ନୂଆଦିଲ୍ଲୀ,୨୨।୯: ହିଜବୁଲା ଆତଙ୍କବାଦୀଙ୍କ ଉପରେ ଇସ୍ରାଏଲର ଆକ୍ରମଣ ଜାରି ରହିଛି। ଏହା ଭିତରେ ଆମେରିକା, ଫ୍ରାନ୍ସ, କାନାଡା ଓ ବ୍ରିଟେନ୍ର ସରକାର ଲେବାନନରେ ଥିବା ନିଜ ନାଗରିକଙ୍କୁ ପରାମର୍ଶ ଦେଇଛି, ଯେତେ ଜଲଦି ହେବ ସେତେ ଶୀଘ୍ର ଦେଶ ଛାଡି ଦିଅ। ଆମେରିକା ବୈଦେଶିକ ବିଭାଗ କହିଛି, ଯେଉଁ ପର୍ଯ୍ୟନ୍ତ ବିମାନ ଚଳାଚଳ ଉପଲବ୍ଧ ରହିଛି, ସେ ପର୍ଯ୍ୟନ୍ତ ଲେବାନନ୍ ଛାଡି ଦିଅ। କିଛି ଦିନ ଭିତରେ ସୁରକ୍ଷା ସ୍ଥିତି ଖୁବ୍ ଖରାପ ହୋଇପାରେ। ନିକଟରେ ଲେବାନନ୍ ଉପରେ ଇସ୍ରାଏଲର ଡ୍ରୋନ୍ ଆକ୍ରମଣରେ ହିଜବୁଲାର ଟପ୍ କମାଣ୍ଡର ଅହମ୍ମଦ ବାହଭି ସହିତ ବହୁ ଲୋକଙ୍କ ଜୀବନ ଯାଇଥିଲା। ବେରୁଟ୍ରେ ଇସ୍ରାଏଲର ଆକ୍ରମଣରେ ମୃତକଙ୍କ ସଂଖ୍ୟା ୩୭ ହୋଇଯାଇଛି।
ସମସ୍ତେ ପୂର୍ବରୁ ଇସ୍ରାଏଲ ପିଏମ୍ ବେଞ୍ଜାମିନ୍ ନେତନ୍ୟାହୁ ଯୁଦ୍ଧ କ୍ୟାବିନେଟ୍ ଘୋଷଣା କରିଥିଲେ ଯେ, ହମାସ ପରେ ଏବେ ହିଜବୁଲା ସହ ସିଧା ଟକ୍କର ହେବାର ସମୟ ଆସି ଯାଇଛି। ଏହାପରେ ସେ ଲଗାତାର ହୁଜବୁଲା ଉପରେ ଆକ୍ରମଣ କରୁଛନ୍ତି। ପେଜର ଓ ଓ୍ବାକି-ଟକି ବିସ୍ଫୋରଣରେ ବହୁ ହିଜବୁଲା କମାଣ୍ଡରଙ୍କୁ ଇସ୍ରାଏଲ ମାରିସାରିଛି। ଏହି ଆକ୍ରମଣରେ ୪ ହଜାରରୁ ଅଧିକ ଆହତ ହୋଇଛନ୍ତି। ଶୁକ୍ରବାର ବେରୁଟ୍ ଫରେ ହୋଇଥିବା ଆକ୍ରମଣରେ ମୃତକଙ୍କ ସଂଖ୍ୟା ୩୭ ହୋଇଯାଇଛି।
ଅନ୍ୟପକ୍ଷେ ହିଜବୁଲା ମଧ୍ୟ ଇସ୍ରାଏଲ ଉପରେ କାଉଣ୍ଟର ଆଟାକ୍ କରୁଛି। ରବିବାର ଇସ୍ରାଏଲ ମିଡିଆ ରିପୋର୍ଟ ଦେଇଥିଲା ଯେ, ହିଜବୁଲା ଉତ୍ତର ଇସ୍ରାଏଲରେ ୧୦୦ରୁ ଅଧିକ ରକେଟ ମାଡ କରିଛି। ତେବେ ଏହି ଆକ୍ରମଣରେ କେହି ହତାହତ ହୋଇଥିବାର ସୂଚନା ମିଳିନି। ଅଧିକାଂଶ ଆକ୍ରମଣ ଶିନ୍ ବେଟ୍ ଓ ଇସ୍ରାଏଲ ବାୟୁରକ୍ଷା ପ୍ରରାଳୀ ଦ୍ବାରା ଆକାଶ ମାର୍ଗରେ ହିଁ ନଷ୍ଟ କରି ଦିଆଯାଇଥିଲା ଓ ବାକି ନିର୍ଜନ ଅଞ୍ଚଳରେ ପଡିଥିଲା।
