ଭୁବନେଶ୍ୱର,୧୩/୦୯: ଓଡ଼ିଶାର ପ୍ରତି ଅଞ୍ଚଳର ସଫଳ ମହିଳାଙ୍କୁ "ସୁଭଦ୍ରା ଅପା'ର ଆଖ୍ୟା ଦିଆଯିବା । ଏଥିସହ ସେହି ସଫଳ ମହିଳାଙ୍କ କାହାଣୀକୁ "ମୋ ସୁଭଦ୍ରା ଷ୍ଟୋରି' ଭାବେ ପ୍ରତିଷ୍ଠିତ କରାଯିବ । ରାଜ୍ୟର କୋଣ ଅନୁକୋଣରେ ‘ସୁଭଦ୍ରା’ ଯୋଜନାର ଏଭଳି ଉତ୍ସାହକୁ ଦେଖି ଏହି ନିଷ୍ପତ୍ତି ନେଇଛନ୍ତି ଓଡ଼ିଶା ସରକାର ।
ଏଥି ସହ ଯୋଜନା ସମ୍ବନ୍ଧୀୟ ଜନସଚେତନତା ପାଇଁ ଆଜିଠୁ ଏକ ସପ୍ତାହ ପର୍ଯ୍ୟନ୍ତ ରାଜ୍ୟରେ ପ୍ରତି ବ୍ଲକ୍ ଓ ପଞ୍ଚାୟତରେ "ସୁଭଦ୍ରା ସ୍ୱାଗତ ସପ୍ତାହ' ଅନୁଷ୍ଠିତ ହେବ । ଏଥିରେ ବ୍ଲକ୍ ସ୍ତରର ସମସ୍ତ ଅଧିକାରୀ ସମେତ ଅଙ୍ଗନବାଡ଼ି କର୍ମୀ, ସୁପରଭାଇଜର୍, ଏସ୍ଏଚ୍ଜି ସଦସ୍ୟା, ଆଶାକର୍ମୀମାନେ ଗାଁ ଗାଁରେ ସଭା କରାଇ ଲୋକଙ୍କୁ "ସୁଭଦ୍ରା' ସମ୍ପର୍କରେ ସଚେତନ କରିବେ । ପ୍ରତି ପଞ୍ଚାୟତରେ ପଥପ୍ରାନ୍ତ ନାଟକ ସମେତ ଚିତ୍ରାଙ୍କନ, କୁଇଜ୍ ପ୍ରତିଯୋଗିତା କରାଯାଇ ସଚେତନ କରାଯିବ । ଏହାସହ "ଘରେ ଘରେ ସୁଭଦ୍ରା' ବିଷୟବସ୍ତୁ ଉପରେ ରାଜ୍ୟର ବିଭିନ୍ନ ମହାବିଦ୍ୟାଳୟର ଛାତ୍ରଛାତ୍ରୀମାନଙ୍କ ମଧ୍ୟରେ ଚିତ୍ରାଙ୍କନ, ପ୍ରବନ୍ଧ, ତର୍କ, ରଙ୍ଗୋଲି ଓ ଫଟୋଗ୍ରାଫି ପ୍ରତିଯୋଗିତା ମଧ୍ୟ ଅନୁଷ୍ଠିତ ହେବ।
‘ସୁଭଦ୍ରା’ ମାର୍ଗଦର୍ଶିକା ଜାରି ହେଲା ଦିନରୁ ସାରା ଓଡ଼ିଶାରେ ଫର୍ମ ବିତରଣ ଓ ପଞ୍ଜୀକରଣ ଜୋର୍ସୋର୍ରେ ଆଗେଇ ଚାଲିଛି । ଲୋକମାନଙ୍କ ଉତ୍ସାହକୁ ଲକ୍ଷ୍ୟ କରି ରାଜ୍ୟସ୍ତରୀୟ ଓ ଜିଲ୍ଲାସ୍ତରୀୟ ବୈଠକ କରାଯାଇ ଯୋଜନାର କାର୍ଯ୍ୟାନ୍ୱୟନକୁ ବିଭିନ୍ନ ସ୍ତରରେ ତଦାରଖ କରାଯାଉଛି । ଗୁରୁବାର ସନ୍ଧ୍ୟା ସୁଦ୍ଧା "ସୁଭଦ୍ରା' ନିମନ୍ତେ ପଞ୍ଜୀକରଣ ୪୫ ଲକ୍ଷରେ ପହଞ୍ଚି ସାରିଲାଣି ବୋଲି ସରକାରଙ୍କ ପକ୍ଷରୁ ସୂଚନା ଦିଆଯାଇଛି।
