ଭୁବନେଶ୍ୱର,୨୯/୦୩: ଏପ୍ରିଲ୍ ୨ରୁ ଆରମ୍ଭ ନୂଆ ଶିକ୍ଷା ବର୍ଷ । ଏଥିସହ ସମେଟିଭ୍ ଆସେସ୍ମେଣ୍ଟ (ଏସ୍ଏ)-୨ ରେଜଲ୍ଟ ପ୍ରକାଶ କରାଯିବ। ପାଠପଢ଼ା ସହ ନାମଲେଖା ମଧ୍ୟ ଜାରି ରହିବ । ଏନେଇ ଗୁରୁବାର ଓଡ଼ିଶା ବିଦ୍ୟାଳୟ ଶିକ୍ଷା କାର୍ଯ୍ୟକ୍ରମ ପ୍ରାଧିକରଣଙ୍କ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ଚିଠି କରାଯାଇଛି ।
ପ୍ରଥମରୁ ନବମ ଶ୍ରେଣୀ ଛାତ୍ରଛାତ୍ରୀଙ୍କ ସମେଟିଭ୍ ଆସେସ୍ମେଣ୍ଟ- ୨ର ରେଜଲ୍ଟ ଏପ୍ରିଲ୍ ୨ରେ ପ୍ରକାଶ କରିବାକୁ ନିର୍ଦ୍ଦେଶ ଦିଆଯାଇଛି । ରେଜଲ୍ଟ ପ୍ରକାଶ ଦିନ ଅଭିଭାବକମାନେ ଉପସ୍ଥିତ ରହିବାକୁ ସୁନିଶ୍ଚିତ କରାଯିବ । ପିଲାଙ୍କ ଏସ୍ଏ-୨ ରେଜଲ୍ଟକୁ ଆଧାର କରି ଆବଶ୍ୟକୀୟ ପଦକ୍ଷେପ ନିଆଯିବ । ଆଗାମୀ ଶ୍ରେଣୀରେ ସେମାନଙ୍କର ଉନ୍ନତି କିପରି ହେବ ତାକୁ ନେଇ ସ୍ୱତନ୍ତ୍ର ଧ୍ୟାନ ଦିଆଯିବ । ରେଜଲ୍ଟ ପ୍ରକାଶ ଦିନ ସ୍କୁଲ୍ରେ ଅନ୍ୟ କୌଣସି କାର୍ଯ୍ୟକ୍ରମ କରାଯିବ ନାହିଁ ।
ଅନ୍ୟପଟେ ୨ ତାରିଖରୁ ନୂଆ ଶିକ୍ଷା ବର୍ଷ ଆରମ୍ଭ ହେବ । ନୂଆ ଶ୍ରେଣୀରେ ପଢ଼ିବେ ଛାତ୍ରଛାତ୍ରୀ । ଏଥିପାଇଁ ପ୍ରସ୍ତୁତ ହେବାକୁ ଓସେପା ପକ୍ଷରୁ କୁହାଯାଇଛି । ଠିକ୍ ସମୟରେ ପିଲାଙ୍କୁ ପାଠ୍ୟପୁସ୍ତକ ଦେବାକୁ କୁହାଯାଇଛି । ପାଠପଢ଼ା ସମୟରେ ନାମଲେଖା ପ୍ରକ୍ରିୟା କରାଯିବ। ସ୍କୁଲ୍ ଖୋଲା ଦିନ ହିଁ ନାମଲେଖା ହେବ । ଏଥିରେ ପିଲାଙ୍କ ପାଠପଢ଼ା ଯେପରି ନଷ୍ଟ ନହୁଏ ସେଥିପ୍ରତି ଧ୍ୟାନ ଦିଆଯିବ । ଏନେଇ ନେଇ ଜିଲ୍ଲା ଶିକ୍ଷା ଅଧିକାରୀମାନେ ସ୍କୁଲ୍ ପ୍ରଧାନଶିକ୍ଷକଙ୍କୁ ଜଣାଇବେ