ଶ୍ରୀନଗର ୨୫/୦୯: ଜମ୍ମୁ-କାଶ୍ମୀର ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ୬ଟି ଜିଲ୍ଲାର ୨୬ ଆସନରେ ମତଦାନ ଚାଲିଛି । ଏଥିରେ ୨୫.୭୮ ଲକ୍ଷ ଭୋଟର ନିଜ ମତାଧିକାର ସାବ୍ୟସ୍ତ କରିବେ । ଦ୍ୱିତୀୟ ପର୍ଯ୍ୟାୟର ୨୬ ଆସନ ମଧ୍ୟରୁ ୧୫ଟି କେନ୍ଦ୍ରୀୟ କାଶ୍ମୀର ଏବଂ ୧୧ଟି ଜମ୍ମୁର ରହିଛି ।
ନିର୍ବାଚନ କମିଶନଙ୍କ ମୁତାବକ, ଦ୍ୱିତୀୟ ପର୍ଯ୍ୟାୟରେ ୨୩୯ ପ୍ରାର୍ଥୀ ମଇଦାନରେ ଅଛନ୍ତି । ଏମାନଙ୍କ ମଧ୍ୟରେ ୨୩୩ ପୁରୁଷ ଏବଂ ୬ ମହିଳା । ୧୩୧ ପ୍ରାର୍ଥୀ କୋଟିପତି ଓ ୪୯ ଜଣଙ୍କ ବିରୋଧରେ ଫୌଜଦାରୀ ମାମଲା ରହିଛି । ଜମ୍ମୁ-କାଶ୍ମୀର ବିଜେପି ଅଧ୍ୟକ୍ଷ ରବିନ୍ଦର ରାଇନା ନିଜ ସମ୍ପତ୍ତି ମୂଲ୍ୟ ମାତ୍ର ୧ ହଜାର ଟଙ୍କା ଦର୍ଶାଇଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ତଥା ନ୍ୟାସ୍ନାଲ୍ କନ୍ଫରେନ୍ସ ଉପାଧ୍ୟକ୍ଷ ଓମାର୍ ଅବ୍ଦୁଲ୍ଲା ଗାନ୍ଦରବଲ୍ ଓ ବୀରବାହରୁ ନିର୍ବାଚନ ଲଢ଼ୁଛନ୍ତି । ସେ ଲୋକସଭା ନିର୍ବାଚନରେ ବାରାମୂଳା ଆସନରେ ଲଢ଼ି ହାରିଥିଲେ ।
