇନୀୟଙ୍କ ସଂଖ୍ୟା ୪୦୬୯୧ ରେ ପହଞ୍ଚିଛି।