ଜଗତସିଂହପୁର,୨୪/୦୨: ବିଜେଡି ପକ୍ଷରୁ ଟିକେଟ୍ ଘୋଷଣା ହୋଇନାହିଁ । ସମସ୍ତଙ୍କ ମୁହଁରେ କିନ୍ତୁ ଗୋଟିଏ କଥା, ନବୀନ ପଟ୍ଟନାୟକ ସର୍ବମାନ୍ୟ ନେତା । ସେ ଯାହାକୁ ଯେଉଁଠୁ ଚାହିଁବେ ସେଠାରେ ସେଇ ନେତା ବିଜେଡି ଟିକେଟରେ ବିଧାୟକ ନିର୍ବାଚନ ଲଢ଼ିବେ । ଜଗତସିଂହପୁର ଜିଲ୍ଲାରେ କିନ୍ତୁ ବିଜେଡି ଟିକେଟ ଚୟନ ହୋଇ ସାରିଥିବା ନେଇ ପ୍ରବଳ ଚର୍ଚ୍ଚା ହେଉଛି । ସୋସିଆଲ୍ ମିଡିଆରେ ତ’ କିଏ କେଉଁଠୁ ଛିଡ଼ା ହେବ ସେକଥା ଦର୍ଶାଇ ଦିଆଗଲାଣି । ତେବେ ଏଥିରେ ସତ୍ୟତା ଥାଉ ବା ନଥାଉ ଏଭଳି ଭାଇରାଲ୍ ପୋଷ୍ଟ୍କୁ ନେଇ ରାଜନୈତିକ ଚର୍ଚ୍ଚା ଜୋର୍ ଧରିଛି ।
ଜଗତସିଂହପୁର ନିର୍ବାଚନମଣ୍ଡଳୀ କ୍ଷେତ୍ରରେ ପ୍ରଶାନ୍ତ ମୁଦୁଲି ଓ ଅମରେନ୍ଦ୍ର ଦାସଙ୍କ ଭିତରୁ ଯିଏ ହେଲେ ଜଣେ ବିଜେଡି ଟିକେଟ ପାଇବେ ବୋଲି ପ୍ରଚାର ହେଉଛି । ଏମିତିକି ପ୍ରଶାନ୍ତ ପୁଣି ଦ୍ୱିତୀୟ ଥର ଏଠାରୁ ଲଢ଼ିବେ ଏବଂ ଅମରେନ୍ଦ୍ରଙ୍କୁ ନିଗମ ଦେଇ ସନ୍ତୁଷ୍ଟ କରାଯିବ ବୋଲି କଥା ଉଠୁଛି । ପାରାଦୀପ ନିର୍ବାଚନମଣ୍ଡଳୀରେ ସମ୍ବିତ ରାଉତରାୟଙ୍କ ବଦଳରେ ତାଙ୍କ ପତ୍ନୀ ଗୀତାଞ୍ଜଳିଙ୍କୁ ଦଳ ଟିକେଟ ଦେବ ବୋଲି ପ୍ରଚାର ହେଲାଣି । ଏପଟେ ଦୌଡ଼ରେ ବାପି ସର୍ଖେଲ କିମ୍ବା ତାଙ୍କ ପତ୍ନୀ ମୋନିଦୀପା ଥିବା ମଧ୍ୟ ଚର୍ଚ୍ଚା ହେଉଛି । କେହି କେହି ପୌରାଧ୍ୟକ୍ଷ ବସନ୍ତ ବିଶ୍ୱାଳଙ୍କ ଲବି ଥିବା କହୁଛନ୍ତି । ଏପଟେ ବିଜେପି ପଟକୁ ମଧ୍ୟ ବାପି ସର୍ଖେଲ ଢଳିପାରନ୍ତି ବୋଲି ଗୁଞ୍ଜରଣ ଖେଳିଛି । ବାଲିକୁଦା-ଏରସମାରେ ବି ରଘୁନନ୍ଦନ ଦାସ ଓ ଶାରଦା ଜେନା ଲବିରେ ଥିବା କୁହାଯାଉଛି ।
ଏପରିକି ସାରଦା ବିଜେଡି ଟିକେଟ୍ର ନିକଟତର ବୋଲି କେହି କେହି କହିଲେଣି । କିନ୍ତୁ ରଘୁନନ୍ଦନ ବାଜି ମାରିପାରନ୍ତି ବୋଲି କୁହାଯାଉଛି । ତିର୍ତ୍ତୋଲ ନିର୍ବାଚନମଣ୍ଡଳୀ ବିଷୟରେ ଦଳ ଏବେଯାଏ ଚିନ୍ତା କରି ନଥିଲେ ସୁଦ୍ଧା ରାଜଶ୍ରୀ ମଲ୍ଲିକଙ୍କୁ ଏଥରକ ନିର୍ବାଚନ ଲଢ଼ିବାକୁ ସୁଯୋଗ ମିଳିବା ନେଇ ସନ୍ଦେହ ରହୁଥିବା ଗୁଞ୍ଜରିତ ହେଲାଣି । ଆଜିଠୁ ଏପ୍ରକାର ରାଜନୈତିକ ଅଙ୍କକଷା ହଠାତ୍ ଜୋର୍ ଧରିଥିବାରୁ ଏଥିରେ ସତ୍ୟତା କମ୍ ବୋଲି ବିଜେଡି ଶିବିରରେ ଚର୍ଚ୍ଚା ହେଉଛି ।
Also Read :-
