ପାରାଦୀପ,୦୩/୧୨: ପାରାଦୀପ ବନ୍ଦରରେ ଲାଗିଥିବା ବିଦେଶୀ ଜାହାଜ ଦେବୀ ପନୋରମାରୁ ୨୨୦ କୋଟି ଟଙ୍କାର କୋକେନ୍ ଜବତ ହେବା ମାମଲାର ଛାନ୍ଭିନ୍ ଏବେ ଜାରି ରହିଛି । ଶନିବାର ଦିନତମାମ୍ ଅଟକ ଥିବା ଜାହାଜରେ କଷ୍ଟମ୍ସ୍ ଓ ଏନ୍ସିବି ଟିମ୍ ତଦନ୍ତ ଓ ଜେରା ଚଳାଇଥିବା ବେଳେ ଖୁବ୍ଶୀଘ୍ର ୧୦ରୁ ଅଧିକ ଲୋକଙ୍କୁ ଏହି ମାମଲାରେ ଗିରଫ କରାଯାଇପାରେ ବୋଲି ସୂଚନା ମିଳିଛି । ଆଗକୁ ନୂଆବର୍ଷ ଆସୁଥିବାରୁ କେତେକ ବଡ଼ ଚୋରା ନିଶା ବେପାରୀଙ୍କୁ ଏହି କୋକେନ୍ ଯୋଗାଣ ପାଇଁ ଯୋଜନା ହୋଇଥିବା କଥା ମଧ୍ୟ ତଦନ୍ତ ବେଳେ ସନ୍ଦେହ ପରିସରକୁ ଆସିଛି ।
ଗତ ଗୁରୁବାର ରାତିରେ ଜାହାଜରୁ ୨୨ କିଲୋଗ୍ରାମ୍ କୋକେନ୍ ଧରାପଡ଼ିବା ପରେ ରାଜ୍ୟବ୍ୟାପୀ ହଇଚଇ ସୃଷ୍ଟି ହୋଇଥିଲା । ମାମଲାର ତଦନ୍ତଭାର କଷ୍ଟମ୍ସ୍ ବିଭାଗ ହାତରେ ଥିବା ବେଳେ ଶନିବାର ପୁଣି ଏସ୍ଟିଏଫ୍ର ଡଗ୍ ସ୍କାଡ୍ ଜାହାଜକୁ ତନ୍ନତନ୍ନ କରି ଖୋଜିଛନ୍ତି । ଅଧିକ କିଛି ନମିଳିବାରୁ ସ୍କାଡ୍ ଫେରି ଯାଇଛି । କଷ୍ଟମ୍ସ୍ ବିଭାଗ ସହିତ ଏନ୍ସିବିର ଏକ ଟିମ୍ ମଧ୍ୟ ତଦନ୍ତରେ ସାମିଲ ହୋଇଛି । କଷ୍ଟମ୍ସ୍ ବିଭାଗର ଏକ ୨୦ରୁ ୨୫ ଜଣିଆ ଦଳ ଏହି ତଦନ୍ତରେ ସାମିଲ ଥିବା ବେଳେ କମିସନର, ଆସିଷ୍ଟାଣ୍ଟ୍ କମିସନର, ସୁପରିଣ୍ଟେଣ୍ଡେଣ୍ଟ୍, ଆପ୍ରାଇଜର୍ ଭଳି ଉଚ୍ଚପଦସ୍ଥ ଅଧିକାରୀମାନେ ଟିମ୍ରେ ଅଛନ୍ତି ।
ବିଶ୍ୱସ୍ତ ସୂତ୍ରରୁ ପ୍ରକାଶ, ପ୍ରାୟ ୧୦ ଜଣଙ୍କୁ ଏହି ମାମଲାରେ ଗିରଫ କରାଯାଇପାରେ । ଜାହାଜର କ୍ର୍ୟୁ ସଦସ୍ୟଙ୍କ ସମେତ ଅଟକ ଥିବା ୨୧ ବିଦେଶୀ ନାଗରିକଙ୍କୁ ମାରାଥନ୍ ଜେରା କରାଯାଇ ତଥ୍ୟ ଆଦାୟ କରାଯାଉଛି । ଜାହାଜରେ ଲାଗିଥିବା ସିସିଟିଭିରୁ ଯାହାକିଛି ଫୁଟେଜ୍ ମିଳିଛି ସେଥିରେ ଜାହାଜ ବାହାର କିଛି ଲୋକଙ୍କର ସଂପୃକ୍ତି ଏହି କାରବାରରେ ଥିବା ସନ୍ଦେହ ପରିସରକୁ ଆସିଛି । ଆଗକୁ ନୂଆବର୍ଷ ଥିବାରୁ କେତେକ ଚୋରା ନିଶା ବେପାରୀଙ୍କୁ ଯୋଗାଇବାକୁ ଯୋଜନା କରାଯାଇ ନିଶାଦ୍ରବ୍ୟ ଆସିଥିବା କଥା ତଦନ୍ତରୁ ଆଭାସ ମିଳୁଛି । ଗତକାଲି ରାତିରେ ଜଗତସିଂହପୁର ଏସ୍ପି ରାହୁଲ ପିଆର୍ ପାରାଦୀପ ଆସି ପୂରା ଘଟଣା ସମ୍ପର୍କରେ ବୁଝିଛନ୍ତି ।
ଅଟକ ଏମ୍ଭି ଦେବୀ ପନୋରମା ଜାହାଜ ବର୍ତ୍ତମାନ ପିଆଇସିଟିର ବର୍ଥରେ ଲାଗିଥିବା ବେଳେ ବନ୍ଦରର ପଣ୍ୟ କାରବାର ବ୍ୟାହତ ହୋଇଛି । ଯେଉଁଥିପାଇଁ ବର୍ଥିଂ ଚାର୍ଜ ବାବଦକୁ ପିଆଇସିଟି ସଂପୃକ୍ତ ଜାହାଜ କମ୍ପାନୀ ପାଖରୁ ଦିନକୁ ୪ ଲକ୍ଷ ଟଙ୍କା ନେବ ବୋଲି ଜଣାପଡ଼ିଛି । ଖାଲି ଏତିକି ନୁହେଁ ବରଂ ଇଣ୍ଡୋନେସିଆର ଯେଉଁ କମ୍ପାନି ଜାହାଜରେ ମାଲ୍ ପରିବହନ କରିବାକୁ ବୁକିଂ କରିଛି ସେ କମ୍ପାନୀ ମଧ୍ୟ ଜାହାଜ କମ୍ପାନୀଠୁ ଦିନକୁ ୩୦ ହଜାର ଡଲାର୍ ଜରିମାନା ନେବ ବୋଲି ଜଣାପଡ଼ିଛି । ଜାହାଜ ଦିନେ ଅଟକ ରହିଲେ ଆନୁମାନିକ ୩୦ ଲକ୍ଷ ଟଙ୍କାର କ୍ଷତି ସହିବାକୁ ପଡ଼ିବ ବୋଲି କୁହାଯାଉଛି । ଜାହାଜ ଏବେ ପିଆଇସିଟି ବର୍ଥରେ ସପ୍ତାହେରୁ ଅଧିକ ଦିନ ଅଟକ ରହିପାରେ ବୋଲି ସୂଚନା ମିଳିଛି ।
