ମୁମ୍ବାଇ ୦୪/୦୩: ବୈଭବ ଗୁପ୍ତା ଇଣ୍ଡିଆନ ଆଇଡଲ-୧୪ ବିଜୟୀ ହୋଇଛନ୍ତି । କାନପୁରର ବାସିନ୍ଦା ବୈଭବ ବିଜୟୀ ଟ୍ରଫି ସହ ୨୫ ଲକ୍ଷ ଟଙ୍କାର ପୁରସ୍କାର ଓ ଏକ କାର୍ ହାସଲ କରିଛନ୍ତି । ଗତକାଲି ରଙ୍ଗାରଙ୍ଗ ପରିବେଶରେ ଅନୁଷ୍ଠିତ ଏହି ଶୋ’ର ଗ୍ରାଣ୍ଡ ଫିନାଲେରେ ବିଶିଷ୍ଟ ଗାୟକ ସୋନୁ ନିଗମ ବିଜେତାଙ୍କ ନାମ ଘୋଷଣା କରିଥିଲେ । ଅନ୍ୟପକ୍ଷରେ ସୁଭଦୀପ ଦାସ ଚୌଧୁରୀ ପ୍ରଥମ ରନରଅପ୍ ହୋଇଥିବା ବେଳେ ପିୟୁଷ ପନୱାର ଦ୍ୱିତୀୟ ଓ ଅନନ୍ୟା ପାଲ ତୃତୀୟ ରନରଅପ୍ ହୋଇଛନ୍ତି । ପ୍ରଥମ ଓ ଦ୍ୱିତୀୟ ରନରଅପ୍ଙ୍କୁ ୫ ଲକ୍ଷ ଏବଂ ତୃତୀୟ ରନରଅପଙ୍କୁ ୩ ଲକ୍ଷ ଟଙ୍କାର ପୁରସ୍କାର ମିଳିଛି ।
ତେବେ ଏହି ପ୍ରତିଯୋଗିତା ଜିତିବା ବୈଭବଙ୍କ ପାଇଁ ଏତେ ସହଜ ନଥିଲା । ବୈଭବଙ୍କ ସମେତ ଅନନ୍ୟା ପାଲ, ଆଦ୍ୟା ମିଶ୍ର, ପିୟୁଷ ପନୱାର ଓ ଅଞ୍ଜନା ପଦ୍ମନାଭନ ଶୀର୍ଷ ୫ ପ୍ରତିଯୋଗୀ ଥିଲେ । ସମସ୍ତେ ବେଶ୍ ଭଲ ପ୍ରଦର୍ଶନ କରିଥିଲେ । ହେଲେ ବୈଭବଙ୍କ ସ୍ୱରର ଯାଦୁ ବିଚାରକମଣ୍ଡଳୀ ଓ ଦର୍ଶକଙ୍କୁ ବାନ୍ଧି ଦେଇଥିଲା । କୁମାର ସାନୁ, ଶ୍ରେୟା ଘୋଷାଲ ଓ ବିଶାଲ ଡଡଲାନୀ ବିଚାରକ ଭାବେ ରହିଥିଲେ । ସେହିଭଳି ସୋନୁ ନିଗମ ଓ ନେହା କକଡ ମଧ୍ୟ ଏହି ଶୋ’ର ଅଂଶ ପାଲଟିଥିଲେ ।
