ଛତ୍ରପୁର, ୦୪/୦୩ : ଛତ୍ରପୁର ଥାନା ଜାତୀୟ ରାଜପଥ ଉଜଳେଶ୍ୱର ମନ୍ଦିର ନିକଟରୁ ଏକ କଣ୍ଟେନରରୁ ଗୋରୁମାଂସ ଜବତ ହୋଇଛି। ବଜରଙ୍ଗଦଳ ପକ୍ଷରୁ ଏହି କଣ୍ଟେନେରକୁ ଜବତ କରାଯାଇଛି। ଛତ୍ରପୁର ପୋଲିସ ପହଞ୍ଚି ଡ୍ରାଇଭର୍ ଓ ହେଲପରକୁ ଅଟକ ରଖିଛି।
ସୂଚନାନୁଯାୟୀ, ଛତ୍ରପୁର ଥାନା ଜାତୀୟ ରାଜପଥ ଉଜଳେଶ୍ୱର ମନ୍ଦିର ନିକଟରେ ବଜରଙ୍ଗୀ ଦଳ ଏକ ଗୋମାଂସ ବୋଝେଇ କଣ୍ଟେନର ଜବତ କରିଛି। ଖବର ପାଇ ଆଇଆଇସି ନିରୋଦ କୁମାର ଦାସ ଘଟଣା ସ୍ଥଳରେ ପହଞ୍ଚି କଣ୍ଟେନରକୁ ଜବତ କରିବା ସହ ଡ୍ରାଇଭର ଓ ହେଲପରକୁ ଗିରଫ କରିଛନ୍ତି। ଏହି ଗାଡ଼ିରେ ୨୧ ଟନ୍ ଗୋମାଂସ ଥିବା ବଜରଙ୍ଗଦଳ ଦାବୀ କରିଛି।
ଏହି ମାଂସ ଗୁଡିକ ପ୍ୟାକେଟ କରି କଣ୍ଟେନରରେ ରଖାଯାଇଥିଲା। କଟକରୁ ହାଇଦ୍ରାବାଦ ଗୋମାଂସ ଚୋରା ଚାଲାଣ ହେଉଥିବା କୁହାଯାଉଛି। ପୂର୍ବରୁ ନିକଟସ୍ଥ ଚମାଖଣ୍ଡି ଥାନା ଅଧୀନରେ ବଜରଙ୍ଗଦଳ ଗୋମାଂସ ବୋଝେଇ କଣ୍ଟେନର ଓ ଟ୍ରକ୍ ଜବତ କରି ଥାନାରେ ଦେଇଥିଲେ।